អតីតកីឡាការិនីជម្រើសជាតិកម្ពុជា ហែម ថុនវីទីនី និងអ្នកចាំទី អេឡិច យូ ប្រចាំក្លិបបាល់ទាត់ព្រះខ័នរាជស្វាយរៀង សម្រេចចិត្តបិទទ្វាហាងរបស់ខ្លួនជាបណ្តោះអាសន្ន ក្រោយពេលដឹងថាអ្នកវិជ្ជមានកូវីដ-១៩ បានចូលទិញម្ហូប នៅកន្លែងរបស់ខ្លួន។
ហែម ថុនវីទីនី បានបញ្ជាក់នៅលើហ្វេសប៊ុករបស់ខ្លួននៅរសៀលថ្ងៃចន្ទ នេះថា៖«អគុណចំពោះការបារម្ភពីបងប្អូន ហាងខ្ញុំបានបិទនៅថ្ងៃទី ៣០ ខែ មិថុនា ដោយគ្រាន់តែដឹងថាអ្នកដែរគាត់មកទិញម្ហូបនៅហាងខ្ញុំនៅថ្ងៃ២៩ មិថុនា ហើយថ្ងៃ៣០ ខែមិថុនា គាត់បានពិនិត្យឃើញវិជ្ជមាន។ ខ្ញុំត្រូវមានទំនួលខុសត្រូវខ្ពស់ទាំងបុគ្គលិក និងខ្ញុំផងដែរ។ តាមពិតគេនៅអនុញ្ញាតអោយបើកលក់ធម្មតាទេ តែខ្ញុំម្ចាស់ហាងបានសំរេចចិត្តមុនថ្ងៃអនុគណះកម្មការស្រាវជ្រាវ ចុះមកទៀត ហើយខ្ញុំខ្លាចនឹងប្រុងប្រយ័ត្ន និងកាពារទប់ស្កាត់ការឆ្លងរីករាលដាលមុនការប្រកាសនេះទៀតចាស»។
អនុគណៈកម្មការស្រាវជ្រាវជំងឺកូវីដ១៩ បានបង្ហោះនៅលើហ្វេសប៊ុកនារសៀលថ្ងៃចន្ទ នេះដែរថា សូមអំពាវនាវដល់ប្រជាពលរដ្ឋដែលបានទៅហាង វិទិនី បុកទឹកប្រហុក ដែលមានទីតាំងស្ថិតនៅសង្កាត់ទូលទំពូងទី១ ខណ្ឌចំការមន នៅថ្ងៃទី២៩ ខែមិថុនា ឆ្នាំ២០២១ ចាប់ពីម៉ោង ១៥៖២០ ដល់ ១៧៖៣០ ព្រោះមានអ្នកជំងឺកូវីដ-១៩ បានចូលទៅទីតាំងខាងលើនេះ។ ដើម្បីសុវត្ថិភាព សូមដាក់ខ្លួន ដាច់ដោយឡែក និងយកចិត្តទុកដាក់ តាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬបានទៅទីកន្លែងនោះ។
អតីតកីឡាការិនីហែលទឹកជម្រើសជាតិកម្ពុជា ខាងលើបន្ថែមថា៖« សំខាន់ខាងអ្នកស្រាវជ្រាវ ទើបតែបានមកស៊ើបសួរពួកខ្ញុំពីព្រឹកមិញទេនៅថ្ងៃទី៥ តែក៏បានត្រលប់ទៅផ្ទះវិញដោយសារ ពួកខ្ញុំបានតេស្តនឹងយកសំណាកមុនពេទ្យ និងអ្នកស្រាវជ្រាវចុះមកទៀត។ បើនៅចាំផ្លូវ ៥ ទៅ ៦ថ្ងៃទើបគាត់បានមក ចឹងទំនួលខុសត្រូវដែរខ្ញុំជាម្ចាស់ហាងខ្ញុំ និងអេឡិច ជាមួយនិង បុគ្គលិកទាំងអស់បានទៅរកពេទ្យឯកជនផង និងធ្វើតេស្ត rapid ដោយខ្លួនឯងចំនួន៣ដងហើយ»។
«ពួកយើងអវិជ្ជមានទាំងអស់គ្នាចាស។ ខ្ញុំម្ចាស់ហាងសំរេចចិត្តបិតមួយរយៈដើម្បីសុវត្តិភាពនិងទំនួលខុស។ ពិតជាអគុណដល់រាជរដ្ឋាភិបាល ដែរបានផ្តល់វ៉ាក់អោយពួកខ្ញុំទាំងអស់គ្នា អោយពួកយើងអាចទប់ស្កាត់និងការពារ។ មិនបាច់គេអោយធ្វើចត្តាឡឺស័កទេ ធ្វើខ្លួនឯងបាន៥ថ្ងៃហើយ។ សំខាន់ឥឡូវមានពេលថែខ្លួនថែរាង សំរាកបានដិតដល់ដើម្បីឈ្នះកូវីដ-១៩ ហើយចប់ចូលប្រលងបវរកញ្ញាហ្មង ព្រោះបុគ្គលិកសុទ្ធស្រីស្អាត»៕