សិល្បៈជាតិ៖ នៅក្នុងជំនួបប្រកួតមិត្តភាពរវាងកម្ពុជា (ម្ចាស់ផ្ទះ) និងបង់ក្លាដេស (ភ្ញៀវ) ក្រៅពីការប្រកួតបាល់ទាត់កំដៅសាច់ដុំហើយនោះ ក៏នៅមានការចូលរួមបង្ហាញនូវផ្ទាំងទស្សនីយភាពដ៏អស្ចារ្យពីកំពូលតារាចម្រៀង Rapper ល្បីល្បាញ ងួន ចាន់ដេវីត ផងដែរ។
សូមអាន៖ «មហានគរ» កក្រើកដូចផ្គរលាន់ ចំនួន Views កើនជិត២លានដង Youtubers Reaction ព្រោងព្រាត
ជាការពិតណាស់គេនៅចាំបានថាបទចម្រៀង «មហានគរ» គឺជាបទចម្រៀងមួយដែលទទួលបានការនិយមគាំទ្រខ្លាំង ហើយទស្សនិកជននិងអ្នកគាំទ្រតែងតែទទូចស្នើសុំយ៉ាងអន្ទះសារចង់ឱ្យមានការលើកយកផ្ទាំងទស្សនីយភាពបទចម្រៀងនេះ មកសម្ដែងនៅក្នុងព្រឹត្តិការណ៍ប្រកួតកីឡាខ្នាតធំ។
ទីបំផុតការទន្ទឹងរបស់អ្នកគាំទ្របានមកដល់កាលពីរាត្រីថ្ងៃទី១៥ ខែមិថុនា ឆ្នាំ២០២៣ នាវិមានពហុកីឡាជាតិភ្នំពេញ ក្នុងជំនួបមិត្តភាពកំដៅសាច់ដុំរវាងក្រុមជម្រើសជាតិកម្ពុជា និងក្រុមជម្រើសជាតិបង់ក្លាដេស កំពូលតារាចម្រៀង G-Devith បាននាំយកផ្ទាំងទស្សនីយភាពសិល្បៈវប្បធម៌ខ្មែរដូចជា៖ «កូរសមុទ្រទឹកដោះ, អប្សរា, ម្ករ, ល្ខោនខោល, គុនល្បុក្កតោ, ផ្កាយសំណាង កាន់ទង់, និងគ្រុឌ» មកសម្ដែងនិងច្រៀង នៅក្នុងការបង្ហាញចម្រៀង «មហានគរ»។
ផ្ទាំងទស្សីយភាពដ៏អស្ចារ្យខាងលើបានទាក់ទាញបេះដូងអ្នកគាំទ្រដែលទៅទស្សនានៅពហុកីឡដ្ឋានជាតិឱ្យក្រោកឈរនិងស្រែកហោរកងរំពងលាន់ទ្រហឹងអ៊ឺកង គួរជាទីមោទនភាពយ៉ាងក្រៃលែង។ ក្រៅពីអ្នកដែលបានទៅទស្សនាផ្ទាល់ នៅលើបណ្ដាញសង្គមឯណេះវិញ គេឃើញមានគណនី និងផេកជាច្រើនបានកាត់យកវីដេអូផ្ទាំងទស្សនីយភាពនេះមកបង្ហោះចែករំលែកបន្តគ្នាដើម្បីឱ្យអ្នកដែលមិនបានទស្សនាការ Live ផ្ទាល់បានឃើញដូចគ្នាដែរ។
សង្កេតឃើញថានៅតាមផេកនិងគណនី ដែលបានបង្ហោះពីការច្រៀងនិងសម្ដែងបទ «មហានគរ»របស់ប៉ាប៉ាកូនមួយ មិនមានពាក្យរិះគន់ បន្តុះបង្អាប់បែបជាន់ពន្លិចនោះឡើយ តាមរយៈការបញ្ចេញមតិយោបល់នានាដែលលើកឡើងនៅខាងក្រោមផ្ទាំងទស្សនីយភាពបទមហានគរ គឺមានតែពាក្យវិជ្ជមាន មោទនភាពជាតិ និងក្ដីរំភើបដែលទីបំផុតបទចម្រៀងដែលរំលេចនូវបេតិកភណ្ឌសម្បត្តិវប្បធម៌ខ្មែរបានបង្ហាញខ្លួននៅកណ្ដាលក្រសែភ្នែកអ្នកគាំទ្រយ៉ាងច្រើនកុះករដូច្នេះ។
ការបង្ហាញស្មារតីសាមគ្គីគាំទ្រសិល្បៈ និងកីឡាជាធ្លុងបែបនេះ ធ្វើឱ្យគេនឹកឃើញដល់ព្រះបន្ទូលរបស់ព្រះបរមរតនកោដ្ឋ ធ្លាប់បានមានព្រះបន្ទូលថា ៖«ខ្មែររួបរួម ខ្មែរសាមគ្គី ប្រែថាខ្មែរឈ្នះ»។ មែនទែនទៅ Show របស់ Ditway បានបង្ហាញឱ្យអ្នកគាំទ្រមានមោទនភាពចំពោះជាតិសាសន៍ខ្លួន ជាពិសេសគឺបានកើតលើទឹកដីកម្ពុជាដ៏អច្ឆរិយ និងជាកូនចៅអំបូរនាគរាជដ៏ខ្លាំងខ្លាអស្ចារ្យ៕