សហព័ន្ធកីឡាវ៉ូវីណាមកម្ពុជា សហការណ៍ជាមួយសហព័ន្ធកីឡាវ៉ូវីណាមអាស៊ីអាគ្នេយ៍ បានរៀបចំការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៦ The 6th Southeast Asian Vovinam Championships មានចំនួន ៧ប្រទេសចូលរួម ចាប់ថ្ងៃទី២៥ ដល់ថ្ងៃទី៣០ ខែមីនា ឆ្នាំ២០២៣ នៅសាលប្រជុំធំ នៃគណៈកម្មាធិកាជាតិអូឡាំពិកកម្ពុជា។
គិតត្រឹមថ្ងៃទី២៧ ខែមីនា កម្ពុជាឈរលំដាប់ទី១ ដោយឈ្នះមេដាយសរុប៩ មេដាយមាស៥ ប្រាក់២ និងសំរឹទ្ធ២ ពីការប្រកួតកីឡាវ៉ូវីណាមជ្រើសរើសជើងឯកអាសុីអាគ្នេយ៍ លើកទី៦ ឆ្នាំ២០២៣ នៅកម្ពុជា។
កីឡាករ លី បូរ៉ាមី ឈ្នះមេដាយមាស១ និងជាមេដាយមាសដំបូងក្នុងការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៦ ឆ្នាំ២០២៣ លើប្រភេទវិញ្ញាសា មេគុនសម្តែង
អត្តពលិកកីឡាវ៉ូវីណាមកម្ពុជា ឈ្នះមេដាយប្រាក់១ ធ្វើបានដោយកីឡាការិនី ប៉ាល់ ឆរស្ម៊ី, កីឡករ ម៉េត សុភត្រា, ជ្រិន ប៊ុនឡុង និងប្រាក់ សុវណ្ណនី លើវិញ្ញាសាសម្តែងក្រុម នារី១ បុរស៣នាក់ មានអាវុធ
កីឡាករ សៀន ចាន់ហួត ឈ្នះមេដាយមាស១ លើវិញ្ញាសា មេគុនដំបងបុរស(ឯកត្តជន) ដែលបញ្ចប់ក្នុងលទ្ធផលពិន្ទុ២៧០
អត្តពលិកកីឡាវ៉ូវីណាម ឈ្នះមេដាយមាស១ លើវិញ្ញាសាមេគុនដាវបុរស ៤នាក់ (ក្រុម) ធ្វើបានដោយកីឡាករ ម៉េត សារី, ម៉ែន សុខវិច្ឆិកា, អ៊ឹម លាំងឈុង នីទីស្សា
ការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៦ ឆ្នាំ២០២៣ គឺជាព្រឹត្តិការណ៍កីឡាអន្ដរជាតិសំខាន់សម្រាប់កម្ពុជា ក្នុងការកសាងសមត្ថភាព ទេពកោសល្យ និងជំនាញវិជ្ជាជីរៈរបស់កីឡាករ-កីឡាការិនីកម្ពុជា ដើម្បីត្រៀមខ្លួនជាស្រេចសម្រាប់ការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។
គួរបញ្ជាក់ថា ព្រឹត្តិការណ៍ស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះ គ្រោងនឹងចាប់ផ្ដើមនៅថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ និងការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នឹងចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣៕
