សិល្បៈជាតិ៖ តាមការប្រកាសជាផ្លូវការនៅលើទំព័រហ្វេសប៊ុកផេក Miss Universe Cambodia បានឱ្យដឹងថា កំពូលតារាចម្រៀងជួរមុខប្រចាំផលិតកម្មហង្សមាស គឺអ្នកនាង ពេជ្រ សោភា នឹងមានវត្តមានជាពិសេសម្ដងទៀតក្នុងកម្មវិធីការប្រកួត Miss Universe Cambodia 2023។
ស្ថាប័នថ្មី Miss Universe Cambodia 2023 បានប្រកាសប្រាប់អ្នកគាំទ្រនាពេលថ្មីៗនេះនៅលើហ្វេសប៊ុកយ៉ាងដូច្នេះ ៖ « តើនឹងមានអ្វីអស្ចារ្យកើតឡើង ? ក្រោយមានវត្តមានកំពូលតារាចម្រៀងអ្នកនាង ពេជ្រ សោភា Pich Sophea នៅក្នុងកម្មវិធីកញ្ញាឯកចក្រវាលកម្ពុជាឆ្នាំ 2023 ។ អាចនិយាយបានអ្នកនាង ពេជ្រ សោភា ជាកំពូលតារាចម្រៀងមួយរូបដែលតែងតែគាំទ្រ នឹងជួយជ្រោមជ្រែងនៃកម្មវិធីបវរកញ្ញាថ្នាក់ជាតិផងដែរ យើងពិតជាមានកិត្តិយសនិងមោទនភាពបំផុត ជាមួយនឹងវត្តមានកំពូលតារាចម្រៀងគ្រាប់ពេជ្រនៃតន្ត្រីមកកាន់ Miss Universe Cambodia 2023»។
ជាមួយការប្រកាសនេះ គេមើលឃើញថា ហ្វេនអ្នកគាំទ្រពិតជាពេញចិត្តចំពោះវត្តមានរបស់កំពូលតារាចម្រៀងស្រីរូបនេះ ចូលរួមក្នុងវិស័យបវរកញ្ញា ព្រោះគ្រប់គ្នាមើលឃើញថា ពេជ្រ សោភា មិនមែនមានតែសមត្ថភាពលើផ្នែកចម្រៀងតែមួយនោះទេ អ្នកនាងក៏មានសមត្ថភាពនឹងជំនាញច្បាស់លាស់ក្នុងការរើសបេក្ខភាពបវរកញ្ញាដែលស័ក្ដិសមជាមួយមកុដពិតប្រាកដផងដែរ។
គួររំលឹកដែរថា កាលឆ្នាំ ២០២១ អ្នកនាង ពេជ្រ សោភា ធ្លាប់ចូលរួមជាគណៈកម្មការដាក់ពិន្ទុយ៉ាងសុក្រឹតចំពោះបេក្ខភាពបវរកញ្ញាឯកចក្រវាលកម្ពុជាឆ្នាំ ២០២១ ឬ Miss Universe Cambodia 2021 នៅរាត្រីថ្ងៃផ្ដាច់ព្រ័ត្រ ដែលកាលនោះមកុដគឺបានទៅលើអ្នកនាង ងិន ម៉ារ៉ាឌី៕
