កាលពីថ្ងៃទី៣ ខែកក្កដា ឆ្នាំ២០២១ អ្នកស្រី ម៉ៅ សំណាង ឬដែលអ្នកគាំទ្រស្គាល់ថា «អ្នកនិពន្ធទន្សាយ» បានប្រកាសព្រមានប្ដឹងចំពោះម្ចាស់ឆាណែលយូធូបមួយចំនួនបានយកស្នាដៃរបស់អ្នកស្រីនិងកូនទៅអាននិងផុសលើឹឆាណែលខ្លួនដោយមិនមានសុំការអនុញ្ញាត។
អ្នកនិពន្ធទន្សាយបានលើកឡើងថាស្នាដៃរបស់អ្នកស្រីត្រូវបានម្ចាស់យូធូបយកទៅប្រើប្រាស់ដើម្បីប្រយោជន៍ផ្ទាក់ខ្លួន ដែលស្មើនឹងលួចកម្មសិទ្ធិបញ្ញារបស់អ្នកនិពន្ធ។ អ្នកនិពន្ធមានស្នាដៃល្បី និង មានអ្នកគាំទ្រច្រើនឆ្នាំរូបនេះបានធ្វើការសំណូមពរផងចំពោះម្ចាស់យូធូបដែលបានយកស្នាដៃអ្នកស្រីនិងកូនស្រីទៅប្រើឱ្យមានការយោគយល់ ដោយការទាក់ទងមកសុំសិទ្ធិរួមសហការគ្នាដើម្បីចែកភាគលាភទៅតាមភាពសមស្របណាមួយដែលអ្នកនិពន្ធគួរតែទទួលបាន។
អ្នកស្រីក៏បានសង្កត់ធ្ងន់ដែរចំពោះអ្នកដែលមិនបានសុំសិទ្ធិពីអ្នកស្រីឬកូនស្រីអ្នកស្រី កញ្ញា ម៉ៅ ចាន់រស្មីទេនោះ ត្រូវតែលុបចោលជាបន្ទាន់នូវស្នាដៃប្រលោមលោករបស់អ្នកស្រីចេញពីឆាណែលយូធូបរបស់ខ្លួនចាប់ពីថ្ងៃប្រកាសរបស់អ្នកស្រីនេះជាបន្ទាន់ បើមិនដូច្នោះទេ អ្នកស្រីនឹងប្រើប្រាស់ផ្លូវច្បាប់ឱ្យជួយដោះស្រាយលើបញ្ហានេះ។
ម្ចាស់ស្នាដៃថ្មីៗ រឿង «ប្រលោមចិត្ត» ក៏សង្ឃឹមថាសំណេររបស់ស្រីនឹងធ្វើឱ្យម្ចាស់យូធូបដែលធ្លាប់បានយកស្នាដៃរបស់អ្នកស្រីទៅប្រើដើម្បីប្រយោជន៍ផ្ទាល់ខ្លួន និង ភ្ញាក់រលឹកហើយរួមគ្នាធ្វើអ្វីមួយឱ្យស្របច្បាប់។
«នេះជាសំណូមពរចុងក្រោយរបស់ខ្ញុំសម្រាប់អ្នកដែលបានលួចកម្មសិទ្ធបញ្ញារបស់អ្នកនិពន្ធ។ខ្ញុំសុំឲ្យយើងមានការយោគយល់រវាងគ្នានិងគ្នា។ ម្ចាស់ឆាណែល youtube ដែលអាចអានប្រលោមលោកដែលជាស្នាដៃរបស់ខ្ញុំបានលុះត្រាតែបានទាក់ទងសុំសិទ្ធិរួមសហការណ៍ជាមួយខ្ញុំ ឬជាមួយកូនស្រីរបស់ខ្ញុំ ម៉ៅ ចាន់រស្មី ជាមុនសិន ដេីម្បីចែកជាភាគលាភទៅតាមភាពសមស្រប ដែលក្នុងនាមខ្ញុំជាអ្នកនិពន្ធគួរតែទទួលបាន។ ចំណែកអ្នកដែលមិនបានទទួលសិទ្ធិពីខ្ញុំ ឬ កូូនស្រីខ្ញុំដោយផ្ទាល់ទេនោះ សុំមេត្តាលុបស្នាដៃប្រលោមលោករបស់ខ្ញុំចេញពីឆាណែល youtube ចាប់ពីពេលនេះតទៅ។ ខ្ញុំសង្ឃឹមថាយេីងអាចសហការណ៍គ្នាដោយការយោគយល់ ពុំដូច្នោះទេ ខ្ញុំមានតែសុំឱ្យច្បាប់ជួយដោះស្រាយប៉ុណ្ណោះ។ ខ្ញុំសង្ឃឹមថាម្ចាស់ឆានែលទាំងអស់ដែលធ្លាប់បានយកស្នាដៃរបស់ខ្ញុំទៅរកផលប្រយោជន៍ផ្ទាល់ខ្លួននោះនឹងភ្ញាក់រលឹកហើយរួមគ្នាធ្វើអ្វីដោយស្របច្បាប់ចាប់ពីពេលវេលានេះតទៅ។សូមអរគុណ ម៉ៅ សំណាង (ទន្សាយ)»។
