សិល្បៈជាតិ៖ បញ្ហាការស្លៀកពាក់របស់លោក ឯម រាម នៅក្នុងកម្មវិធី PMA 2023 នៅតែជាប្រធានបទក្ដៅ បន្តអូសបន្លាយពេលដល់ថ្ងៃទី 22 ខែមីនា ឆ្នាំ ២០២៣ នេះ ដោយក្នុងនោះមហាជន និងតារាសិល្បៈចូលរួមបញ្ចេញមតិបន្តបន្ទាប់បង្ហាញពីជំហរគាំទ្រ និងរិះគន់។
ស្រាប់តែថ្មីៗនេះ លោក ឯម រាម បានចេញមកបង្ហោះសារក្ដៅចិត្តជាលើកទីមួយ នៅលើបណ្ដាញសង្គមហ្វេសប៊ុក បន្ទាប់ពីសំងំមិនតបតចាប់តាំងផ្ដើមផ្ទុះការរិះគន់ដំបូងមកម្ល៉េះ។ លោក ឯម រាម បង្ហោះវីដេអូខ្លីបង្ហាញពីសកម្មភាពរបស់ អាចារ្យធំ ដែលបានប្រើសម្ដីជេរប្រមាថចំពោះគាំទ្រ និងការពារលោក។ ក្នុងនោះ លោក ឯម រាម ក៏បានអំពាវនាវឱ្យមានចំណាត់ការផ្លូវច្បាប់ចំពោះបុគ្គលឈ្មោះ អាចារ្យធំ ផងដែរ។
លោក ឯម រាម បានរៀបរាប់នៅលើហ្វេសប៊ុកផ្ទាល់ខ្លួនរបស់លោកថា ៖ «ខ្ញុំនៅតែឆ្ងល់ហេតុអ្វីតាមព្យាបាទអ្នកដែរគាំទ្រ និងការពារខ្ញុំ នេះសបញ្ជាក់ថាមិនមែនរិះគន់ក្នុងនៃស្ថាបនាទេ គឺក្នុងន័យគុំគួន និងញុះញង់ ថាមិនត្រូវខ្ញុំអាចបាក់ទឹកចិត្ត ហើយគិតខ្លី ព្រោះការអត់ធ្មត់ និងភាពរឹងមាំរបស់ខ្ញុំគឺមានកំរិត ថាមិនត្រូវខ្ញុំអាចគិតខ្លីហើយសូមផ្តាំបងប្អូនថា បើខ្ញុំយ៉ាងណាគឺពួកគាត់នេះហើយ និងសូមឱ្យមានច្បាប់ ចំពោះអ្នកដែលរិះគន់តាមអារម្មណ៍ ដោយគ្មានការសិក្សាពិចារណា…»។
សូមជម្រាបថា ឯកឧត្តម ជុំ កុសល រដ្ឋលេខាធិការក្រសួងព័ត៌មាន បានបញ្ចេញមតិគាំទ្របែបនេះថា ៖ «បើតាមខ្ញុំធ្លាប់ស្តាប់ គាត់ផ្តល់កិច្ចសម្ភាសន៍កន្លងមក គាត់គឺជាអ្នករៀនជំនាញច្នៃម៉ូតបែបស្រមើស្រមៃមកពីប្រទេសបារាំង។ ការច្នៃបែបស្រមើស្រមៃនេះ គឺច្នៃតាមអារម្មណ៍ស្រមើស្រមៃរបស់ខ្លួនដោយមិនចម្លងពីគេ។ ឃើញគាត់ស្លៀកពាក់បែបនេះ ខ្ញុំឃើញបងប្អូនយើងមួយចំនួននាំគ្នាស្តីជេរគាត់ តែធាតុពិតគាត់ធ្វើបែបនេះគឺជាការបង្ហាញជំនាញរបស់គាត់ ដែលនៅកម្ពុជាយើងគ្មាននរណាអាចធ្វើបានដូចគាត់ទេ។ សូមឈ្វេងយល់ឱ្យច្បាស់អំពីសិល្បៈវប្បធម៌ និងការច្នៃម៉ូតបែបស្រមើស្រមៃ។ នៅអឺរ៉ុបគេស្លៀកប្លែកជាងនេះខ្លាំងណាស់។ ខ្ញុំសូមអធ្យាស្រ័យ មិនការពារគាត់ទេ គ្រាន់តែសុំឱ្យបងប្អូនសិក្សាឈ្វេងយល់និងបែងចែកឱ្យច្បាស់មុននឹងប្រតិកម្ម»។
