ដោយសារតែមានពាក់ព័ន្ធនឹងជំងឺកូវីដ-១៩ ការប្រកួតចំនួន២នៅថ្ងៃអាទិត្យ ទី១១ ខែកក្កដា ឆ្នាំ២០២១ ម្សិលមិញនេះក្នុងពានរង្វាន់លីគកំពូលកម្ពុជា Metfone Cambodian League 2021 សុទ្ធតែត្រូវលើកពេលប្រកួតដូចគ្នា ដោយ១ប្រកួតធ្វើឡើងនៅរសៀលថ្ងៃចន្ទ នេះ ហើយ១ប្រកួតទៀតមិនទាន់កំណត់កាលបរិច្ឆេទជាក់លាក់។
ក្រុមអង្គរថាយហ្គឺរ ត្រូវប្រកួតជាមួយក្រុមអគ្គីសនីកម្ពុជា នៅវេលាម៉ោង៣:៣០នាទីរសៀលលើទីលានកីឡដ្ឋាន SRU Stadium ក្នុងខេត្តសៀមរាប។ ការលើកពេលប្រកួតនេះត្រូវបានគណៈកម្មការប្រកួតបាល់ទាត់ជាតិកម្ពុជា (CNCC) លើកឡើងថាការប្រកួតសប្តាហ៍ទី៧ រវាងក្លិបបាល់ទាត់អង្គរថាយហ្គឺរ និងក្រុមអគ្គីសនីកម្ពុជា ត្រូវរំកិលថ្ងៃប្រកួតពីថ្ងៃទី១១ ទៅថ្ងៃទី១២ ខែកក្កដា ឆ្នាំ២០២១ ដោយមូលហេតុ (តេស្តលើកទី១) ០៩/០៧/២០២១ ក្លិបអគ្គីសនីកម្ពុជា រកឃើញកីឡាករ ១នាក់ (វិជ្ជមាន)។ ដូច្នេះមន្ត្រី និងកីឡាករដ៏ទៃទៀតដែល (អវិជ្ជមាន) រង់ចាំតេស្តលើកទី២ ក្រោយ៤៨ ឬ៧២ម៉ោង។ (តេស្តលើកទី២) នៅព្រឹកថ្ងៃទី ១១/០៧/២០២១ នេះមន្ត្រី និងកីឡាករមានលទ្ធផល (អវិជ្ជមាន)។ ដូច្នេះការប្រកួតរវាងក្លិបអង្គរថាយហ្គឺរ និងអគ្គីសនីកម្ពុជា នឹងត្រូវប្រកួតនៅថ្ងៃទី១២ ខែកក្កដា ឆ្នាំ២០២១។
ដោយឡែកការប្រកួតសប្តាហ៍ទី៧ រវាងក្លិបបាល់ទាត់នគរបាលជាតិ ជាមួយក្រុមភ្នំពេញក្រោន ត្រូវលើកការប្រកួត ដោយមូលហេតុរកឃើញនូវករណីវិជ្ជមាន នៃជំងឺកូវីដ-១៩ លើកីឡាករ១រូប របស់ក្លិបបាល់ទាត់នគរបាលជាតិ។ ដោយសិក្សាអំពីទំហំ និងបង្កាករណីហានិភ័យអាចបន្តទៅក្លិបដ៏ទៃ ដូច្នេះនៅថ្ងៃទី១១/០៧/២០២១ នេះមន្ត្រី និងកីឡាករដ៏ទៃទៀតទាំងអស់ក្នុងក្រុម តម្រូវទៅយកសំណាក ដោយប្រភេទ PCR Test របស់មន្រ្តី និងកីឡាករក្លិប។ លទ្ធផលនឹងបាននៅ ២ ឬ៣ថ្ងៃបន្ទាប់ ហើយក្រុមត្រូវតែធ្វើចត្តាឡីស័កតាមវិធានសុខាភិបាល។ ដូច្នេះការប្រកួតរវាងក្លិបនគរបាលជាតិ និងក្លិបភ្នំពេញក្រោន នៅថ្ងៃល្ងាចនេះ ទី១១ ខែកក្កដា ឆ្នាំ២០២១ នឹងត្រូវការផ្អាកជាបណ្តោះអាសន្នសិន។ កាលបរិច្ឆេទថ្មីនឹងជម្រាបនៅពេលក្រោយ។