ស្ដេចប្រដាល់ Manny Pacquiao របស់ហ្វីលីពីន ដែលមានឈ្មោះក្នុងជួររដ្ឋាភិបាលផងនោះ បានតំណាងប្រទេសរបស់ខ្លួនចូលរួមកិច្ចប្រជុំពិភាក្សាតុមូល ជាមួយថ្នាក់ដឹកនាំគណបក្សនយោបាយនៃបណ្តាប្រទេសអាស៊ាន-រុស្ស៊ី ក្រោមប្រធានបទ«តួនាទីនៃកម្លាំងគណបក្សរុស្ស៊ី និងអាស៊ាន ប្រកបដោយការទទួលខុសត្រូវក្នុងការពង្រឹងស្ថាបន្យកម្ម សន្តិសុខ និងកិច្ចសហប្រតិបត្តិការនៅក្នុងតំបន់អាស៊ីប៉ាស៊ីហ្វីក ក្នុងឱកាស២៥ឆ្នាំដៃគូ»។
តំណាងឱ្យប្រជាធិបតីលោក Rodrigo Duterte អ្នកប្រដាល់ Manny Pacquiao ដែលជាប្រធានគណបក្ស PDP-Laban (Partido Demokratiko Pilipino–Lakas ng Bayan) បានចូលរួមប្រជុំជាមួយថ្នាក់ដឹកនាំប្រធាន និងតំណាងគណបក្សមកពីបណ្តាប្រទេសអាស៊ាន និងរុស្ស៊ី។
ជាមួយគ្នានេះដែរនាយករដ្ឋមន្រ្តីនៃព្រះរាជាណាចក្រកម្ពុជា សម្តេច ហ៊ុន សែន និងជាប្រធានគណបក្សប្រជាជនកម្ពុជា តំណាងឱ្យកម្ពុជា បានស្វាគមន៍ចំពោះវត្តមានរបស់ Manny Pacquiao ដែលចាត់ទុកថាមិនត្រឹមតែជាអ្នកជោកជ័យក្នុងវិស័យកីឡានោះទេ ថែមទាំងជោគជ័យក្នុងវិស័យនយោបាយទៀតផង។
កិច្ចប្រជុំនេះមានផ្សាយផ្ទាល់នៅលើទំព័រហ្វេសប៊ុកផ្លូវការរបស់សម្តេចតេជោ ហ៊ុន សែន ក្នុងរសៀលថ្ងៃអង្គារ ទី២៩ ខែមិថុនា ឆ្នាំ២០២១ ផងដែរ៕