ក្រុមបាល់ទាត់ហ្វូតសាលជម្រើសជាតិកម្ពុជា ស្ថិតនៅក្នុង Pot4 នៃការចាប់ឆ្នោតជ្រើសរើសពូល ជើងឯកប្រចាំទ្វីបអាស៊ី AFC Futsal Asian Cup 2024 នៅក្នុងខែមិថុនា ឆ្នាំ២០២៣ ខាងមុខ ក្នុងចំណោមប្រទេស៣១ដែលមានឈ្មោះ។
តាមគម្រោងការចាប់ឆ្នោតនេះនឹងធ្វើឡើងនៅថ្ងៃទី២២ ខែមិថុនា ឆ្នាំ២០២៣ នៅទីស្នាក់ការរបស់សហព័ន្ធកីឡាបាល់ទាត់អាស៊ី ក្នុងទីក្រុងកូឡាឡាំពួរ ប្រទេសម៉ាឡេស៊ី។ ដោយក្រុមទាំង៣១នេះត្រូវចាប់ចូលតាមពូលនីមួយៗ ស្វែងរកក្រុមខ្លាំងចំនួន១៦ឡើងទៅជុំបន្តស្វែងរកជើងឯក។
ពានរង្វាន់នេះធ្វើឡើងរាល់២ឆ្នាំម្តងគិតចាប់តាំងពីឆ្នាំ១៩៩៩ មកម៉្លេះ ដោយក្រុមជប៉ុន ជាម្ចាស់ជើងឯកឆ្នាំចាស់ក្នុងឆ្នាំ២០២២ ដែលប្រទេសគុយវ៉ែត ជាម្ចាស់ផ្ទះ ស្របពេលដែលក្រុមអ៊ីរ៉ង់ ក្រុមឈ្នះជើងឯកច្រើនជាងគេរហូតដល់ទៅ១២សម័យកាល។
ដោយឡែកសម្រាប់ក្រុមកម្ពុជា វិញធ្លាប់បង្ហាញខ្លួនក្នុងព្រឹត្តិការណ៍កម្រិតទ្វីបនេះចំនួន១លើកគឺនៅឆ្នាំ២០០៤ ដែលម៉ាកាវ ជាម្ចាស់ផ្ទះ ដោយកាលនោះកម្ពុជា ស្ថិតក្នុងពូល A ជាមួយអ៊ីរ៉ង់, អ៊ូបេគីស្ថាន,ឥណ្ឌូណេស៊ី និងហុងកុង។ ជាលទ្ធផលកម្ពុជា ឈ្នះហុងកុង ៨-៤ តែចាញ់អ៊ូប៊ែគីស្ថាន ១៣-១ ហើយបន្តចាញ់អ៊ីរ៉ង់ ២៤-១ និងចាញ់ឥណ្ឌូណេស៊ី ៥-២៕