សួន ចាន់ណារ៉ូ កីឡាករបាល់ទះឆ្នើមរបស់កម្ពុជា និងប្រធានក្រុម បានបង្ហើបពីផែនការ ក្រោយចូលនិវត្តន៍ពីអាជីពជាកីឡាករបាល់ទះ ក្រោយចប់ស៊ីហ្គេមនៅភ្នំពេញថា ខ្លួននឹងបំពេញការងារបម្រើសដល់អង្គភាព និងមួយទៀតធ្វើជាគ្រូនៅក្លិបបាល់ទះវិសាខា។
អ្នកប៉ះសេឆ្នើម បានសម្រេច ចិត្តយ៉ាងច្បាស់លាស់ជុំវិញអាជីពរបស់ខ្លួន ដោយកំណត់ថា នឹងចូលនិវត្តន៍ ពីក្រុមជម្រើសជាតិ ព្រមទាំងចែកផ្លូវជាមួយក្លិបបាល់ទះវិសាខា ក្រោយពេលបំពេញភារកិច្ចស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ចប់រួចរាល់។
រំលឹកថា សួន ចាន់ណារ៉ូ បានចូលប្រឡូកអាជីពកីឡាបាល់ទះ នៅឆ្នាំ២០១២ ដោយចូលដំបូងលេងឱ្យក្លិបបាល់ទះកងពលធំអន្តរាគមន៍លេខ៣ តែក្រោយមកក៏បានផ្លាស់ទៅលេងឱ្យក្លិបសសយកខេត្តព្រៃវែង ហើយក្លិបនេះក៏បានប្ដូរឈ្មោះមកជាក្លិបវិសាខា ដល់បច្ចុប្បន្ន។
អ្នកលើកបាល់របស់កម្ពុជារូបនេះ បានជាប់ជម្រើសជាតិ នៅឆ្នាំ២០១៥ និងបានចេញទៅប្រកួតស៊ីហ្គេម នៅក្រៅប្រទេសសរុបបានចំនួន ៣លើក គឺស៊ីហ្គេម ឆ្នាំ២០១៧ នៅម៉ាឡេស៊ី ស៊ីហ្គេម ឆ្នាំ២០១៩ នៅហ្វីលីពីន និងស៊ីហ្គេម ឆ្នាំ២០២២ នៅវៀតណាម។
គួរបញ្ជាក់ថា ក្រុមបាល់ទះបុរសជម្រើសជាតិកម្ពុជា ទទួលបានមេដាយប្រាក់ ក្នុងការប្រកួតព្រឹត្តិការណ៍ស៊ីហ្គេម លើកទី៣២ នៅកម្ពុជា ឈានទៅកាន់វគ្គផ្ដាច់ព្រ័ត្រជួប ឥណ្ឌូណេស៊ី តែត្រូវបានរងបរាជ័យ ក្នុងលទ្ធផល ៣សិតទល់និង០ បានត្រឹមមេដាយប្រាក់ នាថ្ងៃទី០៨ ខែឧសភា ក្នុងពហុកីឡដ្ឋានជាតិ៕
