«បេះដូងឌឹបៗ» របស់តារាចម្រៀងខ្មែរ-អាមរិកកាំង Jay Chan បានចេញនៅលើ Channel YouTube បានបង្ហោះចេញឱ្យអ្នកគាំទ្របានស្ដាប់កម្សាន្តហើយ ប៉ុន្តែសន្ទុះគាំទ្រហាក់មិនទាន់ខ្លាំងក្លានោះឡើយទាំងដែលបទចម្រៀងនេះស្ដាប់ទៅមានរសជាតិខ្មែរ តែក៏លាយបង្កប់ដោយចង្វាក់តន្ត្រីបែបទាន់សម័យ កាន់តែស្ដាប់កាន់តែពីរោះ គួរឱ្យចង់ច្រៀងនិងរាំតាម។
តារាចម្រៀងខ្មែរ អាមេរិកកាំង ដែលធ្លាប់បញ្ចេញស្នាដៃបទចម្រៀងជាច្រើនដែលភាគច្រើនជាបទ Cover ពីអធិរាជសំឡេងមាស ស៊ិន ស៊ីសាមុត លោក Jay Chan កាលពីថ្ងៃទី២៨ ខែមិថុនា ឆ្នាំ២០២១ បានបង្ហោះចេញបទចម្រៀងថ្មី «បេះដូងឌឹបៗ» របស់លោកលើ Channel យូធូបរបស់លោក ហើយនៅថ្ងៃទី ២៩ ខែមិថុនា លោកបានចាប់ផ្ដើមធ្វើការបង្ហោះផ្សព្វផ្សាយបទចម្រៀងរបស់លោកតាមរយៈ Facebook ដែលមានឈ្មោះថា Jay Chan Muzix។
ប៉ុន្តែបទចម្រៀងដែលទាន់សម័យបច្ចេកទេស រូបភាពច្បាស់ សំឡេងក៏ល្អ ហើយបង្កប់ទៅដោយដួងព្រលឹងខ្មែរមួយនេះហាក់នៅមិនទាន់មានការគាំទ្របានយ៉ាងច្រើន ឱ្យសមនឹងបទចម្រៀងភាពល្អនិងលេចធ្លោមួយនេះនោះទេ ព្រោះមកដល់ត្រឹមថ្ងៃទី១ ខែកក្កដា ឆ្នាំ ២០២១ នេះ នៅលើ Channel YouTube របស់លោកមានចំនួនទស្សនាមិនទាន់ដល់ ១០K នោះទេ។
លោក Jay Chan កូនខ្មែរអាមេរិកកាំង ដែលកំពុងរស់នៅសហរដ្ឋអាមេរិក គឺជាអ្នកនិពន្ធ អ្នកចម្រៀង(R&B/POP) ផលិតករ ដឹកនាំ និងជាស្ថាបនិកផលិតកម្ម G.O.A.T Entertainment កន្លងមកបានបញ្ចេញនូវស្នាដៃបទចម្រៀងទាំងតែងនិពន្ធខ្លួនឯង និងលើកយកបទចម្រៀងរបស់លោកតា ស៊ិន ស៊ីសាមុត មកបកស្រាយឡើងវិញតាមបែប Style របស់លោកបានពីរោះ ទាក់ទាញមួយបែបទៀត៕
សម្រាប់ប្រិយមិត្តដែលមិនទាន់បានទស្សនាបទចម្រៀង «បេះដូងឌឹបៗ» អាចទស្សនាវីដេអូខាងក្រោម៖
