កាលពីថ្ងៃទី១២ ខែកក្កដា ឆ្នាំ ២០២១ អ្នកនាង គង់ ចាន់ស្រីមុំ និង ស្វាមី លោក គឹម សីហា បានរៀបចំពិធីមួយមានឈ្មោះថា រៀបរាមខ្នើយ នៅក្នុងវត្ត ដែលធ្វើឱ្យមហាជនមានការសង្ស័យយ៉ាងខ្លាំងថា តើការរៀបចំពិធីនេះដើម្បីអ្វី?
យោងតាមការបង្ហោះរបស់តារាសម្ដែង ពិធីការិនី និងជាអ្នកជំនួញដ៏ជោគជ័យ អ្នកនាង គង់ ចាន់ស្រីមុំ បានបង្ហោះចែកចាយរូបថតជាច្រើនសន្លឹកដែលអ្នកនាង និងស្វាមីកំពុងអង្គុយជាគូសំពះផ្ទឹមមុខខ្នើយក្រហម ដោយមានរៀបចំផ្លែឈើដង្ហែជាជួរប្រៀបដូចជាជំនូន ក្នុងពិធីសំពះផ្ទឹមដូច្នោះដែរ ប៉ុន្តែអ្នកនាង និងស្វាមី បានរៀបរាប់នឹងហៅពិធីដែលអ្នកនាង និង ស្វាមី រួមទាំងសាច់ញាតិកំពុងប្រារព្ធឡើងនេះថា «ពិធីរៀបរាមខ្នើយ»។
បន្ទាប់ពីតារាល្បីរូបនេះបានបង្ហោះនៅលើបណ្ដាញសង្គមភ្លាម ស្រាប់តែមានអ្នកគាំទ្រជាច្រើនបានចូលមកសាកសួរព្រោះតែមិនស្គាល់ ឬមិនច្បាស់ថាពិធីដែលអ្នកនាងកំពុងតែធ្វើនេះក្នុងគោលដៅអ្វីនិងដើម្បីអ្វី?
ថ្វីត្បិតតែសាមីខ្លួនអ្នកនាង គង់ ចាន់ស្រីមុំ មិនបានចូលមកឆ្លើយតបចំពោះចម្ងល់ខាងលើក្ដី ប៉ុន្តែក៏មានគណនីមួយមានឈ្មោះថា January First បានចូលមកស្រាយចម្ងល់របស់ម្ចាស់សំនួរដ៏ច្រើនលើសលប់ថា៖ «កម្មវិធីរៀបរាមខ្នើយនេះ គេរៀបចំឡើងដោយសារតែអ្នករៀបមង្គលការហើយមិនសូវមានសេចក្ដីសុខក្នុងគ្រួសារ រៀបការហើយយូរមិនមានកូន ឬពិបាកមានកូន ទើបគេរើសថ្ងៃល្អ រៀបចំពិធីនេះ ប្រៀបដូចជារៀបការម្ដងទៀត»។ ចំណែកអ្នកខ្លះទៀតបានលើកឡើងថា គេរៀបពិធីនេះឡើងវិញ គឺដូចទៅនឹងការរៀបការម្ដងទៀត ដោយសារតែកាលពីមុនរៀបចំពិធីមង្គលការ ខុសខែថ្ងៃ។
មានការសរសើរ គេចមិនផុសពីការរិះគន់ដូចគ្នា ព្រោះមានអ្នកលេងបណ្ដាញសង្គមមួយចំនួនបានលើកឡើងថា ឃើញអ្នកចូលរួមកម្មវិធីអ្នកនាងច្រើនតែមិនមាន ពាក់ម៉ាស់តាមសេចក្ដីណែនាំរបស់រដ្ឋាភិបាល និង ក្រសួងសុខាភិបាលនោះទេ ចំណែកអ្នកខ្លះទៀត ក៏បានលើកឡើងដែរថា វត្ត និង តំបន់ដែលអ្នកនាង រៀបចំពិធីនោះស្ថិតក្នុងការរឹតបន្តឹងជំងឺកូវីដ-១៩។
នៅក្នុងបរិយាកាសនៃពិធីនោះ សង្កេតឃើញថាកូនស្រីបណ្ដូលចិត្តតែមួយគត់របស់អ្នកនាង គង់ ចាន់ស្រីមុំ គឺកុមារីម៉ូម៉ូ ញញឹមបិទមាត់លែងជិត ហាក់បង្ហាញនូវអារម្មណ៍សប្បាយរីករាយអង្គុយខាងក្រោយជ្រែកកណ្ដាល ប៉ាម៉ាក់តែម្ដង