ភូមិស៊ីហ្គេមនិងអាស៊ានប៉ារ៉ាហ្គេម ជាទីតាំងមួយនៃទីតាំងសំខាន់ៗរបស់ព្រឹត្តិការណ៍អង្គរសង្រ្កាន្ត នៅឆ្នាំ២០២៣ នេះ ខណៈគណៈកម្មការបង្កើតឡើងក្នុងគោលបំណងបំផុសព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម អោយមហាជនបានជ្រាបច្បាស់ហើយ ត្រៀមចូលរួមលើកទឹកចិត្តទាំងអស់គ្នា។
ឯកឧត្តមបណ្ឌិតសាស្រ្តចារ្យ ឯក មនោសែន ប្រធានក្រុមការងារភូមិស៊ីហ្គេមនិងអាស៊ានប៉ារ៉ាហ្គេម បានបញ្ជាក់ថា៖«វត្តមានរបស់ភូមិស៊ីហ្គេមនិងអាស៊ានប៉ារ៉ាហ្គេម នេះគឺកើតចេញពីគំនិត ផ្ដួចផ្ដើមដ៏ពិសេសនិងថ្លៃថ្លារបស់ឯកឧត្តម ហ៊ុន ម៉ានី ប្រធានសហភាពសហព័ន្ធជនកម្ពុជា ដែលបង្កើតកម្មវិធីអង្គរសង្ក្រាន្ត ខួបលើកទី១០ ហើយក្នុងនោះ ឆ្នាំនេះកម្ពុជាមានភ័ព្វសំណាងក្រោមម្លប់សន្តិភាពដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន បានរៀបចំឲ្យមានការធ្វើជាម្ចាស់ផ្ទះប្រកួតកីឡាស៊ីហ្គេម និងអាស៊ានប៉ារ៉ាហ្គេម ក្នុងប្រវត្តិសាស្ត្ររបស់ប្រទេសកម្ពុជា»
ឯកឧត្តមបណ្ឌិតសាស្រ្តចារ្យ បន្តថា៖«ភូមិស៊ីហ្គេមនិងអាស៊ានប៉ារ៉ាហ្គេមនេះ ស្ថិតនៅក្នុងចង្កោមទី៣ នៃព្រឹត្តិការណ៍អង្គរសង្ក្រាន្ត។ ចង្កោមទី៣ នេះមានឯកឧត្តម ស សុខា ជាប្រធាន ហើយក្រុមការងារយុទ្ធនាការផ្សព្វផ្សាយភូមិស៊ីហ្គេមនិងអាស៊ានប៉ារ៉ាហ្គេម នេះមានខ្ញុំ ឯក មនោសែន គឺជាអ្នកសម្របសម្រួលចាត់ចែងដឹកនាំរៀបចំ។ ក្រុមការងាររបស់យើងគ្រប់ផ្នែកទាំងអស់ដែលបានប្ដេជ្ញារួមចិត្តរួមគំនិតគ្នាក្រោមដំបូលសន្តិភាពនេះកសាងភូមិស៊ីហ្គេម យ៉ាងសស្រាក់សស្រាំ ដោយយើងធ្វើការជាមួយគ្នារយៈកាល១ ខែកន្លះមកហើយ ថាត្រូវរៀបចំបែបបទបែបម៉េចហើយឱ្យស័ក្ដិសម។ បានន័យថានៅក្នុងទីតាំងទាំងអស់នេះគឺមានចរិតជាលក្ខណៈ ជាកីឡា»។
