ផ្ទុះការចាប់អារម្មណ៍យ៉ាងខ្លាំងពីសំណាក់អ្នកគាំទ្របាល់ទាត់នៅក្នុងប្រទេសកម្ពុជា លើបណ្តាញសង្គមជុំវិញខ្សែបម្រើ ហួយ ផល្លីន បង្ហាញវត្តមានសារជាថ្មីនៅជំរុំហ្វឹកហាត់របស់ព្រះខ័នរាជស្វាយរៀង ក្រោមការដឹកនាំរបស់គ្រូបង្វឹកថ្មីលោក Pep Munoz ត្រៀមសម្រាប់លីគកំពូលកម្ពុជា រដូវកាល ២០២៣-២៤ ខាងមុខ។
លោក Pep Munoz វ័យ៤៣ឆ្នាំ ជនជាតិសញ្ជាតិអេស្ប៉ាញ ដែលកាន់អាជ្ញាប័ណ្ណកម្រិតយូហ្វាប្រូឡាយសិន ជំនួសកៅអីលោក Conor Nestor ដែលទើបចាកចេញពីព្រះខ័នរាជស្វាយរៀង។ ចំពោះបទពិសោធន៍ការងារជាគ្រូបង្វឹបរយ:ពេលជាង១៩ឆ្នាំ ខណ:លោក Pep បានចាប់ផ្តើមអាជីពជាគ្រូបង្វឹកដំបូងនៅក្រុម UE Lleida ក្នុងប្រទេសអេស្ប៉ាញមុនទៅចូលរួមជាមួយក្លិបយក្ស FC Barcelona។
សម្រាប់កីឡាករ ហួយ ផល្លីន ត្រូវបានក្លិបព្រះខ័នរាជស្វាយរៀង ចុះបញ្ជីចូលក្នុងក្រុមឈុតធំនៅឆ្នាំ២០១៣ ខណៈនៅគ្រានោះក៏ត្រូវបានកោះហៅឱ្យចូលរួមក្នុងក្រុមជម្រើសជាតិផងដែរ។
កីឡាករវ័យ២៧ឆ្នាំរូបនេះធ្លាប់ជួយព្រះខ័នរាជស្វាយរៀង ឈ្នះជើងឯកពានរង្វាន់លីគកំពូលកម្ពុជា នៅឆ្នាំ២០១៣ និង២០១៩ និងពានរង្វាន់ Hun Sen Cup នៅឆ្នាំ២០១៥និង២០១៧ ផងដែរ។ នៅឆ្នាំ២០១៩ រូបគេត្រូវជ្រើសរើសជាកីឡាករល្អប្រចាំព្រឹត្តិការណ៍ Hun Sen Cup ទៀតផង។
អំឡុងលោក Conor Nestor ដឹកនាំព្រះខ័នរាជស្វាយរៀង ខ្សែបម្រើ ហួយ ផល្លីន ត្រូវបានក្លិបបាល់ទាត់ អាយ.អេស.អាយ ដង្កោសែនជ័យ ខ្ចីជើង១រដូវកាល ដោយរកបាន២គ្រាប់ ជួយឱ្យក្រុមទទួលបានជើងឯករងលីគលំដាប់ទី២។
ខណ:នៅក្នុងពានរង្វាន់ Hun Sen Cup រដូវកាល២០២២ ក្រុមមួយនេះឡើងដល់វគ្គ១៦ក្រុមចុងក្រោយជើងឯកថ្នាក់ជាតិ ខណៈក្នុងពានរង្វាន់ Cambodian League Cup 2022 ក្រុមបានធ្លាក់ចេញត្រឹមវគ្គចែកពូល មុនពេលវិលត្រលប់មកកាន់ព្រះខ័នរាជស្វាយរៀងវិញ៕