ក្រុមបាល់ទាត់ Duli Pengiran Muda Mahkota Football Club ឬ ហៅកាត់ថា DPMM FC ដែលបានចាកចេញពីលីគកំពូលសិង្ហបុរី (S League) មកចូលរួមលីគកំពូលប្រ៊ុយណេ 2021 Brunei Super Leagueក្នុងស្រុកកំណើតវិញ បានបំប៉ោងសំណាញ់ទីគូប្រកួតរហូតដល់៤៤គ្រាប់ ក្រោយឆ្លងកាត់ការប្រកួតត្រឹម៣លើកប៉ុណ្ណោះ។
លទ្ធផល៣ប្រកួតកន្លងមករបស់ DPMM FC មាន៖
ប្រកួតទី១៖២៧ មិថុនា ២០២១ DPMM FC ១៦-១ BAKES
ប្រកួតទី២៖៤ កក្កដា ២០២១ DPMM FC ១៥-០ Rimba Star
ប្រកួតទី៣៖ ១១ កក្កដា ២០២១ DPMM FC ១៣-០ BSRC
ក្រុម DPMM FC បង្កើតឡើងកាលពីឆ្នាំ២០០០ ដែលមានព្រះអង្គម្ចាស់ Al-Muhtadee Billah ជាព្រះប្រធាន ខណៈក្រុមនេះធ្លាប់ចូលរួមលេងក្នុងលីគកំពូលប្រ៊ុយណេ លីគកំពូលម៉ាឡេស៊ី និងលីគកំពូលសិង្ហបុរី។ ដោយសារសារភាពកូវីដ-១៩ ទើបក្រុមដកខ្លួនចេញពីលីគកំពូលសិង្ហបុរី មកប្រ៊ុយណេ វិញក្រោយចូលរួមតាំងពីឆ្នាំ២០០៩ មក។ មុនទៅសិង្ហបុរី ក្រុមនេះបានចូលរួមពានរង្វាន់លីគកំពូលម៉ាឡេស៊ី ចន្លោះឆ្នាំ២០០៥ ដល់២០០៨ ផងដែរ។
ក្រុមនេះធ្លាប់ឈ្នះពានរង្វាន់ជាច្រើនទាំងនៅប្រ៊ុយណេ និងកាលនៅលេងសិង្ហបុរី ព្រមទាំងធ្លាប់បង្ហាញខ្លួនក្នុងកម្រិតទ្វីបអាស៊ី AFC Champion League និងពានរង្វាន់ ASEAN Club Championship ផងដែរ។
ពានរង្វាន់ 2021 Brunei Super League បានចាប់ដំណើរការប្រកួតពីថ្ងៃទី២០ ខែមិថុនា ឆ្នាំ២០២១ មក ដោយគិតត្រឹមពេលនេះដំណើរការដល់សប្ដាហ៍ទី៤ ហើយ។ សម្រាប់កាលវិភាគរបស់ក្រុម DPMM FC ត្រូវសម្រាកកាលពីប្រកួតសប្ដាហ៍ដំបូង ដូច្នេះទើបតែប្រកួតបាន៣លើក។ ចំពោះក្រុមជើងឯកក្នុងពានរង្វាន់នេះមានឱកាសចូលលេងពានរង្វាន់កម្រិតទ្វីបអាស៊ី AFC Cup ដូចកម្ពុជាដែរ៕
