ចរន្តនៃការតវ៉ាទាមទារឱ្យប្រទេសថៃបញ្ឈប់បន្ទាន់នូវការកសាងប្រាសាទដូចទៅនឹងប្រាសាទអង្គរវត្ត ដែលភាគីថៃបានហៅថា ប្រាសាទសីហនគរនោះកាន់តែកម្ដៅក្ដៅឡើងៗ យ៉ាងណាមិញ ឈុតតំណាងជាតិ ដែលគ្រង ដោយកញ្ញា រឿន ណាត កាលពីឆ្នាំ២០១៨ ក្នុងកម្មវិធីប្រកួតបវរកញ្ញាចក្រវាឡ ដែលប្រារព្ធឡើងនៅប្រទេសថៃនោះ កំពុងតែផ្ទុះការចាប់អារម្មណ៍និងលើកយកធ្វើជាប្រធានបទពិភាក្សាគ្នាលើបណ្ដាញសង្គម។
ឈុតតំណាងជាតិបវរកញ្ញា ចក្រវាឡឆ្នាំ២០១៨ គឺជាឈុតដែលមានរចនាឡើង ដោយយកផែនទីនៃព្រះរាជាណាចក្រកម្ពុជាទៅបំពាក់ពីក្រោយខ្នងរបស់បវរកញ្ញា ហើយនៅលើផែនទីនោះ មានជាពណ៌ក្រហមខៀវ និងច្នៃបន្ថែមរូបប្រាសាទអង្គរវត្តផុសចេញបង្ហាញឱ្យឃើញថាប្រាសាទអង្គរវត្ត ជាមរតកដ៏មានតម្លៃ និងវត្តុអច្ឆរិយល្អបំផុតមួយ ដែលដូនតាខ្មែរបានបន្សល់ទុក ធ្វើឱ្យឈុតតំណាងជាតិ កញ្ញា រឿន ណាត គ្រងក្នុងពេលប្រកួតនាឱកាសនោះ មានភាពលេចធ្លោខ្លាំង នៅលើឆាកប្រកួតលំដាប់ពិភពលោក Miss Universe 2018 នាទឹកដីនៃព្រះរាជាណាចក្រថៃផ្ទាល់តែម្ដង។
ប្រាសាទអង្គវត្តត្រូវបានដាក់បញ្ចូលជាសម្បត្តិបេតិកភ័ណ្ឌពិភពលោកដោយអង្គការយូណេស្កូ កាលពីថ្ងៃទី១៤ ខែធ្នូ ឆ្នាំ១៩៩២ ប្រាសាទអង្គរវត្តកសាងឡើង នៅដើមសតវត្សរ៍ទី១២ ដោយព្រះបាទសូរ្យវរ្ម័នទី២ (១១១៣—១១៥០) ដើម្បីឧទ្ទិសថ្វាយព្រះវិស្ណុ ក្នុងព្រហ្មញ្ញសាសនានៅវេលាគ្រានោះ៕
