ក្រុមបាល់ទាត់ជម្រើសជាតិកម្ពុជាក្រោមអាយុ២២ឆ្នាំ និងក្រុមឥណ្ឌូណេស៊ី រកបានជ័យជម្នះដូចគ្នាក្នុងថ្ងៃបើកឆាកពូល A នៃព្រឹត្តិការណ៍កីឡាស៊ីហ្គេមលើកទី៣១ ឆ្នាំ២០២៣ នៅល្ងាចថ្ងៃសៅរ៍ ទី២៩ ខែមេសា ឆ្នាំ២០២៣ លើទីលានពហុកីឡដ្ឋានជាតិ ក្នុងរាជធានីភ្នំពេញ។
សម្រាប់គូបើកឆាកឥណ្ឌូណេស៊ី បានយកឈ្នះលើក្រុមហ្វីលីពីន ដោយលទ្ធផល៣-០ ខណៈការប្រកួតនេះចាប់ដំណើរការពីម៉ោង៤ល្ងាចតទៅ ក្រោមការដឹកនាំការប្រកួតពីសំណាក់លោកអាជ្ញាកណ្ដាល Rowan Arumughan ជនជាតិឥណ្ឌា។ គ្រាប់បាល់ជ័យជម្នះរបស់ក្រុមឥន្ទ្រីឥណ្ឌូណេស៊ី រកបានដោយកីឡាករ ANANDA RAEHAN ALIEF នៅនាទី៤៥ ខណៈកីឡាករ IRFAN JAUHARI នៅនាទី៩០ និងកីឡាករ MUHAMMAD FAJAR FATHUR RACHMAN នៅនាទី៩០+២។
ចំណែកក្រុមម្ចាស់ផ្ទះកម្ពុជា បានយកឈ្នះលើក្រុមទីម័រខាងកើត ដោយលទ្ធផល៤-០ ខណៈប្រកួតនេះចាប់ផ្តើមពីវេលាម៉ោង៧ល្ងាចតទៅ ខណៈលោកអាជ្ញាកណ្ដាល Abdullah Jamali ជនជាតិគុយវ៉ែត។ កីឡាករ កើត ពេជ្រ រកបានគ្រាប់បាល់២គ្រាប់បើកឆាកអោយក្រុមកម្ពុជា នៅនាទី៣៩ និង៤៥+២ ខណៈកីឡាករ ស រតនា រកបានគ្រាប់ទី៣នៅនាទី៧៣ និងកីឡាករ លឹម ពិសុទ្ធ រកបានគ្រាប់ចុងក្រោយនៅនាទី៨២។
សម្រាប់ការប្រកួតបន្តនឹងដល់វេនបើកឆាកពូល B វិញម្តង នៅល្ងាចថ្ងៃទី៣០ ខែមេសា ឆ្នាំ២០២៣ លើទីលានកីឡដ្ឋានព្រីនស៍ ដោយ៖
-ម៉ោង៤ល្ងាច ថៃ ប៉ះ សិង្ហបុរី
-ម៉ោង៧ល្ងាច វៀតណាម ប៉ះ ឡាវ
