យោងតាមការបញ្ជាក់របស់ សហព័ន្ធកីឡាបាល់ទាត់កម្ពុជា នៅព្រឹកថ្ងៃទី៣០ ខែមីនា បានឲ្យដឹងថាការចាប់ឆ្នោតវគ្គចែកពូលនៃការប្រកួត ក្នុងព្រឹត្តិការណ៍កីឡាសុីហ្គេម ឆ្នាំ២០២៣ វិញ្ញាសាបាល់ទាត់បុរស និងបាល់ទាត់នារី នឹងធ្វេីឡេីងនៅថ្ងៃទី៥ ខែមេសា ឆ្នាំ២០២៣ នៅពហុកីឡដ្ឋានជាតិមរតកតេជោ។
ចំពោះកម្មវិធីនេះនឹងមានផ្សាយផ្ទាល់តាមរយ: BTV Cambodia និងនៅលើផេកផ្លូវការរបស់សហព័ន្ធកីឡាបាល់ទាត់កម្ពុជា វេលាម៉ោង ៥:០០នាទីរសៀល។
សម្រាប់វិញ្ញាសាបាល់ទាត់ នឹងត្រូវចាប់ផ្ដើមការប្រកួតពីថ្ងៃទី២៩ ខែមេសា តទៅ ពោលគឺមុនពិធីបើកការប្រកួតកីឡាស៊ីហ្គេម លើកទី៣២ នៅកម្ពុជាជាផ្លូវការ ដែលនឹងប្រព្រឹត្តទៅ នាថ្ងៃទី៥ ខែឧសភា ឆ្នាំ២០២៣ ខាងមុខ។
ក្នុងនោះគណ:កម្មការរៀបចំការប្រកួតកីឡាអាស៊ីអាគ្នេយ៍ ក៏បានអនុញ្ញាតសហព័ន្ធកីឡាបាល់ទាត់កម្ពុជា ឲ្យប្រើប្រាស់ឯកសណ្ឋានកីឡារបស់សហព័ន្ធផ្ទាល់ VARAMAN (វរ្ម័ន) ក្នុងការប្រកួតកីឡាស៊ីហ្គេមលើកទី៣២ ឆ្នាំ២០២៣។
ហេតុដូច្នេះ ក្នុងការប្រកួតវិញ្ញាសារបាល់ទាត់ ក្រុមជម្រើសជាតិកម្ពុជាទាំង២ក្រុម ពោលគឺក្រុមបុរស និងក្រុមនារី នឹងប្រើប្រាស់ឯកសណ្ឋានដែលផលិត និងផ្គត់ផ្គង់ដោយក្រុមហ៊ុន VARAMAN (វរ្ម័ន) នៃ Collection ២០២២-២០២៤ ដែលកំពុងប្រើប្រាស់ក្នុងពេលបច្ចុប្បន្ននេះ រួមមានដូចជា ឯកសណ្ឋានធ្វើដំណើរ ឯកសណ្ឋានហ្វឹកហាត់ និងឯកសណ្ឋានការប្រកួត។
VARAMAN (វរ្ម័ន) គឺជាម៉ាកក្នុងស្រុកថ្មី បង្កើតឡើងជាមួយគោលបំណង ចង់ឱ្យក្រុមជម្រើសជាតិកម្ពុជាប្រើប្រាស់ឯកសណ្ឋានដែលរចនា និងផលិតនៅក្នុងព្រះរាជាណាចក្រកម្ពុជា ជាផលិតផលដែលផលិតដោយដៃបងប្អូនខ្មែរយើងផ្ទាល់ ដើម្បីប្រើប្រាស់ក្នុងពេលប្រកួតប្រជែងលើឆាកអន្តរជាតិ។
សហព័ន្ធកីឡាបាល់ទាត់កម្ពុជា បានថ្លែងអំណរយ៉ាងជ្រាលជ្រៅជាទីបំផុតចំពោះ សម្ដេចពិជ័យសេនា ទា បាញ់ ឧបនាយករដ្ឋមន្រ្តី រដ្ឋមន្រ្តីការពារជាតិ និងជាប្រធានគណ:កម្មការធិការជាតិ CAMSOC ដែលបានឯកភាពផ្ដល់សិទ្ធិឲ្យសហព័ន្ធបាល់ទាត់ បានប្រើប្រាស់នូវសម្ភារ:ឬ ឯក សណ្ឋានផ្ទាល់ខ្លួន ដែលជាផលិតផលស្នាដៃរបស់ខ្មែរ ដើម្បីបង្ហាញពីអត្តសញ្ញាណជាតិយើង នៅក្នុងព្រឹត្តិការណ៍ប្រវត្តិសាស្រ្ត ដែលកម្ពុជាធ្វើជាម្ចាស់ផ្ទះលើកដំបូង។
សូមរំលឹកថា មុនប្រកាសជាផ្លូវការនេះ កាលពីថ្ងៃទី២៣ ខែមីនា ឆ្នាំ២០២៣ ក្រុមហ៊ុន Varaman (វរ្ម័ន) បានប្រកាសថាក្រុមជម្រើសជាតិកម្ពុជាទាំងក្រុមបាល់ទាត់បុរស និងនារី នឹងប្រើឯកសណ្ឋានផលិតដោយ Varaman (វរ្ម័ន) សម្រាប់ការប្រកួតក្នុងព្រឹត្តិការណ៍កីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ៕