តារាចម្រៀង អ៊ាម វន្នី បានបញ្ចេញមតិគាំទ្រថា៖ «បងប្រុសធ្វើល្អបានច្រើនហើយ តែការខុសឆ្គងគង់គេចមិនផុតឡើយ ព្រោះយើងធ្វើឱ្យមហាជនមើល។ រូបប្រុសបីនាក់ខាងស្តាំ គេបញ្ចេញដើមទ្រូងដោយភាពអង់អាចជាបុរស មើលទៅមិនទាស់ភ្នែកទេ តែបងខុសប្លែកពីគេ ដោយបង្ហាញដើមទ្រូង តែប្រលែងខោ ពាក់ស្រោមបា និង ស្រោមជើងបែបមនុស្សស្រី ទើបមើលទៅមហាជនទាស់ភ្នែក ព្រោះបើខាងក្រោមបែបទំនោរស្ទីលមនុស្សស្រី ខាងលើមិនគួរបង្ហាញទ្រូងទេ នេះជាមូលហេតុនៃបញ្ហា។ សង្ឃឹមថាការរិះគន់ទាំងឡាយដើម្បីការស្ថាបនា គឺមិនមែនជាន់ពន្លិចក្នុងនាមប្រជាជនខ្មែរតែមួយដូចគ្នា»។
តារាចម្រៀង ម៉ា ច័ន្ទបញ្ញា បានបញ្ចេញមតិគាំទ្របែបនេះ ៖«សម្រាប់ខ្ញុំផ្ទាល់ ខ្ញុំយល់ថា បង ឯម រៀម មិនបានធ្វើអីឱ្យប៉ះពាល់ដល់វប្បធម៌ជាតិទេ។ គាត់មិនបានធ្វើអោយនរណាម្នាក់ស្អប់ខ្មែរទេ គឺមានតែ អ្នកដែលតែងតែស្អប់ស្រាប់។ គាត់បង្កើតថ្មី ដោយឥទ្ធិពលនៃគំនិតចាស់របស់ខ្មែរពីដើម (Inspired by Khmer ancient) ពុំបាន ប្រើប្រាស់ការកែច្នៃពីប្រទេសជិតខាងហើយ ហៅថា ជារបស់ខ្មែរផង។ ភ្ញាក់ឡើងអ្វីដែលគួរអោយខ្លាច និងប៉ះពាល់ពិតប្រាកដ មិនមែនការតុបតែងខ្លួនរបស់គាត់ទេ គឺ អ្វីដែលគ្រប់គ្នាយល់ច្រឡំថាជារបស់ខ្លួនហើយប្រឹងផ្សព្វផ្សាយនេះឯង។ បងរាម តស៊ូបង! សិល្បៈគឺជាធម្មជាតិរបស់មនុស្ស មិនមែនជាកំហុសរបស់នរណាម្នាក់ទេ។ បងជាសិល្បករគឺតែងតែត្រូវការការយល់ស្របពីមហាជន តែពុំបានន័យថាបងខុសទេ។ បងមិនមែនជាសិប្បករដែល អ្នកទិញកុម្ម៉ងបង អោយកែនោះទេ តែបងជាអ្នកធ្វើដែល មហាជន និងអ្នកគាំទ្រជាអ្នកពិចារណា»។
ក្រៅពីនោះ ក៏មានតារាសិល្បៈមួយចំនួនបានបង្ហាញមតិគាំទ្រចំពោះជំនាញច្នៃម៉ូដរបស់លោក ឯម រាម ផងដែរ។ ចុះអ្នកវិញ យល់យ៉ាងណាចំពោះបញ្ហានេះ?
