សិល្បៈជាតិ៖ អតីតតារាសម្ដែងហុងកុងអ្នកស្រី Michelle Ye វ័យ ៤៣ឆ្នាំ ដែលអ្នកគាំទ្របានស្គាល់តាមរយៈការសម្ដែងក្នុងភាពយន្តហុងកុងដ៏ល្បីល្បាញរឿង «Eternal Happiness (2002) Triumph in the Skies (2003) និង Lost in the Chamber of Love (2005)»។
ក្រោយបញ្ចប់កុងត្រាជាមួយទូរទស្សន៍ TVB កាលពីឆ្នាំ២០០៥ អ្នកស្រី Michelle ចាប់ផ្ដើមបង្ហាញវត្តមានជាច្រើនក្នុងពិភពភាពយន្តខ្នាតធំ ក្នុងនោះមានរឿងបែបវាយតប់គ្នា Accident (2009) ផងដែរ។ តារាស្រីរូបនេះក៏បានឈ្នះពានតារាសម្ដែងរងស្រីល្អបំផុតក្នុងកម្មវិធី Hong Kong Film Awards ដោយសារភាពយន្តនេះដូចគ្នាដែរ។
តារាសម្ដែងដែលចេញមុខលើកញ្ចក់ទូរទស្សន៍របស់ប្រទេសចិនជាញឹកញាប់រូបនេះ ថ្មីៗនេះបានសម្ដែងក្នុងភាពយន្តភាគបុរាណបែបប្រវត្តិសាស្ត្ររបស់ចិនមានចំណងជើងថា «Madam Xian» ប៉ុន្តែរឿងភាគថ្មីនេះមិនត្រឹមតែមិនទទួលបានពាក្យសរសើរ ថែមទាំងមានតែពាក្យរិះគន់ ព្រោះនៅដើមសាច់រឿងតួអង្គដែល Michelle សម្ដែងគឺជាតួអង្គដែលមានវ័យ១៨ឆ្នាំ ខណៈដែលតារាសម្ដែងដៃគូក្នុងរឿងរបស់អ្នកស្រីគឺលោក Ren Zhong វ័យ៤៤ឆ្នាំ ក៏សម្ដែងជាតួអង្គក្មេងដែលមានអាយុខ្ទង់២០ឆ្នាំដែរ។
រូបភាពខាងក្រោមនេះ គឺជារូបដែលអ្នកគាំទ្រលើកយកមកជជែកនិងសម្ដែងការមិនពេញចិត្តការមនុស្សខ្ទង់៤០ មកសម្ដែងជាក្មេងខ្ទង់២០ទៅវិញ។ ក្នុងនោះអ្នកលេងបណ្ដាញសង្គម និងអ្នកទស្សនាមួយចំនួនបានលើកឡើងថា៖ «ខ្ញុំមិនចង់មើលឈុតឆាកស្នេហារបស់មនុស្សចាស់នោះទេ» «បើកុហកខ្លួនឯងវាល្អជាងអ្នកនាំគ្នាកុហកអ្នកទស្សនា»។នេះគ្រាន់តែជាមួយផ្នែកតូចប៉ុណ្ណោះដែលសារព័ត៌មាននៅប្រទេសចិន បានលើកយកផ្សាយ ព្រោះនៅមានមតិយោបល់ច្រើនជាងនេះទៀត ដែលសុទ្ធតែមិនអាចទទួលយកបានចំពោះការធ្វើដូច្នេះ៕
ប្រភព៖ 8days