កីឡាចំនួន១៦ប្រភេទ ក្នុងចំណោម៣៧ប្រភេទកីឡា ដែលដាក់ឱ្យប្រកួត ក្នុងស៊ីហ្គេម ឆ្នាំ២០២៣នឹងត្រូវផលិតដោយអ្នកជំនាញការផលិតឯកទេសអន្តរជាតិ ដើម្បីពង្រឹងដល់ការផ្សព្វផ្សាយក្នុងព្រឹត្តិការណ៍ជាប្រវត្តិសាស្រ្ត លើកដំបូង នៅកម្ពុជានេះ។ ឯកឧត្ដម វ៉ាត់ ចំរើន ជាអគ្គលេខាធិការជាតិរៀបចំការប្រកួតកីឡា អាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) និងជាអគ្គលេខាធិការគណៈកម្មការជាតិអូឡាំពិកកម្ពុជា (NOCC) ក្នុងកិច្ចប្រជុំក្រុមការងារ លើបញ្ហាការរៀបចំ មជ្ឈមណ្ឌលផ្សព្វផ្សាយអន្តរជាតិ (IBC) ការផលិត និងផ្សព្វផ្សាយព្រឹត្តិការណ៍ការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ឆ្នាំ២០២៣កាលពីថ្ងៃទី១ ខែមីនា ឆ្នាំ២០២៣។
ឯកឧត្ដម បានមានប្រសាសន៍ថា៖ «រាល់កិច្ចប្រជុំ យើងតែងតែលើកឡើងនូវការប្រកាន់ភ្ជាប់ និងអនុវត្តឱ្យបានម៉ឺងម៉ាត់ជាទីបំផុត ចំពោះអនុសាសន៍ដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី គឺឱ្យប្រព័ន្ធផ្សព្វផ្សាយទាំងអស់ ធ្វើការផ្សព្វផ្សាយស៊ីហ្គេមនេះ ដោយសេរី គ្មានការចំណាយថវិកាអ្វីទាំងអស់ គឺយកប្រព័ន្ធផ្សព្វផ្សាយទាំងបរទេសផលិត និងខ្មែរយើងផលិត ទៅផ្សព្វផ្សាយដោយសេរី យើងបញ្ជូនឱ្យដោយហ្វ្រីតែម្ដង»។
ឯកឧត្ដម វ៉ាត់ ចំរើន បានបន្ថែមថា៖ «អ៊ីចឹងនៅក្នុងហ្នឹង យើងបានបែងចែកគ្នា គឺកីឡាចំនួន១៧ប្រភេទ នឹងត្រូវផលិតដោយអ្នកជំនាញ និងអ្នកឯកទេសអន្តរជាតិ ដើម្បីមានគុណភាពមួយ ដែលមានលក្ខណៈពិសេស ហើយធ្វើឱ្យអ្នកទស្សនាមើលឃើញហើយយល់ថា ការផលិតនេះ មានគុណភាព និងមានភាពទាក់ទាញខ្លាំង ចំពោះការទស្សនាកីឡា ព្រមទាំងប្រកបទៅដោយវិជ្ជាជីវៈកីឡា»។
ឯកឧត្ដម វ៉ាត់ ចំរើន បានឱ្យដឹងទៀតថា បន្ទាប់ពីបែងចែក១៦ប្រភេទកីឡា ទៅឱ្យអ្នកឯកទេសអន្តរជាតិ ដូច្នេះនៅសល់២១ប្រភេទកីឡាទៀត គឺឯកឧត្ដម ផុស សុវណ្ណ នឹងដឹកនាំក្នុងការបែងចែកទៅកាន់ស្ថានីយទូរទស្សន៍ផ្សេងៗ ឱ្យចូលរួមជួយផលិត។ បន្ទាប់ពីធ្វើការបែងចែក និងស្វែងរកចំណុចខ្វះខាតកម្ពុជាក៏សម្រេចបាននូវលទ្ធផលល្អមួយ គឺការស្រុះស្រួលគ្នា ក្នុងការជួយជ្រោមជ្រែងពីសំណាក់អ្នកពាក់ព័ន្ធ ដើម្បីបំផ្ទុះព្រឹត្តិការណ៍ដ៏អស្ចារ្យជាប្រវត្តិសាស្ត្រ គឺស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះលើកដំបូងនេះ។
អគ្គលេខាធិការ CAMSOC រូបនេះ បានបន្ថែមទៀតថា មជ្ឈមណ្ឌលផ្សាយផ្ទាល់ IBC នឹងចាប់ផ្ដើមទទួលការងាររៀបចំ និងការងារផ្សព្វផ្សាយនេះ ចាប់ពីថ្ងៃទី១៥ ខែមេសា ឆ្នាំ២០២៣ តទៅ ហើយការផ្សាយផ្ទាល់ដំបូងគេ នឹងធ្វើឡើង នៅពហុកីឡដ្ឋានជាតិ នាថ្ងៃទី២៩ ខែមេសា គឺការប្រកាសបើកការប្រកួតកីឡាបាល់ទាត់ដំបូងគេ៕
ប្រែសម្រួលពី៖ Cambodia 2023