ប្រតិភូដង្ហែព្រះអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ធ្វើដំណើរដល់ទីក្រុង យ៉ាំងហ្គូន ប្រទេសមីយ៉ាន់ម៉ា ដោយសុវត្ថិភាពហើយ នៅព្រឹកថ្ងៃទី១៩ ខែមេសា ឆ្នាំ២០២៣ ក្រោមការដឹកនាំរបស់បេសកជនពិសេស CAMSOC ឯកឧត្តម ហោ សារុន រដ្ឋលេខាធិការក្រសួងទេសចរណ៍ និងមានការអញ្ជើញទទួលស្វាគមន៍ពីឯកឧត្តម ជុំ អង្គវិចិត្រ ឯកអគ្គរាជទូតកម្ពុជាប្រចាំប្រទេសមីយ៉ាន់ម៉ា ព្រមទាំងឯកឧត្តម U Htay Aung អភិបាលខេត្តយ៉ាងហ្គូន និងជាប្រធានគណៈកម្មាធិការអប់រំកាយ និងកីឡាភូមិភាគយ៉ាំងហ្គូនផងដែរ មុនពិធីដង្ហែនាថ្ងៃទី២១ ខែមេសា ខាងមុខនេះ នៅទីក្រុងយ៉ាំងហ្គូន។
តាមការគ្រោងទុក ព្រះអគ្គិជ័យកីឡាត្រូវដង្ហែតាមបណ្ដាប្រទេសសមាជិកអាស៊ាន និងប្រទេសទីម័រខាងកើតព្រមទាំងហែជុំវិញបណ្ដាខេត្តដែលនៅជាប់នឹងបឹងទន្លេសាបនៃព្រះរាជាណាចក្រកម្ពុជា ខណៈកម្ពុជា ធ្វើជាម្ចាស់ផ្ទះនៃការប្រកួតកីឡាស៊ីហ្គេមលើកទី ៣២ នៅថ្ងៃទី ៥ ខែឧសភា ឆ្នាំ ២០២៣ តទៅ៕
រូបថត៖ ខឹម សុវណ្ណារ៉ា / AKP