កាលពីថ្ងៃទី១៩ ខែមេសា ក្រុមកីឡាករ-កីឡាការិនីជម្រើសជាតិកាយសម្ព័ន្ធកម្ពុជា ប្រភេទ Aerobic ចំនួន ៩រូប បានចេញដំណើរច្រកប្រលានយន្តអន្តរជាតិភ្នំពេញ ទៅកាន់ប្រទេសជប៉ុន ដើម្បីចូលរួមការប្រកួតជើងឯកពិភព លោក ដែលជាការទៅចូលរួមការប្រកួតព្រឹត្តិការណ៍ដ៏ធំ មុនស៊ីហ្គេមចាប់ផ្ដើម នៅភ្នំពេញ ហើយក៏ជាការតេស្ដសមត្ថភាពកីឡាករ-កីឡាការិនី ។
ជុំការទៅចូលរួមនេះដែរ ឯកឧត្តម ណយ ផាន់ណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា បានមានប្រសាសន៍ថា៖ «ព្រឹត្តិការណ៍នេះ ជាព្រឹត្តិការណ៍មួយដ៏ល្អសម្រាប់យើង ហាក់ដូចជាការត្រៀមលក្ខណៈសម្រាប់ការចូលរួមការប្រកួតព្រឹត្តិការណ៍ស៊ីហ្គេមនៅកម្ពុជាយើងដូច្នេះដែរ។ អ៊ីចឹង យើងសង្ឃឹមថា ការទៅចូលរួមនោះ ជាការយកបទពិសោធន៍មួយដ៏ល្អ ហើយយើងអាចវាយតម្លៃបានទៅលើការប្រកួតនោះ។ ព្រឹត្តិការណ៍ដែលយើងចូលរួមនេះ ហាក់ដូចជាការត្រៀមស៊ីហ្គេមរបស់យើងតែម្ដង»។
គួររម្លឹកថា ក្រៅពីកីឡាករ-កីឡាការិនី ចំនួន៩រូប ទៅចូលរួមការប្រកួតព្រឹត្តិការណ៍ខាងលើ ក៏មានចៅក្រមអន្តរជាតិកម្ពុជា ១រូប និងគ្រូបង្វឹកចំនួន ៣រូប បានចេញដំណើរទៅកាន់ប្រទេសជប៉ុន ដើម្បីចូលរួមប្រកួតជើងឯកពិភពលោកនេះដែរ។
គួរបញ្ជាក់ថា ព្រឹត្តិការណ៍ប្រកួតជើងឯកពិភពលោកនៅជប៉ុន មាន ១៨ប្រទេស ឬអាចខុសនេះតិចតួច ពោលគឺស្ថិតនៅចន្លោះពី១៥ ទៅ១៨ប្រទេស ក្នុងនោះ ក៏មានប្រទេសនៅតំបន់អឺរ៉ុបចូលរួមដែរ ហើយសុទ្ធតែជាជើងខ្លាំងក្នុងពិភពលោក។ ប៉ុន្តែទោះបីជាយ៉ាងណា កម្ពុជាត្រូវតែចូលរួមដើម្បីវាស់ស្ទង់កម្រិតសមត្ថភាពរបស់កីឡាករ-កីឡាការិនី៕
