ការប្រកួតពានរង្វាន់បាល់ទាត់មហាជនប្រចាំស្រុកល្វាឯម ឆ្នាំ២០២៣ បានដំណើរការហើយ នៅល្ងាចថ្ងៃអាទិត្យ ទី៥ ខែមីនា ឆ្នាំ២០២៣ ថ្មីៗនេះនៅក្នុងស្រុកល្វាឯម ខេត្តកណ្តាល។
នៅក្នុងកម្មពិធីនៃការប្រកួតពានរង្វាន់មហាជនស្រុកល្វាឯម ឆ្នាំ២០២៣ នេះផងដែល ក៏មានការអញ្ជើញចូលរួមទស្សនាពីសំណាក់ឯកឧត្តម ហាក់ សុខមករា អភិបាលរងខេត្តកណ្តាល ឯកឧត្តម ស៉ិន សុគង់ អនុរដ្ឋលេខាធិការ ក្រសួងសាធារណការ និងដឹកជញ្ជូន រួមជាមួយ ឯកឧត្តម យ៉េន សុភ័ណ អគ្គនាយករង នៃអគ្គនាយកដ្ឋានដោះស្រាយផលប៉ះពាល់ នៃក្រសួងសេដ្ឋកិច្ច និងហិរញ្ញវត្ថុ និងលោកបណ្ឌិត កន សុខកាយ អភិបាល នៃគណៈអភិបាលស្រុកល្វាឯម។
ប្រកួតបើកឆាកនេះដែរ ក្រុមបាល់ទាត់យុវជនឃុំសារិការកែវ បានយកឈ្នះលើក្រុម បាល់ទាត់យុវជនអធិរាជជ្រោយពិសី ដោយលទ្ធផល ១-០ ពេញ ៩០នាទី ខណៈ១គ្រាប់របស់ក្រុមសារិការកែវ រកបានដោយកីឡាករពាក់អាវលេខ៩ សរ កំសាន នៅនាទីទី២៣។
គណៈកម្មការរៀបចំការប្រកួតបានបញ្ជាក់ថាគោលបំណងក្នុងការរៀបចំព្រឹត្តិការណ៍នេះឡើង ដើម្បីឲ្យយុវជនក្នុងស្រុកបានលេងកីឡាដើម្បីសុខភាព សាមគ្គីភាព មិត្តភាព និងជៀសឆ្ងាយពីគ្រឿងញៀន ជាពិសេសជួយឲ្យវិស័យកីឡាក្នុងស្រុកបានរីកចម្រើនខ្លាំងទៅថ្ងៃអនាគត់ ស្របពេលដែលកម្ពុជាត្រៀមទទួលធ្វើជាម្ចាស់ផ្ទះ នៃព្រឹត្តិការណ៍អាស៊ីអាគ្នេយ៍ លើកទី៣២ ឆ្នាំ២០២៣។
គួររំលឹកថា ក្រុមបាល់ទាត់អធិរាជជ្រោយពិសី ធ្លាប់បានគ្រងជើងឯកពានរង្វាន់បាល់ទាត់ប្រចាំឆ្នាំ២០២២ កន្លងទៅបន្ទាប់ពីបានយកឈ្នះ លើក្រុមយុវជនឃុំអរិយ៍ក្សត្រ ដោយលទ្ធផល ២-០ នៅវគ្គផ្តាច់ព្រ័ត្រ ធ្វើឲ្យអធិរាជជ្រោយពិសី គ្រោងជើងឯកប្រចាំឆ្នាំ២០២២ អមដោយទឹកប្រាក់ ១០លានរៀល៕
