ខ្សែប្រយុទ្ធ Ayo Akinola វ័យ២១ឆ្នាំ ដែលបង្ហាញខ្លួនឱ្យក្រុមបាល់ទាត់ជម្រើសជាតិអាមេរិក តាំងពីឈុតយុវជនក្រោមអាយុ១៥ឆ្នាំ កាលពីឆ្នាំ២០១៥ រហូតដល់តំឡើងឱ្យចូលលេងក្នុងឈុតធំឆ្នាំ២០២០ កន្លងមកនេះ បានសម្រេចជ្រើសរើសយកសញ្ជាតិកាណាដា វិញ។
បើតាមការចេញផ្សាយរបស់វិបសាយលីគកំពូលអាមេរិក mlssoccer.com លើកឡើងថាកីឡាករដែលកំពុងប្រកបអាជីពនៅក្លិប Toronto FC របស់កាណដា សមាជិកលីគកំពូលអាមេរិក Major League Soccer រូបនេះធ្លាប់មានឈ្មោះលេងឱ្យក្រុមជម្រើសជាតិនីហ្សេរីយ៉ា និងអាមេរិក មុនជ្រើសរើសយកកាណាដា។
Ayo Akinola 🍁 #CANMNT 🔥 pic.twitter.com/DNoyXuvqXu
— Canada Soccer (@CanadaSoccerEN) June 30, 2021
សហព័ន្ធកីឡាបាល់ទាត់អន្តរជាតិ FIFA បានយល់ព្រមការប្តូរសញ្ជាតិរបស់ Ayo Akinola លើកទី១ ដោយចូលរួមក្នុងក្រុមជម្រើសជាតិអាមេរិក ពីថ្នាក់យុវជននិងតំឡើងចូលឈុតធំកាលពីឆ្នាំមុន។ រូបគេត្រូវបានអញ្ជើញទៅប្រទេសកាណាដា អំឡុងពេលដែលក្រុមខ្លួនបោះជុំរុំហ្វឹកហាត់នៅឆ្នាំនេះ ហើយរូបគេបានសម្រេចចិត្តនៅខែមិថុនា កន្លងទៅក្រោយវគ្គជម្រុះពានរង្វាន់ជើងឯកពិភពលោក 2022 FIFA World Cup Qatar បើកទ្វាបន្ថែមកីឡាករ។
«ខ្ញុំពិតជារីករាយខ្លាំងមែនទែន ដែលបានបង្ហាញខ្លួនជាមួយក្រុមជម្រើសជាតិកាណាដា ក្នុងកម្រិតអន្តរជាតិ។ កាណាដា ជាផ្ទះរបស់ខ្ញុំស្ទើរតែមួយជីវិតរបស់ខ្ញុំទៅហើយ។ ខ្ញុំពិតរំភើបណាដែលបានទទួលសញ្ជាតិ។ ខ្ញុំបានត្រៀមខ្លួនរួចហើយ និងនឹងព្យាយាមឱ្យបានល្អសម្រាប់ក្រុមបាល់ទាត់ជម្រើសជាតិកាណាដា ក្នុងបេសកកម្មខាងមុខ»។ ខ្សែប្រយុទ្ធ Ayo Akinola លើកឡើង។
កីឡាកររូបនេះកើតនៅទីក្រុង Detroit ព្រំប្រទល់អាមេរិក-កាណដា ហើយបានផ្លាស់ប្តូរទៅនៅទីក្រុង Ontarioប្រទេសកាណាដា វិញពេលគេមានអាយុ១ខួបរហូតដល់ធំឡើងចូលហ្វឹកហាត់ក្នុងយុវជនថ្នាលក្លិបBrampton East និងបន្តទៅក្លិប Toronto មុនបង្ហាញខ្លួនក្នុងឈុតធំរបស់ក្លិបនៅឆ្នាំ២០១៨។ ឪពុកម្ដាយរបស់ Ayo Akinola ជាជនជាតិនីហ្សេរីយ៉ា ហើយរូបគេមានជម្រើសលេងឱ្យប្រទេសនៅទ្វីបអាហ្វ្រិកមួយនេះ។ កាលពីឆ្នាំ២០១៩ រូបគេធ្លាប់លើកឡើងថាសហព័ន្ធកីឡាបាល់ទាត់នីហ្សេរីយ៉ា បានទាក់ទងរូបគេឱ្យចូលរួមក្នុងពានរង្វាន់ 2017 FIFA U-17 World Cup។
អត្ថបទពាក់ព័័ន្ធ៖ជម្រុះ World Cup៖កាណាដា,ប៉ាណាម៉ា និងអែលសាល់វាឌ័រ ឡើងជុំផ្ដាច់ព្រ័ត្រតំបន់ CONCACAF
ជាមួយគ្នានេះដែរលោក John Herdman គ្រូបង្វឹកក្រុមជម្រើសជាតិកាណាដា បានលើកឡើងថា៖«ពួកយើងបានធ្វើការរួមគ្នាក្នុងរយៈពេល១៨ខែចុងក្រោយក្នុងការនាំយក Ayo Akinola មកក្នុងជម្រើសជាតិ។ ខ្ញុំកំពុងសង្កេតមើលគាត់ក្នុងការសម្របខ្លួន ជាមួយបរិយាកាសរបស់ក្រុមជម្រើសជាតិយើង»។
កីឡាករ Ayo Akinola នឹងបង្ហាញខ្លួនជាមួយក្រុមជម្រើសជាតិកាណដា ក្នុងពានរង្វាន់ជើងឯកទ្វីបអាមេរិកខាងជើង CONCACAF Gold Cup ចន្លោះពីថ្ងៃទី១០ ខែកក្កដា ដល់ថ្ងៃទី១ ខែសីហា ឆ្នាំ២០២១ ដោយមាន១៦ក្រុមចូលរួម ហើយកាណាដា ស្ថិតនៅក្នុងពូល B ជាមួយអាមេរិក, Martinique និងអ្នកឈ្នះនៅវគ្គជម្រុះ១ក្រុមទៀត៕