សហព័ន្ធកីឡាបាល់ទាត់អាស៊ី (AFC) បានពិភាក្សាគ្នាតំឡើងក្រុមក្នុងវគ្គជម្រុះរវាងក្រុមបាល់ទាត់វិសាខា របស់កម្ពុជា និងក្រុម Lalenok United របស់ទីម័រខាងកើត ឱ្យឡើងទៅលេងក្នុងវគ្គចែកពូលតែម្ដង ក្រោយក្រុម Kaya FC របស់ហ្វីលីពីន ត្រូវបានជ្រើសរើសឱ្យចូលរួមប្រកួតក្នុងពានរង្វាន់ AFC Champion League 2021 វគ្គចែកពូល។ នេះបើតាមការបញ្ជាក់របស់Footy Rankings នៅព្រឹកថ្ងៃអង្គារ នេះ។
ដូច្នេះក្រុមវិសាខា ត្រូវតំឡើងឱ្យចូលលេងពូល I ជាមួយក្រុម Lalenok United របស់ទីម័រខាងកើត Terengganu របស់ម៉ាឡេស៊ី និង Geylang International របស់សិង្ហបុរី។
ពានរង្វាន់ AFC Cup 2021 មាន១០ពូល មកពី៥តំបន់ផ្សេងគ្នា មាន តំបន់អាស៊ីខាងកើត អាស៊ីខាងជើង អាស៊ីកណ្ដាល អាស៊ីខាងកើត និងអាស៊ីអាគ្នេយ៍។ គិតត្រឹមពេលនេះបានបញ្ចប់ការប្រកួត៦ពូលហើយ ព្រមទាំងរកឃើញក្រុមខ្លាំងតាមពូលដូចជា៖
*អាស៊ីខាងលិច៖
-ពូល A: ក្រុម Al-Ahed របស់លីបង់
-ពូល B: ក្រុម Al-Muharraq របស់បារ៉ែន
-ពូល C: ក្រុម Al-Kuwait របស់ក្រុមគុយវ៉ែត
ក្រុម Al-Salt របស់ហ្សកដានី ជាក្រុមចំណាត់ថ្នាក់លេខ២ល្អជាងគេបើធៀបនឹងក្រុមចំណាត់ថ្នាក់នេះ២ទាំង៣ពូលនេះ។ ដូច្នេះក្រុមទាំង៤ត្រូវប្រកួតគ្នាដើម្បីស្វែងរកក្រុមខ្លាំងនៅតំបន់អាស៊ីភាគខាងលិច ដោយធ្វើឡើងចំនួន២ជើង ក្នុងខែកញ្ញា ខាងមុខ៖
-Al-Ahed ប៉ះ Al-Muharraq
-Al-Salt ប៉ះ Al-Kuwait
*អាស៊ីខាងត្បូង៖វគ្គជម្រុះ និងពូល G មិនទាន់ប្រកួត តែបង់ក្លាដេស ធ្វើជាម្ចាស់ផ្ទះ។
*អាស៊ីកណ្ដាល៖
-ពូល E ក្រុមAhal មកពីប្រទេសទួរមេនីស្ថាន
-ពូល F ក្រុម Nasaf របស់អ៊ូបេគីស្ថាន
*អាស៊ីអាគ្នេយ៍៖ វគ្គជម្រុះ និងពូល G,H,I មិនទាន់ប្រកួត និងមិនទាន់កំណត់ក្រុមធ្វើម្ចាស់ផ្ទះ។
*អាស៊ីខាងកើត៖
-ពូល J ក្រុម Lee Man (ហុងកុង)
សម្រាប់កម្ពុជា មានក្រុម២ចូលរួមក្នុងពានរង្វាន់ AFC Cup 2021 នេះមានក្រុមជើងឯកពានរង្វាន់លីគ Metfone Cambodian League 2020 បឹងកេត និងក្រុមវិសាខា ម្ចាស់ជើងឯកពានរង្វាន់សម្តេចតេជោ ហ៊ុន សែន ឆ្នាំ២០២០។ ចំពោះបឹងកេត ស្ថិតនៅពូល G នៃពានរង្វាន់ AFC Cup 2021 ជាមួយក្រុម Hanoi របស់វៀតណាម ក្រុម Bali United របស់ឥណ្ឌូណេស៊ី និងអ្នកឈ្នះវគ្គជម្រុះរវាងChanthabouly របស់ឡាវ ឬ Kasuka របស់ប្រ៊ុយណេ៕