សិល្បៈជាតិ៖ បទ «មហានគរ» របស់កំពូលតារាចម្រៀង Rapper ល្បីឈ្មោះ ងួន ចាន់ដេវីដ ហៅ Ditway កំពុងតែទទួលបានប្រជាប្រិយភាពយ៉ាងខ្លាំងព្រោះទាំងទំនុកច្រៀង និងទំនុកភ្លេងដែលលាយបញ្ចូលរសជាតិនៃតន្ត្រីបុរាណនិងសម័យ កាន់តែធ្វើឱ្យបទនេះហាក់មានមន្តសណ្តំចិត្តអ្នកស្ដាប់ឱ្យលន្លង់លន្លោចបានស្ដាប់ហើយចង់ស្ដាប់ទៀតមិនជិនណាយ។
បទ «មហានគរ» ត្បិតកើតមានការរិះគន់ខ្លះ ប៉ុន្តែក៏មិនអាចទាញទំលាក់ការពេញនិយមបទនេះបាននោះឡើយ ព្រោះគ្រាន់តែចេញបានត្រឹម២ថ្ងៃសោះចំនួនទស្សនាបទនេះបានកើនឡើងរហូតជិត២លានដងនៅលើ Youtube ក្លាយជាបទ Trending រហូតធ្វើឱ្យមាន Youtuber ទាំងខ្មែរនិងបរទេស បានជ្រើសរើសយកបទចម្រៀងនេះទៅធ្វើ Reaction ព្រោងព្រាត។
បទចម្រៀងដែលលាយបញ្ចូលគ្នារវាងតន្ត្រីសម័យនិងបទភ្លេងបុរាណរបស់ខ្មែរនេះ មិនត្រឹមតែឆាបឆក់យកដួងចិត្តនិងមនោសញ្ចេតនារបស់កូនខ្មែរនោះឡើយ សូម្បីតែជនបរទេសដែលជាអ្នកធ្វើ Reaction ក៏បានពោលសរសើរមិនដាច់ពីមាត់ដូចគ្នា។
កត្តារួមផ្សំជាច្រើននេះហើយដែលធ្វើឱ្យចំនួនទស្សនាបទចម្រៀងនេះ មានសន្ទុះកើនឡើងច្រើនលើសលប់ និងទទួលបានមតិលើកសរសើរច្រើនពីសំណាក់អ្នកស្ដាប់គ្រប់ស្រទាប់។
គេរំពឹងថាបទចម្រៀងរៀបរាប់យ៉ាងក្បោះក្បាយ ពីប្រវត្តិទឹកដីខ្មែរដ៏អច្ឆរិយៈ ដែលជាកំណើតនៃពូជពង្សខ្មែរអំបូរនាគរាជដ៏ពិសិដ្ឋ ប្រាកដជាក្លាយជាផ្ទាំងទស្សនីយភាពដ៏អស្ចារ្យមួយជាកញ្ចក់ឆ្លុះបញ្ចាំងសិល្បៈ វប្បធម៌ និងអរិយធម៌ដ៏រុងរឿងរបស់ខ្មែរពីបុរាណសម័យ។
សូមទស្សនាបទចម្រៀង «មហានគរ» របស់ Ditway ខាងក្រោមនេះ៖