ភូមិស៊ីហ្គេមនិងអាស៊ានប៉ារ៉ាហ្គេម បានជ្រើសរើសយកកីឡា១០ប្រភេទ ដែលមានឈ្មោះក្នុងព្រឹត្តិការណ៍ស៊ីហ្គេមឆ្នាំមកដាក់ក្នុងភូមិរបស់ខ្លួន ដោយទី១កីឡាប្រពៃណី ដែលដាក់ចូលស៊ីហ្គេម ចំនួន៣ប្រភេទ មានប្រដាល់គុនខ្មែរ ល្បុក្កតោ និងអុកចត្រង្គ និងកីឡាប្រជាប្រិយចំនួន៧ប្រភេទ។ ភូមិនេះជាជំរុំនៃបណ្ដុំកីឡាករល្បីៗផងដែរនឹងបង្ហាញខ្លួនជាការប្រកួត ឬ លេងកម្សាន្តនានា។ ម៉្យាងទីតាំងនេះដែរមានកន្លែងតាំងពិព័រណ៍សម្ភារៈគ្រប់ប្រភេទកីឡាដែលត្រូវប្រកួតនៅក្នុងស៊ីហ្គេមនិងអាស៊ានប៉ារ៉ាហ្គេម សម្លៀកបំពាក់ ឧបករណ៍លេងគ្រប់បែបយ៉ាង មេដាយនានាដែលធ្លាប់ឈ្នះការប្រកួតជាលក្ខណៈអន្តរជាតិកន្លងមក មានភ្លើងគប់ស៊ីហ្គេម ជាដើម។
«មិនតែប៉ុណ្ណោះ មានរូបថត ពិពណ៌ ប្រវត្តិស៊ីហ្គេម និងអាស៊ានប៉ារ៉ាហ្គេម មានប្រវត្តិមួយចំនួនទៀតដែលសរសេរដាក់បង្ហាញក្នុងភូមិកីឡាយើងនេះ។ ឯកឧត្តមប្រធាន ស សុខា ដែលជាប្រធានចង្កោម លោកបានចង្អុលបង្ហាញជាបន្តបន្ទាប់ ដើម្បីកែសម្រួល ភូមិយើងធ្វើតូចបន្តិច តែមានលក្ខណៈសំបូរបែប និងស្រស់ស្អាតមែនទែន។ យើងធ្វើភូមិនេះមានលក្ខណៈកីឡាផង និងប្រពៃណីផងដែរ» ឯកឧត្តមបណ្ឌិតសាស្រ្តចារ្យ បញ្ជាក់បន្ថែម។
ឯកឧត្តម ឯក មនោសែន បន្តថា៖«ប្រធានបទរបស់យើង កីឡារស់ក្នុងសន្តិភាព អ៊ីចឹងបើគ្មានសន្តិភាពទេ យើងមិនអាចប្រកួតជាលក្ខណៈអន្តរជាតិបែបនេះ (ស៊ីហ្គេមនិងអាស៊ានប៉ារ៉ាហ្គេម) មិនកើតទេ ហើយមិនតែប៉ុណ្ណោះ យើងខ្ញុំមានមោទនភាពខ្លាំងណាស់ដែលបានចូលរួមក្នុងការរៀបចំជាមួយក្រុមការងារយ៉ាងសស្រាក់សស្រាំហើយមានមោទនភាពខ្លាំងណាស់ដែលយើងបានរៀបចំព្រឹត្តិការណ៍ជាលក្ខណៈអន្តរជាតិបានតែម្ដង។ នៅក្នុងភូមិស៊ីហ្គេមយើងនេះមានដើមឈើសន្តិភាពដែលយើងតំណាងឱ្យសុខសន្តិភាព ដែលកើតមានឡើង ហើយយើងគ្រប់គ្នាត្រូវរួមគ្នារក្សាដើមឈើនេះឱ្យមានម្លប់ត្រឈឹងត្រឈៃបែកមែកសាខា អាចជ្រកតកូនតចៅ ជារៀងរហូត»។
សម្រាប់ទីតាំងភូមិស៊ីហ្គេមនិងអាស៊ាន ប៉ារ៉ាហ្គេម ស្ថិតនៅក្បែរប្រាសាទតាព្រហ្ម កៀកនឹងរបងទីលានជល់ដំរីដោយមហាជនលោកអាចចូលរួមលេងកម្សាន្តដើម្បីឈ្នះរង្វាន់ផង និងទស្សនាការប្រកួត ឬ សម្ដែងរបស់កីឡាករអាជីពបានផង។ ភូមិស៊ីហ្គេមបើកទ្វាទទួលភ្ញៀវជាតិនិងអន្តរជាតិ៣ថ្ងៃពេញតែម្តងក្នុងឱកាសព្រឹត្តិការណ៍អង្គរសង្រ្កាន្ត ផ្ទាល់តែម្តង៕