ព្រឹត្តិការណ៍ជាប្រវត្តិសាស្ត្រ ដែលកម្ពុជា ទទួលរៀបចំធ្វើជាម្ចាស់លើកដំបូងក្នុងរយ:ពេល ៦៤ឆ្នាំ គឺការប្រកួតកីឡាស៊ីហ្គេម លើកទី៣២ ដែលក្នុងនោះសម្រាប់វិញ្ញាសាបាល់ទះក្នុងសាល នឹងក្រុមចូលរួមចំនួន ៧ប្រទេស តែពុំមានវត្តមានក្រុមហ្វីលីពីនឡើយ។
ហ្វីលីពីន មានក្រុមបាល់ទះបុរសធ្លាប់អង្រួនស៊ីហ្គេមជាច្រើនលើកច្រើនសារ ដោយក្នុងនោះធ្លាប់ឈ្នះមេដាយប្រាក់ ២លើក នៅឆ្នាំ១៩៧៧ និង២០១៩ ខណៈក្រុមនេះធ្លាប់ឈ្នះមេដាយសំរឹទ្ធិរហូតដល់ទៅ៦សម័យកាល គឺនៅឆ្នាំ១៩៧៩, ១៩៨១, ១៩៨៣,១៩៩១,១៩៩៧ និង២០០៥។
ចំណែកពិធីចាប់ឆ្នោតវគ្គចែកពូលវិញ្ញាសាបាល់ទះក្នុងសាលក្នុងព្រឹត្តិការណ៍កីឡាស៊ីហ្គេម ឆ្នាំ២០២៣ នឹងធ្វើឡើងនៅថ្ងៃទី៥ ខែមេសា ឆ្នាំ២០២៣ ដំណាលគ្នា នៅពហុកីឡដ្ឋានជាតិមរតកតេជោ។ ដែលការប្រកួតនឹងចាប់ផ្ដើមពីថ្ងៃទី០៣ ខែឧសភា ដល់ថ្ងៃទី១៤ ខែឪសភា ឆ្នាំ២០២៣។
ក្រុមចូលរួមចំនួន ៧ប្រទេស មានដូចខាងក្រោម៖
១. ក្រុមបាល់ទះជម្រើសជាតិកម្ពុជា
២. ក្រុមបាល់ទះជម្រើសជាតិថៃ
៣. ក្រុមបាល់ទះជម្រើសជាតិឥណ្ឌូនេស៊ី
៤. ក្រុមបាល់ទះជម្រើសជាតិមីយ៉ាន់ម៉ា
៥. ក្រុមបាល់ទះជម្រើសជាតិម៉ាឡេស៊ី
៦. ក្រុមបាល់ទះជម្រើសជាតិសិង្ហបុរី
៧. ក្រុមបាល់ទះជម្រើសជាតិវៀតណាម
គួរបញ្ជាក់ថា សម្រាប់វិញ្ញាសាបាល់ទះក្នុងសាលបុរស់ កម្ពុជា ក្នុងព្រឹត្តិការណ៍កីឡាស៊ីហ្គេម លើកទី៣១ ឆ្នាំ២០២២ ដែលប្រទេសវៀតណាម ធ្វើជាម្ចាស់ផ្ទះ ក្រុមបាល់ទះកម្ពុជា ដណ្ដើមបានចំណាត់ថ្នាក់លេខ៣ មេដាយសំរិទ្ធ ក្រោយយកឈ្នះថៃ ក្នុងលទ្ធផល៣សិតទល់២។ ពោលគឺ៖
- សិតទី១ កម្ពុជាឈ្នះ ២៥-២៣
- សិតទី២ ថៃឈ្នះ ២៥-២២
- សិតទី៣ កម្ពុជាឈ្នះ ២៥-២២
- សិតទី៤ ថៃវាយបកតាមស្មើ ២៥-១៣
- សិតចុងក្រោយ កម្ពុជាឈ្នះ១៥-១៣
កម្មវិធីប្រកួតកីឡាស៊ីហ្គេមឆ្នាំ២០២៣ នឹងប្រព្រឹត្តទៅចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ ខណ:កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នឹងចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣៕