សិល្បៈជាតិ៖ តារាចម្រៀងចាស់វស្សាលោកស្រី ម៉េង កែវពេជ្ជតា ស្រាប់តែខឹងច្រឡោតតូងលើបណ្ដាញសង្គមក្រោយមានអ្នកសរសើរកូនស្រីថាមានទេពកោសល្យ ប៉ុន្តែបើម្ដាយមិនព្រមព្យាបាលចរិតតួឯកអាចធ្លាក់ទឹកទាំងម្ដាយទាំងកូន ដែលការលើកឡើងនេះ លោកស្រីចាត់ទុកថាមានបំណងវាយប្រហារចំពោះលោកស្រី។
ថ្មីៗនេះតារាចម្រៀងមានជំនាញគ្រប់ទំរង់ទាំងសម័យនិងបុរាណ ម៉េង កែវពេជ្ជតា បានដឹកនាំក្រុមសិល្បៈនិងកូនស្រីពៅរបស់ខ្លួនទៅចូលរួមក្នុងមហាព្រឹត្តិការណ៍បិទការប្រកួតកីឡាស៊ីហ្គេមនាពហុកីឡដ្ឋានមរតកតេជោ ហើយមានអ្នកចាប់អារម្មណ៍ បានកាត់ឃ្លីបវីដេអូសម្ដែងរបស់ម្ដាយកូនទាំងពីរនិងក្រុមសិល្បៈទៅបង្ហោះចែករំលែកបន្ត រហូតទទួលបានការសរសើរពីសំណាក់អ្នកគាំទ្រនិងសាធារណជន ចំពោះទេពកោសល្យរបស់កូនស្រីដោយលើកឡើងស្រដៀងគ្នាថា ពិតជាស្លឹកឈើជ្រុះមិនឆ្ងាយពីគល់មែន។
ថ្វីត្បិតមានអ្នកសរសើរច្រើនមែន តែក៏មិនអត់អ្នកទើស និងអ្នកមិនពេញចិត្តនោះដែរ ដោយមានអ្នកខ្លះបានលើកសរសើរកូនស្រី ប៉ុន្តែដូចពាក្យចាស់ថាល្អគូអាក្រក់ ថាមានទេពកោសល្យ តែផ្ដាំឱ្យម្ដាយព្យាបាលតួឯកថា «កូនស្រីមានទេពកោសល្យ តែបើម្ដាយមិនព្រមព្យាបាលជំងឺតួឯកធ្លាក់ទឹកទាំងម្ដាយទាំងកូន។»
ពាក្យពេចន៍ចាក់ដោតខាងលើបានប៉ះទង្គិចអារម្មណ៍អ្នកម្ដាយកូន២ រហូតកាលព្រឹកថ្ងៃទី២៤ ខែឧសភា ម្សិលមិញនេះ លោកស្រីបានចេញមកច្រឡោតលើបណ្ដាញសង្គមប្រតិកម្មតបតការលើកឡើងនោះវិញថា៖ «មួយរយៈនេះដូចឮល្ហៀងៗមកថា មានជនអត់ការងារធ្វើមួយក្រុមបានពង្រាយគ្នាដើរលាបពណ៌ខ្ញុំក្នុងបំណងបំពុលចិត្តមនុស្សល្អៗដែលស្រលាញ់ឱ្យគេយល់ច្រឡំ និងខឹងខ្ញុំ។ ពួកគេបានប្រើពាក្យចោទខ្ញុំជាច្រើន និងដូចៗគ្នាថា «ខ្ញុំជាតារាចរិតតួឯក» ហ៊ឺ…ប្លែករហូតហ្មង គិតទៅទោះបីស្លឹកឈើខ្ជិលបក់ ក៏ខ្យល់ចង្រៃនេះវាអត់ខ្ជិលបោកដែរ វាបោកអត់ហត់ អត់ស្គាល់បាបបុណ្យ អត់ស្គាល់នរកកម្មអ្វីសោះតែម្ដង អីក៏ងងឹតងងុលយ៉ាងនេះ! ហេតុអ្វីក៏យកកម្មជាមួយខ្ញុំគ្រួសារខ្ញុំម្ល៉េះ? ម៉េចចង់បំពាត់ពូជខ្ញុំតែម្ដងមែនទេ? ឬក៏មកពីខ្ញុំនៅតែល្បី នៅតែខ្លាំង រហូតធ្វើឱ្យពួកគេច្រណែនពេកឡើងឆកួត? សូមអធ្យាស្រ័យផងបងប្អូនអើយ មិនចង់ឆ្លើយតបឡើយហត់ណាស់ តែពួកគេពិតជាមានចេតនាជាន់ពន្លិចគ្រួសារខ្ញុំមែន បើទោះជាខ្ញុំខំគេច រក្សាភាពស្ងប់ស្ងាត់យ៉ាងលំបាកយ៉ាងណា តែពួកគេមិនព្រមបញ្ឈប់ដែរ ដូច្នេះមានតែអញ្ចឹងទៅ ឱ្យអ្នកទាំងអស់គ្នាដឹង ព្រោះខ្ញុំមិនចង់សុខៗបាត់មុខឈឹង ហើយទុកឱ្យពួកគេដើរចោទថាខ្ញុំខុសស្រេចតែចិត្តនោះទេ មេឃអើយសូមផ្ដល់យុត្តិធម៌ដល់មនុស្សល្អផង!»
ការលើកឡើងវែងអន្លាយរបស់តារាចម្រៀងជើងចាស់រូបនេះ ទទួលបានការលើកទឹកចិត្តនិងផ្ដល់ទឹកចិត្តយ៉ាងច្រើនពីសំណាក់អ្នកគាំទ្រ ដែលស្រលាញ់ចូលចិត្តលោកស្រីនិងក្រុមគ្រួសារ ដូចមានមតិវិជ្ជមានមួយបានលើកឡើងថា៖ «តួឯក មិនមែនមនុស្សៗធម្មតាអាចធ្វើបានទេបង បើបងស្រីមិនខ្លាំងមិនមានអ្វីដែលគេមិនមាន (ទេពកោសល្យសិល្បៈ) មិនមែនបងឈរជើងរហូតមកដល់បច្ចុប្បន្ន មនុស្សម្នាក់ៗ ខួរ ខុសៗគ្នា ទោះបងយកសាប៊ូ លាងក៏មិនចេញដែរ បើខួរគាត់ដិតដាម ដោយសញ្ញា (អវិជ្ជមាន)។» ហ្វេនម្នាក់ទៀតក៏បានលើកទឹកចិត្តលោកស្រីដែរថា៖ «មនុស្ស១ភាគតូចចូលមកខំមិនហើយដើរទៅបាត់ដោយគ្រាន់តែឮតាមគេថាមិនស្វែងយល់ ហើយពេលខ្លះទោះជាគេខំពន្យល់ក៏ធ្វើមិនយល់ មិនយល់ទាល់តែស្លា.ប់។ សំខាន់ទស្សនិកជនរាប់លាននាក់គាំទ្រនិងជឿជាក់លើបង សូមបងបន្តសាងស្នាដៃជាបន្តទៀតដើម្បីសិល្បៈជាតិយើង។»
សម្រាប់លោកស្រី ម៉េង កែវពេជ្ជតា ត្រូវបានហ្វេនៗ ប្រដូចប្រៀបដូចជាខ្ញីដែលកាន់តែចាស់កាន់តែហិរ ខណៈលោកស្រីកាន់តែចាស់កាន់តែលេចធ្លោនិងនៅតែរក្សាប្រជាប្រិយភាពក្នុងបេះដូងអ្នកគាំទ្រដដែល៕
