លោក សុខ រិទ្ធី គ្រូបង្គោលក្រុមបាល់ទាត់ឈើតុំបង្ហាញតម្រុយវិជ្ជមានរបស់ក្រុមមុនជួបយុវជន ខេត្តបាត់ដំបងក្នុងការប្រកួតពានរង្វាន់ សម្ដេចហ៊ុន សែន លើកទី១៧ ឆ្នាំ២០២៣ ថ្នាក់ខេត្ត សម្រាប់សប្ដាហ៍ទី៣ នេះ។
គ្រូបង្គោល រូបនេះបាននិយាយថា៖«សម្រាប់ការរៀបចំក្រុមត្រៀមប្រកួតក្នុងពេលនេះគឺបាន ៧០% ហើយ ខណៈដែលយើងមានកីឡាករខ្លះរៀននៅភ្នំពេញ ហើយខ្លះធ្វើការនៅខេត្ត។ ទម្រាំតែពួកគាត់មកដល់ជុំគ្នាយើងមានការពិបាកខ្លះដែរ»។
លោកបានបន្តថា៖ «សម្រាប់ការប្រកួតដំបូងក្នុងពូលនេះ ឆន្ទៈរបស់កូនក្រុមគឺពួកគាត់ខំប្រឹងណាស់ ហើយខ្ញុំសង្ឃឹមថាការប្រកួតដំបូងរបស់ខ្ញុំហ្នឹង ធ្វើបានល្អ ហើយទទួលបានលទ្ធផលវិជ្ជមាន គឺទទួលបាន៣ពិន្ទុ។ លោកបន្ថែមថា ខ្ញុំបានរកឃើញចំណុចខ្សោយរបស់ក្រុមយុវជនខេត្តបាត់ដំបងដែរ។ ពួកគេមានចំណុចខ្សោយច្រើន តែចំណុចខ្លាំងក៏មានដែរ។ ពួកគេល្អក្នុងតំបន់បម្រើនិងប្រយុទ្ធ តែការការពារវិញពួកគេធ្វើមិនបានល្អទេ ហើយប្រហែសច្រើន»។
ក្រុមបាល់ទាត់ឈើតុំជាក្រុមបាល់ទាត់ដំបូងដែលមានវត្តមានក្នុងឃុំ ឈើតុំ ស្រុកក្រគរ ខេត្តពោធិ៍សាត់ ដែលចូលរួមក្នុងពានរង្វាន់ សម្ដេចហ៊ុន សែន នេះលើកដំបូង។ លើសពីនេះអតីតខ្សែការពារជម្រើសជាតិកម្ពុជា និងក្រុមព្រះខ័នរាជស្វាយរៀងរូបនេះក៏បានផ្ដាំផ្ញើថា៖«សូមផ្ដាំផ្ញើដល់អ្នកគាំទ្រ និងបងប្អូនក្នុងឃុំឈើតុំមកទស្សនាការប្រកួតឱ្យបានច្រើនកុះករ និងជួយលើកទឹកចិត្តកីឡាករផង ត្បិតអីនេះជាលើកដំបូងហើយ ដែលក្នុងស្រុកក្រគរមានក្រុមបាល់ទាត់ចូលរួមពានរង្វាន់លំដាប់ប្រទេស»។
សូមបញ្ជាក់ផងដែរថា ការប្រកួតរវាងក្រុមបាល់ទាត់ឈើតុំ និងក្រុមយុវជនខេត្តបាត់ដំបង នឹងលេងនៅទីលានក្លិបបាល់ទាត់ឈើតុំ វេលាម៉ោង៣និង៣០នាទីថ្ងៃទី២៦ខែមេសាឆ្នាំ២០២៣ ផ្សាយផ្ទាល់តាមរយៈទំព័រហ្វេសបុករបស់ពានរង្វាន់ សម្ដេចអគ្គមហាសេនាបតីតេជោ ហ៊ុន សែន៕