កញ្ញា ណូម័រ គឺជាសិល្បការិនីដែលមានសមត្ថភាពច្រើនផ្នែក មិនថា ច្រៀង សម្ដែង ពិធីការិនី ស្រីស្រស់រូបនេះសុទ្ធតែអាចធ្វើបាន ហើយធ្វើបានល្អថែមទៀតផង។ ជាមួយនឹងសមត្ថភាពដ៏ច្រើនរបស់កញ្ញារូបនេះ ធ្វើឱ្យកញ្ញាមានលទ្ធភាពច្រើនក្នុងការទិញរបស់របរប្រើប្រាស់ទំនើប ពិសេសកញ្ញាទើបតែទិញកូនវីឡាតូចមួយកន្លែងថែម ទោះស្ថិតក្នុងបរិបទកូវីដ-១៩ ក្ដី។
កញ្ញា ណូម័រ បានផុសសំណេររបៀបលេងសើចតាមរយៈបណ្ដាញសង្គមថា៖ «សូមផុសជាវិឌីអូម៉ងទៅ កុំអោយបងប្អូនខ្លះថា រូបមុននិងអូនកែរាង តែថា..មើលតែរាងបានហើយណា» ប៉ុន្តែវីដេអូខ្លីជាមួយនឹងសឺម៉ីគគីរធ្វើឱ្យអ្នកគាំទ្រ និងមិត្តភក្ដិដែលស្គាល់បានចូលទៅអបអរសាទរចំពោះកញ្ញាគ្រប់ៗគ្នា ដែលកញ្ញាទិញចូលអចលនទ្រព្យជាកូនវីឡាតូចច្រឡឹងមួយនៅម្ដុំជើងភ្នំប្រសិទ្ធិ ដោយកញ្ញាណូម័រមិនកំណាញ់នឹងចូលមកឆ្លើយតបអរគុណចំពោះការជូនពរទាំងអស់ឡើយ។
ស្រីស្រស់រូបនេះ គឺជាតារាមួយរូបដែលត្រូវបានអ្នកនិយមគាំទ្រមើលឃើញថាគឺជាកូនស្រីកត្តញ្ញូមួយរូបដែលតែងតែទៅណាមកណាជាមួយអ្នកម្ដាយ និងទិញជូនអ្វីៗជូនអ្នកម្ដាយជាញឹកញាប់ កញ្ ញាណូម័រ អាចនិយាយបានថាគឺជាកូនស្រីដែលតាមម្ដាយស្រលាញ់ម្ដាយមិនអាចខ្វះបានផងដែរ៕