សិល្បៈអន្តរជាតិ៖ តារាសម្ដែងចាស់វស្សានៅក្នុងរង្វង់សិល្បៈថៃលោកស្រី Jarunee បានបង្ហាញវត្តមានដើម្បីលើកទឹកចិត្តដល់លោកប្រាយុទ្ធ ប្រធានគណបក្សរួមថៃសាងជាតិ ដោយស្ត្រីជាតារាសម្ដែងជើងចាស់ឈានមុខរូបនេះបានឱ្យដឹងថាខ្លួនស្គាល់សមាជិកបក្សនេះច្រើននាក់ ម្យ៉ាងទៀតជាបក្សដែលមានគោលគំនិតដូចគ្នាគឺស្រលាញ់ជាតិ សាសនា ព្រះមហាក្សត្រ ដូចគ្នា។
តារាសម្ដែងរូបនេះបានបង្ហាញចំណាប់អារម្មណ៍ប្រាប់អ្នកសារព័ត៌មានថៃថាខ្លួនពិតជារីករាយដែលមានឱកាសបានជួបលោកប្រាយុទ្ធ ដោយលោកស្រីបាននាំយកផ្លែត្រសក់ផ្អែមមកជូនជាកាដូលើកទឹកចិត្ត។ នៅពេលដែលអ្នកសួរពាក់ព័ន្ធនឹងករណីថាការដែលលោកស្រីចេញមកបង្ហាញការគាំទ្រដល់លោកប្រាយុទ្ធ លើកនេះ តើមិនខ្លាចមានសំឡេងប្រឆាំងទេមែនទេ? អ្នកស្រីបានឆ្លើយតបថា ថ្វីត្បិតមិនធ្លាប់សម្ដែងគោលជំហរនយោនបាយនាពេលកន្លងមក ប៉ុន្តែលោកស្រីឈរនៅខាង ជាតិ សាសនា ព្រះមហាក្សត្រ ហើយមិនចង់ឃើញជាតិបែកបាក់រលំរលាយ។
នៅពេលត្រូវអ្នកសារព័ត៌មានសួរលោកស្រីថា គោលជំហររបស់លោកស្រីគឺមិនគាំទ្របក្សឆ្ពោះទៅមុខ (Moving Forward Party) មែនទេ? លោកស្រី Jarunee បានឆ្លើយតបថា និយាយបែបនោះមិនកើតទេ ប៉ុន្តែសម្រាប់ខ្លួនលោកស្រីផ្ទាល់ មិនចង់ធ្វើជាទាសកររបស់សហរដ្ឋអាមេរិក ឬប្រទេសដទៃទៀត ព្រោះបច្ចុប្បន្នរស់នៅលំបាកស្រាប់ហើយ យើងនឹងរស់នៅបែបណាជាបន្តទៀត? ចំពោះសំនួរដែលសួរថានៅថ្ងៃអនាគតនឹងបានឃើញលោកស្រី ចូលប្រឡូកក្នុងឆាកនយោបាយដែរទេ? លោកស្រីបានឆ្លើយបដិសេធ ព្រមទាំងលើកហេតុផលថាបើលោកស្រីចង់ប្រឡូកនយោបាយ លោកស្រីប្រឡូកតាំងតែខ្លួននៅមានកម្លាំងបាត់ទៅហើយ។
នេះថ្វីត្បិតតែគណបក្សលោកប្រាយុទ្ធ រកសំឡេងឆ្នោតគាំទ្រមិនដល់ ៥០អាសនៈក្ដី ប៉ុន្តែអ្នកគាំទ្រនៅតែបន្តផ្ដល់ការគាំទ្រ និងលើកទឹកចិត្តលោកប្រាយុទ្ធ រហូតមានក្រុមអ្នកគាំទ្រខ្លះ បានធ្វើយុទ្ធនាការបង្ហោះពីលទ្ធផលការងាររយៈពេល៨ឆ្នាំ ក្នុងឋានៈជានាយករដ្ឋមន្ត្រីរបស់លោក។
គួរដឹងដែរថាលោកស្រី Jarunee បច្ចុប្បន្នមានវ័យ៦១ឆ្នាំ ជាកូនថៃកាត់បារាំងមានម្ដាយជាជនជាតិថៃនិងឪពុកជាជនជាតិបារាំង លោកស្រីមានឈ្មោះជាភាសាបារាំងហៅថា Caroline Desneiges លោកស្រីមិនត្រឹមតែជាតារាសម្ដែងមួយប៉ុណ្ណោះទេ ប៉ុន្តែលោកស្រីក៏ជាអ្នកជំនួញមួយរូបផងដែរ៕