បទចម្រៀង «จองบานเนียง» ប្រែនិងសរសេរជាភាសាខ្មែរ «ចង់បាននាង» របស់ក្រុមចម្រៀងបុរស Phnom Penh Boy មិនត្រឹមតែល្បីនិងមានអ្នកគាំទ្រចាក់ស្ដាប់កម្សាន្តច្រើននៅប្រទេសថៃនោះទេ សូម្បីតែប្រទេសកម្ពុជាក៏ល្បីខ្លាំងដូចគ្នា យ៉ាងណាមិញមានមនុស្សមិនច្រើនទេដឹងថា ក្រុម Phnom Penh Boy ដែលច្រៀងបទចម្រៀងភាសាថៃឥសានបានយ៉ាងច្បាស់ដូចជាសំនៀងដើមខ្លួននោះ ការពិតមានសមាជិក ៣នាក់គឺជាកូនខ្មែរសុទ្ធសាធ និងមានសមាជិកតែម្នាក់ប៉ុណ្ណោះដែលជាជនជាតិថៃ។
កែវ (Kaew) តារា Tik Tok មានអ្នក Follow ជាង ៣លាន កំពុងតែល្បីល្បាញទាំងនៅប្រទេសថៃនិងប្រទេសកម្ពុជា និងសមាជិក ៣រូបទៀត បានបង្កើតជាក្រុមចម្រៀងមួយមានឈ្មោះថា Phnom Penh Boy ហើយបានចេញបទចម្រៀងជាភាសាថៃមួយមានចំណងជើងថា «ចង់បាននាង» ជាមួយនឹងសំនៀងជាភាសាថៃ ច្បាស់ល្អ បានធ្វើឱ្យប្រជាជនខ្មែរយល់ច្រឡំថា សមាជិកក្រុម Phnom Penh Boy (ភ្នំពេញប៊យ) ជាជនជាតិថៃទាំងអស់លើកលែងតែ កែវ មួយដែលគ្រប់គ្នាដឹងច្បាស់ថាលោកគឺជាជនជាតិខ្មែរ។
ចំណែកប្រជាជនថៃឯណោះវិញ ក៏មានភាន់ច្រឡំដូចគ្នា ដោយសារតែក្រុមនេះមានឈ្មោះថា Phnom Penh Boy (កំលោះភ្នំពេញ) ព្រមទាំងការបកស្រាយបទចម្រៀង សំនៀងភាសាថៃភាគឥសានបានល្អទៀតនោះ ធ្វើឱ្យនឹកស្មានថាក្រុមចម្រៀងនេះសុទ្ធតែជាជនជាតិថៃ មានតែ កែវ ម្នាក់គត់គឺជាជនជាតិខ្មែរ។
សូមបញ្ជាក់ថា Phnom Penh Boy មានសមាជិក៤ រូប ក្នុងនោះមានជនជាតិខ្មែរ៣ រូប និងជនជាតិថៃ ១រូប សមាជិកជនជាតិខ្មែរមាន កែវ ជៀប និង ថយ ចំណែកសមាជិកជនជាតិថៃគឺឈ្មោះ ចយ (កូចយ)។ បទចម្រៀងរបស់ក្រុម Phnom Penh Boy បច្ចុប្បន្នត្រូវបាន Channel youtube ជាច្រើនយកទៅធ្វើ Reaction ហើយទទួលបានការសរសើរយ៉ាងច្រើន ពីសមត្ថភាពច្រៀងរបស់កំលោះខ្មែរទាំង៣ រូបដែលអាចច្រៀងជាភាសាថៃឥសានបានយ៉ាងច្បាស់ បើមិនប្រាប់ថាជាជនជាតិខ្មែរ គឺស្ដាប់មិនដឹងនោះទេ៕
ចង់ដឹងថា «ចង់បាននាង» ពីរោះនិងមានចំណុចគួរឱ្យទាក់ទាញខ្លាំងយ៉ាងណានោះសូមទស្សនាវីដេអូខាងក្រោម៖
