ក្រោយតារាចម្រៀងល្បីលោក ឆន សុវណ្ណរាជ បង្ហាញសកម្មភាពកាន់តែជិតស្និទ្ធ ជាមួយនឹងអ្នកនាង ស្រីអូន សម្រស់ ធម្មជាតិធ្វើឱ្យមហាជនដាក់ការសង្ស័យថា តារាចម្រៀងរូបនេះអាចនឹងចូលរួមទ្រនំផលិតកម្មរាម ព្រោះបច្ចុប្បន្ននេះលោកបង្ហាញភាពជិតស្និទ្ធិជាមួយនឹងម្ចាស់ផលិតកម្មរាម គឺអ្នកនាងស្រីអូនយ៉ាងខ្លាំង។
សេចក្ដីសន្និដ្ឋានពីមហាជននេះកើតឡើងក្រោយលោក បានដើរតាមដានជើងតារាមួយចំនួនដូចជា លោក ប៉ែន ចំរុង ពិសេសគឺអ្នកនាង មាស សុខសោភា ដែលជាតារាចម្រៀងប្រចាំផលិតកម្មរាម ដែលបានទិញសិទ្ធិជាតំណាងចែកចាយផលិតផលរបស់អ្នកនាងស្រីអូន ខណៈលោក ឆន សុវណ្ណារាជ ក៏ជាតំណាងចែកចាយមួយរូបរបស់ផលិតផលអ្នកនាងស្រីអូនមួយរូបផងដែរ។
បូកផ្សំជាមួយនឹងសកម្មភាពយ៉ាងសកម្មឃោសនាលក់ផលិតផលជាមួយគ្នាជាញឹកញាប់ ថែមទាំងចុះធ្វើសកម្មភាពលុញគ្រាប់ឈើ ដែលផ្ដួចផ្ដើម ដោយលោក តាន់ គីមសួរ ជាមួយគ្រួសារសម្រស់ធម្មជាតិ មាន លោក ប៉ែន ចំរុង អ្នកនាង មាស សុខសោភា អ្នកនាង ស្រីអូន និងស្វាមី កាន់តែធ្វើឱ្យមហាជនទាញសេចក្ដីសន្និដ្ឋានបានថាលោកអាចនឹងចូលរួមក្នុងផលិតកម្មថ្មី គ្រាន់តែមិនទាន់ប្រកាសជាផ្លូវការប៉ុណ្ណោះ។
ទោះជាយ៉ាងនេះក្ដី ការលើកឡើងខាងលើនេះ គឺគ្រាន់តែជាសេចក្ដីសន្និដ្ឋាន និង ការលើកឡើងពីសំណាក់មហាជនប៉ុណ្ណោះ នៅមិនអាចសន្មតបានថាជាការពិតបាន១០០ភាគរយនោះទេ ព្រោះសាមីខ្លួន ទាំងលោក ឆន សុវណ្ណារាជ និង អ្នកនាង ស្រីអូនម្ចាស់ផលិតកម្មរាម មិនបានចេញមកឆ្លើយតប ឬ បង្ហាញការយល់ឃើញណាមួយ ទៅលើការលើកឡើងទាំងឡាយណា ពាក់ក់ព័ន្ធនឹងរឿង ដែលមហាជនកំពុងតែមានការសង្ស័យនៅខណៈនេះនោះទេ។
សម្រាប់តារាចម្រៀងលោក ឆន សុវណ្ណារាជ ដែលជា COACH មួយរូបក្នុងកម្មវិធីប្រឡងចម្រៀងលំដាប់ពិភពលោកដ៏ធំចំនួនពីរគឺ «The Voice Cambodia» និង «Cambodia Idol» បញ្ចាំងនៅលើទូរទស្សន៍ហង្សមាស បានប្រឡូកចូលសិល្បៈដំបូងតាមរយៈការបង្ហាញមុខជាលើកដំបូងក្នុងនាមជាតារាចម្រៀងក្នុងផលិតកម្ម U2 មុននឹងផ្លាស់មកចូលរួមជាគ្រួសារតារាក្នុងផលិតកម្មហង្សមាស ហើយមានបទចម្រៀងពីរោះៗ ចេញមកបំរើអារម្មណ៍អ្នកគាំទ្រជាច្រើនបទ ហើយសុទ្ធសឹងជាបទដែលល្បី និង មានការគាំទ្រយ៉ាងខ្លាំងដូចជាបទ «ទីក្រុងគ្មានមេឃ» «យំប្រាប់មេឃ» «រឿងនិទានមុនចូលគេង»«១ខែ១០ថ្ងៃ» ជាពិសេសបទចម្រៀងសម្ដែងជាមួយនឹងអ្នកនាង ពេជ្រ សោភា «អូនទៅបានបើបងដេញ» ជាដើម៕
