សិល្បៈជាតិ៖ ជារឿយៗនៅលើបណ្ដាញសង្គមហ្វេសប៊ុកគេមើលឃើញថា យុវតី ល្អហួស រមែងបង្ហាញពីសកម្មភាពហ្វឹកហាត់សមត្ថភាពដើរដំណើរ ដើម្បីត្រៀមចូលរួមប្រកួតប្រជែងនៅក្នុងកម្មវិធីបវរកញ្ញាយុវតីរបស់កម្ពុជា។ នាងមានមហិច្ឆតាចង់ក្លាយជាបេក្ខភាពតំណាងឱ្យប្រទេសកម្ពុជាមួយរូប ក្នុងការទៅចូលរួមប្រកួតនៅលើវេទិកាអន្តរជាតិ។
ល្អហួស ត្រូវបានគេដឹងថា នាងនឹងកំពុងត្រៀមចូលរួមប្រកួតនៅក្នុងកម្មវិធី Miss Preteen International Cambodia ដោយអតីតតារាសម្ដែងស្រីដែលជាសាច់ឈាមជាមួយនឹងនាង គឺអ្នកនាង ដេន នីក្វាន់ បានបង្ហោះសារប្រាប់មហាជន និងអំពាវនាវសុំឱ្យមហាជនជួយគាំទ្រកូនស្រីរបស់ខ្លួន។ អ្នកនាង ដេននី ក្វាន់ បានប្រកាសតាមបណ្តាញសង្គមរបស់ខ្លួនថា៖ «ឆ្នាំ២០២៣នេះ កូនស្រីរបស់ខ្ញុំ «ល្អ ហួស» ដាក់ពាក្យប្រកួត Miss Preteen International Cambodia ហើយ សូមពុកម៉ែបងប្អូនជួយគាំទ្រផង»។
មែនទែនទៅ ក្រុមគ្រួសាររបស់យុវតី ល្អហួស ពិតជាគាំទ្រនាងយ៉ាងពេញទំហឹងចំពោះជំហរក្លាយជាបវរកញ្ញា ដោយពួកគេបានជួលគ្រូល្អៗបង្រៀននាងពីការហ្វឹកហាត់ដំណើរនៅលើវេទិកាបវរកញ្ញា។ មិនតែប៉ុណ្ណោះ ល្អហួស ក៏ទទួលបានការដុះខាត់ផ្នែកភាសាបរទេសថែមទៀត ដើម្បីបានជាទុនឱ្យនាងឈានផុតវគ្គសំនួរចម្លើយនៅលើវេទិកា។ ភាគច្រើនមហាជនមានការកោតសរសើរចំពោះ ល្អហួស ទាំងទៅលើរូបសម្រស់ និងទេពកោសល្យសិល្បៈរបស់នាងតាំងពីវ័យជាកុមារីមកម្ល៉េះ ហើយពួកគេបានប្រៀបធៀបមុខមាត់របស់នាងទៅនឹងតួស្រី យ៉ាយ៉ា ដែលជាតួឯកថៃថែមទៀតផង។
ទីបំផុត ល្អហួស បានប្រមូលប្រជាប្រិយភាពពីអ្នកគាំទ្រ ដោយមានអ្នកចូលរួមដាក់ពិន្ទុឱ្យនាងក្លាយជាម្ចាស់មកុដបាត់ទៅហើយ បើទោះនាងនៅមិនទាន់បានប្រកួតនៅឡើយ។ គេឃើញមានអ្នកលេងបណ្ដាញសង្គមលើកឡើងស្រដៀងៗគ្នាបែបនេះ៖ «ទាំងស្អាត ទាំងមានសមត្ថភាព ទេពកោសល្យសិល្ប: គួរអោយស្ញប់ស្ញែងណាស់ ខ្ញុំជឿជាក់ថាក្មួយស្រីជាម្ចាស់មកុដស្រឡាញ់តាំងពីតូច» «ចង់អោយតំណាងកម្ពុជា សុំមកុដមក» «មិនជាប់ចម្លែកហើយរាងកប់សារី ឆ្លាតចេះច្រើនភាសា» «ល្អគ្មានទាស់ត្រង់ណាទេសំណព្វបេះដូង ដឹងតែជាម្ចាស់មកុដ100% ហើយ» «ស្រស់ស្អាតដូចទេពអប្សរអីចឹងដឹងតែជាប់១០០ភាគរយហើយ»។
តាមការបញ្ជាក់របស់ ល្អហួស បានឱ្យដឹងថា មិនត្រឹមតែនាងកំពុងដុសខាត់លើសមត្ថភាពដើរម៉ូដ និងភាសានោះទេ នាងក៏កំពុងសិក្សាឈ្វេងយល់ពីវប្បធម៌អរិយធម៌របស់ខ្មែរឱ្យបានកាន់តែច្បាស់លាស់ ព្រមជាមួយការរៀនជំនាញសិល្បៈផ្នែកបុរាណមួយចំនួនទៀត ដើម្បីសម្រេចបានគោលដៅក្នុងចូលរួមការប្រកួតសម្រស់ធំៗ និងត្រៀមខ្លួនអាចក្លាយជាបវរកញ្ញាតំណាងកម្ពុជាមួយរូបនាពេលអនាគតផងដែរ៕