សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC-CAMAPGOC មានប្រសាសន៍ថា ការត្រួតពិនិត្យទីលានប្រកួតនានា សម្រាប់ការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ត្រូវបានធ្វើឡើងជាបន្តបន្ទាប់ ហើយពេលនេះ បានចប់សព្វគ្រប់រៀបរយអស់ហើយ។
នេះជាការបញ្ជាក់របស់សម្តេចពិជ័យសេនា នៅក្រោយការត្រួតពិនិត្យទីលាន ប្រកួត នៅមជ្ឈមណ្ឌលកីឡាកងយោធពលខេមរភូមិន្ទ (ស្តាតចាស់) កាលពីថ្ងៃពុធ ទី១៩ ខែមេសានេះ។
សម្តេចពិជ័យសេនា ទៀ បាញ់ មានប្រសាសន៍ថា ៖«ពេលវេលាយើងជិតមក ដល់ហើយ ជាពិសេសគឺព្រឹត្តិការណ៍ប្រកួតស៊ីហ្គេម លើកទី៣២ នៅសល់តែ ១៦ថ្ងៃទៀតប៉ុណ្ណោះ ដូច្នេះគ្រប់គណៈកម្មការ ក៏ដូចជាគ្រប់ផ្នែកនានា កំពុងមហាញឹកមែនទែន ក្នុងការត្រួតពិនិត្យគ្រប់ផ្នែក គ្រប់វិស័យទាំងអស់ ជាពិសេស គឺទីលានប្រកួត ត្រូវតែរួចរាល់មុនអ្វីៗទាំងអស់ ដើម្បីធានាឱ្យបានស្អាត អនាម័យ ព្រមទាំងត្រឹមត្រូវតាមស្តង់ដាអន្តរជាតិផងដែរ។ ជារួម គឺគ្រប់ទិសទីទាំងអស់ យើងបានត្រួតពិនិត្យជាបន្តបន្ទាប់រួចរាល់ចប់សព្វគ្រប់អស់ហើយ ដោយនៅសល់តែការសម្អាតអនាម័យ តុបតែងស្លាកសញ្ញា និមិត្តសញ្ញា ឱ្យកាន់តែស្រស់ប្រិមប្រិយប៉ុណ្ណោះ»។
«ដូច្នេះនៅថ្ងៃនេះ យើងឃើញថា គ្រប់ទីកន្លែងប្រកួតទាំងអស់ បានរៀបរយរួចរាល់ជិត១០០ភាគរយហើយ។ ចំពោះទីលានប្រកួតនៃកីឡដ្ឋានស្តាតចាស់ សម្រាប់ប្រកួតបាល់ទាត់នារី ដែលពីមុនយើងមានក្តីបារម្ភ ដែលអាចប្រកួត បាន១ពេល ប៉ុន្តែពេលនេះយើងបានដោះស្រាយទាន់ ពេលវេលា ក្រោយការខិតខំប្រឹងប្រែងកែលម្អ ការបំពាក់ភ្លើងបំភ្លឺ គឺអាចប្រកួតបាន២ពេល ឱ្យស្របតាមស្តង់ដា ដើម្បីធានាឱ្យការប្រកួតនៅទីលានមួយនេះ ប្រកបដោយភាព រលូន»។ នេះជាការសង្កត់ធ្ងន់បន្ថែមរបស់សម្តេចពិជ័យសេនា។
សម្តេចប្រធាន CAMSOC-CAMAPGOC បានលើកឡើងទៀតថា ទីលានបាល់ទាត់ មាន៤កន្លែងសម្រាប់បម្រើដល់ការប្រកួតកីឡាស៊ីហ្គេម លើកទី៣២ ឆ្នាំ២០២៣ គឺនៅស្តាតចាស់ ពហុកីឡដ្ឋានជាតិ (អូឡាំពិក) កីឡដ្ឋានភ្នំពេញក្រោន កីឡដ្ឋានព្រីនស៍ ដោយសារប្រភេទកីឡាបាល់ទាត់ត្រូវដំណើរការប្រកួតមុនគេ ដោយចាប់ផ្តើមប្រកួត ពីថ្ងៃទី២៩ ខែមេសា ឆ្នាំ២០២៣។
ជាមួយគ្នានេះ សម្តេចពិជ័យសេនា ក៏បានគូសបញ្ជាក់ដែរថា នៅមជ្ឈមណ្ឌលកីឡាកងយោធពលខេមរភូមិន្ទនេះ ក៏ជាមណ្ឌលមួយដ៏មានសារៈសំខាន់ផង ដែរ សម្រាប់ការប្រមូលផ្តុំហ្វឹកហាត់របស់ក្រុមជម្រើសជាតិកម្ពុជា លើប្រភេទ កីឡាប្រដាល់គុនខ្មែរ និងឃីកបុកស៊ីង ដែលសម្តេចពិជ័យសេនា ទៀ បាញ់ បានមើលឃើញពីភាពសស្រាក់សស្រាំ ក្នុងការហ្វឹកហាត់ត្រៀមស៊ីហ្គេម ឆ្នាំ២០២៣ ក្នុងនាមជាម្ចាស់ផ្ទះ។
គួរបញ្ជាក់ថា ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នេះមានប្រទេសចំនួន១១ចូលរួមប្រកួតប្រជែងលើប្រភេទកីឡាចំនួន៣៧ ស្មើនឹង ៥៨១វិញ្ញាសា ដែលត្រូវបានអនុម័តដោយក្រុមប្រឹក្សាសហព័ន្ធកីឡាអាស៊ីអាគ្នេយ៍ ហើយព្រឹត្តិការណ៍ស៊ីហ្គេមនេះ នឹងដំណើរការជាផ្លូវការ ពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣។
ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ សម្រាប់ក្រុមអត្តពលិកជនពិការ នឹងដំណើរការជាផ្លូវការពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ដោយមាន១៣ប្រភេទកីឡាស្មើនឹង ៤៣១វិញ្ញាសា។ ចំពោះប្រតិភូកីឡាទាំង១១ប្រទេស រួមទាំងម្ចាស់ផ្ទះកម្ពុជា ដែលត្រៀមចូលរួមប្រកួតប្រជែងមេដាយស៊ីហ្គេម-អាស៊ានប៉ារ៉ាហ្គេម ជាប្រវត្តិសាស្ត្រលើកដំបូង នៅកម្ពុជានេះ មានចំនួនសរុប១២៤០៤នាក់៕
