ការរៀបចំប្រមូលផ្តុំក្រុមកីឡាជម្រើសជាតិ គឺដើម្បីត្រៀមចូលរួមការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ដោយសារឆ្នាំ២០២១-២០២៣នេះ ក្រសួងបានច្របាច់បញ្ចូលគ្នារវាងក្រុមកីឡាថ្នាល និងក្រុមកីឡាជម្រើសជាតិឈានទៅសម្រិតសម្រាំងជ្រើសរើសកីឡាករជម្រើសជាតិសរុប ៩៣៨នាក់ (កីឡាការិនី ៣៤៦នាក់) និងគ្រូបង្វឹក ១៧៦នាក់ ដែលមានគុណផលខ្ពស់ និងសីលធម៌ល្អ ព្រមទាំងអនុរក្សចំនួន៥២នាក់។ នេះជាការលើកឡើងរបស់លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡា ក្នុងពិធីសំណេះសំណាល និង សួរសុខទុក្ខក្រុមជម្រើសជាតិកម្ពុជា នៅពហុកីឡដ្ឋានជាតិមរតកតេជោ កាលពីល្ងាចថ្ងៃទី២២ ខែកុម្ភៈ ឆ្នាំ២០២៣
។
លោក ប៉ុន សុខ បានបញ្ជាក់ថា៖ «ក្រុមជម្រើសជាតិ ត្រូវបានរៀបចំឱ្យមានការហាត់ហ្វឹកហ្វឺន ក្នុងប្រទេសដូចជា នៅក្នុងពហុកីឡដ្ឋានជាតិមរតកតេជោ មាន៩ប្រភេទកីឡា ស្មើនឹង១៦២វិញ្ញាសា និងមានកីឡាករ កីឡាកាវិនីសរុប ១៦១ នាក់ គ្រូបង្វឹក ៣១នាក់ និងអនុរក្ស ០៨ នាក់ ចំណែកនៅក្នុងពហុកីឡដ្ឋានជាតិអូឡាំពិក មាន១៧ប្រភេទកីឡា ស្មើនឹង២៣០វិញ្ញាសា ហើយមានកីឡាករ កីឡាការិនីសរុប ៣០៩នាក់ គូ បង្វឹក ៦២នាក់ និងអនុរក្ស ១៧នាក់។ ចំពោះនៅតាមសហព័ន្ធកីឡាជាតិវិញ មាន១៤ប្រភេទកីឡា ស្មើនឹង១៨៦វិញ្ញាសា និងមានកីឡាករ កីឡាការិនីសរុប ២៨៣នាក់ គ្រូបង្វឹក ៦២នាក់ និងអនុរក្ស ១៤នាក់»។
ដោយឡែក សម្រាប់ការហាត់ហ្វឹកហ្វឺន នៅក្រៅប្រទេស មានកីឡាករ កីឡាការិនីសរុប ២២៦នាក់ ត្រូវបានបញ្ជូនឱ្យធ្វើការហាត់ហ្វឹកហ្វឺននៅក្រៅប្រទេស ដូចជា នៅសាធារណរដ្ឋប្រជាមានិតចិន មាន១២ប្រភេទកីឡា ស្មើនឹង៧៨វិញ្ញាសា ដោយមានកីឡាករ កីឡាកាវិនីសរុប ១៤១នាក់ និងគ្រូបង្វឹកចំនួន ១៣នាក់ គឺហាត់ហ្វឹកហ្វឺនរយៈពេល ០៤ខែ។ រីឯនៅសហរដ្ឋអាមេរិក មាន៦ប្រភេទកីឡា ដូចជា ជីជីតស៊ូ តេក្វាន់ដូ WT បាល់បោះ ហែលទឹកវាយ កូនបាល់ និងវាយកូនឃ្លីលើតុ មាន១៣វិញ្ញាសា កីឡាករ កីឡាការិនីសរុប ២៦នាក់ និងគ្រូបង្វឹក ០៤នាក់ ហាត់ហ្វឹកហ្វឺនរយៈពេល០៤ខែ។
ចំពោះនៅប្រទេសបារាំងវិញ មាន២ប្រភេទ គឺកីឡាតេក្វាន់ដូ WT និងទ្រីយ៉ាត្លុង មាន០៣វិញ្ញាសា កីឡាករសរុប ០៣នាក់ ហាត់ហ្វឹកហ្វឺនរយៈពេល ០៤ខែ និងនៅបណ្តាប្រទេសអាស៊ី រួមមាន ប្រទេសវៀតណាម ប្រទេសថៃ មីយ៉ាន់ម៉ា ប្រទេសអ៊ូបេគីស្ថាន ប្រទេសកាណាដា និងប្រទេសកូរ៉េខាងត្បូងជាដើម ដោយមាន៦៤វិញ្ញាសា កីឡាករកីឡាកាវិនីសរុប ៨៧នាក់ និងគ្រូបង្វឹក១៤នាក់ ហាត់ហ្វឹកហ្វឺនរយៈពេល០៤ខែ។
យ៉ាងណាមិញ សម្រាប់ការហាត់ហ្វឹកហ្វឺនក្រុមកីឡាជម្រើសជនពិការជាតិ សម្រាប់ចូលរួមប្រកួតកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ គឺក្រសួងអប់រំ យុវជន និងកីឡា បានសហការជាមួយគណៈកម្មាធិការជាតិប៉ារ៉ាឡាំពិកកម្ពុជា ក្នុងការជ្រើសរើសកីឡាករ កីឡាការិនីជនពិការ និងប្រមូលផ្តុំហាត់ហ្វឹកហ្វឺនរយៈពេល៥ខែ ចាប់ពីខែមករា រហូតដល់ខែឧសភា មានចំនួន ១៣ប្រភេទកីឡា ស្មើនឹង១០១វិញ្ញាសា និងមានកីឡាករកីឡាការិនីសរុប ១៦៥នាក់ គ្រូបង្វឹក ៣១នាក់ និងអនុរក្ស ១៦នាក់ ហើយត្រូវបានរៀបចំឱ្យហាត់ហ្វឹកហ្វឺននៅមជ្ឈមណ្ឌលជាតិនជនពិការតេជោសែន។
រៀបចំពិធីសំណេះសំណាល និង សួរសុខទុក្ខក្រុមជម្រើសជាតិកម្ពុជា នៅពហុកីឡដ្ឋានជាតិមរតកតេជោ កាលពីល្ងាចថ្ងៃទី២២ ខែកុម្ភៈ ឆ្នាំ២០២៣ គឺជាការបង្ហាញការយកចិត្តទុកដាក់ និងលើកទឹកចិត្តដល់ក្រុមជម្រើសជាតិ ដើម្បីត្រៀមប្រជែងមេដាយ ក្នុងការប្រកួតកីឡាស៊ីហ្គេម-អាស៊ានប៉ារ៉ាហ្គេម នាខែឧសភា និងខែមិថុនា ឆ្នាំ២០២៣ នៅកម្ពុជា៕