ម្ចាស់មេដាយប្រាក់កីឡាស៊ីហ្គេមឆ្នាំ២០២១កន្លងទៅកីឡាករប្រដាល់ ឈឿង ល្វៃ បានប្រកួតចាញ់កីឡាករ អ្នកលេងឆ្លងដែន សាម៉ី បាចាម៉េក របស់ថៃ ត្រឹមទឹកទី៤ នៅសង្វៀនទូរទស្សន៍ជាតិកម្ពុជា នៅថ្ងៃទី១៥ ខែមេសា ឆ្នាំ២០២៣ ក្នុងព្រឹត្តិការណ៍អង្គរសង្រ្កាន្ត ឱកាសបុណ្យចូលឆ្នាំថ្មីប្រពៃណីជាតិខ្មែរ នៅខេត្តសៀមរាប។
ជុំវិញបរាជ័យរបស់កីឡាករកម្ពុជា ទម្ងន់ ៧១គីឡូក្រាមនេះ លោកឧកញ៉ា ស្រី ចាន់ថន ដែលសកម្មក្នុងការជ្រោងគុនខ្មែរពីក្រោយខ្នង និងបានចូលទស្សនាការប្រកួតផ្ទាល់ បានបង្ហោះសារនៅលើហ្វេសប៊ុករបស់លោកទាំងយប់ថា៖«ក្រោយចប់ការប្រកួតរបស់កីឡាករ ឈឿង ល្វៃ និង កីឡាករថៃ ក្នុងនាមខ្ញុំជាអនុប្រធានសហព័ន្ធប្រដាល់គុនខ្មែរ ខ្ញុំពិតជាមិនអាចទទួលយកការរៀបចំកម្មវិធីនេះបាននោះទេ»។
លោកឧកញ៉ា បានបង្ហាញពីមូលហេតុនៃការប្រតិកម្មរបស់ខ្លួនថា៖«ទី១ ! ហេតុអ្វីបានជាការប្រកួត៧គូរប្រកួត៣ទឹក តែបែរជាការប្រកួតរបស់ ឈឿង ល្វៃ ត្រូវប្រកួតរហូតដល់ទៅ៥ ទឹកទៅវិញ? ទី២! ឈឿន ល្វៃ ត្រូវផ្តាច់កីឡាករថៃនៅទឹកទី៣ ហេតុអ្វីអាជ្ញាកណ្តាល បែរជាជួយទប់ខាងថៃ ហើយមិនអោយ ឈឿន ល្វៃ ផ្តាច់បែបនេះ? ទី៣៖ ហេតុអ្វីបានជានៅសល់ត្រឹមជាងម្ភៃថ្ងៃដល់ស៊ីហ្គេមបែរជារៀបចំការប្រកួតអន្តរជាតិបែបនេះ? ចុះបើខូចកីឡាករ តើនរណាជាអ្នកទទួលខុសត្រូវ? ស៊ីហ្គេមគឺជាមុខមាត់ប្រទេសជាតិទាំងមូល ពោលគឺកីឡាករមិនអាចមានបញ្ហាអ្វីឡើយមុនពេលដល់ការប្រកួតស៊ីហ្គេម ខាងមុខនេះ ខ្ញុំពិតជាឆ្ងល់មិនអាចស្រាយចម្ងល់មួយនេះបានឡើយ»។
«អាស្រ័យហេតុនេះ សូមលោកៗដែលរៀបចំកម្មវិធីមេត្តាឆ្លើយតបផង សូមអរគុណ។ ស្របពេលជាមួយគ្នានេះគ្រាន់តែជាមតិរបស់ខ្ញុំតែប៉ុណ្ណោះ បើសិនជាខុសទាស់សូមបងប្អូនមេត្តាអធ្យាស្រ័យផង»។ លោកបានបន្ត។ យ៉ាងណាមិញលោកក៏បានចោទជាសំនួរទៅមហាជនថាយល់យ៉ាងណាពីការប្រកួតនេះ ដោយបើកឱ្យមាន Comment ចំពោះការបង្ហោះរបស់លោកផងដែរ៕