សិល្បៈជាតិ៖ ដើម្បីចូលរួមអបអរសាទរខួបលើកទី៤៦ ទិវានៃការចងចាំដំណើរឆ្ពោះទៅរកការផ្តួលរំលំរបបប្រល័យពូជសាសន៍ ប៉ុល ពត ថ្ងៃនេះសារព័ត៌មានត្រយង នឹងនាំអារម្មណ៍ប្រិយមិត្តអ្នកអានទាំងអស់គ្នា មកស្គាល់អំពីភាពយន្តទាំង ១០ រឿងដែលបាន ឆ្លុះបញ្ចាំងពីសោកនាដកម្មនៅក្នុងរបបខ្មែរក្រហម ដែលកូនខ្មែរចងចាំមិនភ្លេច។
1- នរក ៩ ជាន់
ភាពយន្តមួយនេះដឹកនាំដោយលោក មីឡាន មូហ្វណា ឆ្នាំ ១៩៨៩ រយៈពេល ៩៦ នាទីនិយាយជា ភាសាខ្មែរ និងជាខ្សែភាពយន្តមនោសញ្ចេតនាដ៏ជ្រាលជ្រៅរវាងវេជ្ជបណ្ឌិតជនជាតិឆេក និងនារីកម្ពុជា។ របប ប៉ុល ពត ដ៏កំណាច បានធ្វើឱ្យគូស្នេហ៍មួយគូនេះត្រូវបែកបាក់ និងបានធ្វើឱ្យប្រជាជនខ្មែរដ៏ស្លូតត្រង់រាប់លាននាក់រស់នៅដូចធ្លាក់នរកទាំងរស់ ដែលនឹងធ្វើឱ្យលោកអ្នកភ័យតក់ស្លុតពេលដែលកំពុងទស្សនា។ ភាពយន្តនេះក៏មានការចូលរួមពីសំណាក់តារាស្រីល្បីឈ្មោះប្រចាំប្រទេសកម្ពុជា គឺលោកស្រី អ៊ុំ សុវណ្ណនី។
2-គុកឥតជញ្ជាំង
ជាភាពយន្តដែលស្ដែងពីពីជីវិតរបស់នារីម្នាក់នាំកូនៗមកតាមរកស្វាមីនៅក្នុងរបបខ្មែរក្រហម ហើយត្រូវឆ្លងកាត់ការសម្លាប់រង្គាលនៅក្នុងប្រទេសកម្ពុជា។ សាច់រឿងរបស់នាងបង្ហាញអំពីសេចក្តីក្លាហាន និងការរស់រានមានជីវិត និងជាសាច់រឿងដែលគួរឱ្យចាប់អារម្មណ៍ ។ នាងបានរស់រានមានជីវិតដើម្បីប្រាប់ពីសាច់រឿងនៃការសម្លាប់រង្គាលនោះ អ្នកដែលបានរស់នៅឆ្លងកាត់ការភ័យខ្លាចអស់រយៈពេលជាច្រើនឆ្នាំ នៅពេលដែលខ្មែរក្រហមបានដៅធ្វើទារុណកម្ម និងសម្លាប់បញ្ញវន្តជាច្រើននាក់ ។
3-ឃ្លាតទៅសែនឆ្ងាយ ( Lost Loves )
ភាពយន្តនេះដឹកនាំរឿងដោយលោក ឆាយ បូរ៉ា បានរៀបរាប់ពីប្រវត្តិពិតរបស់ស្រី្តជាម្តាយម្នាក់ ដែលបានឆ្លងកាត់ការលំបាក ការព្រាត់ប្រាស់ ការតស៊ូ រហូតដល់ការរស់រានមានជីវិតជាថ្មីចេញពីរបបខ្មែរក្រហម។ ខ្សែភាពយន្តនេះត្រូវបានគេចាត់ទុកថា ជាខ្សែភាពយន្តដែលមានមនោសញ្ចេតនាស៊ីជម្រៅបំផុត។
4-វាលពិឃាដ (The Killing Fields)
ភាពយន្តនេះគ្រប់គ្នាបានដឹងថា សម្ដែងដោយលោកបណ្ឌិត ង៉ោ ហាំងសំណាង តារាឯកប្រុសកម្ពុជាដំបូងដែលបានទទួលពានរង្វាន់អូស្ការ។ ភាពយន្តនេះ ជាស្នាដៃដ៏សម្រាំងរបស់ក្រុមហ៊ុនភាពយន្តហូលីវូដ ប្រទេសអាមេរិក ស្តីអំពីទិដ្ឋភាពពិតនៃសង្គ្រាមនៅកម្ពុជាក្នុងអំឡុងឆ្នាំ១៩៧៥ និងជីវភាពដ៏លំបាកវេទនារបស់ប្រជាជនខ្មែរក្នុងរបបប្រល័យពូជសាសន៍ ប៉ុល ពត ។ ខ្សែភាពយន្តនេះបានធ្វើឱ្យពិភពលោកមានការភ្ញាក់ផ្អើល និងទទួលស្គាល់ពីទុក្ខវេទនារបស់ប្រជាជនខ្មែរនាដំណាក់កាលនោះ ។
5-ដំបូងខ្មែរក្រហមសម្លាប់ប៉ាខ្ញុំ
ភាពយន្តឯកសារនេះ គឺជាភាពយន្តដែលឆ្លុះបញ្ចាំងពីសារប្រវត្តិដ៏ជូរចត់របស់ជនរងគ្រោះនៃរបបខ្មែរដែលបាត់បង់ភាពជាមនុស្សជាតិ និពន្ធដោយលោកស្រី អ៊ឹង លួង និងដឹកនាំរឿងដោយអ្នកនាង អេនជីលេណា ជូលី នៅឆ្នាំ ២០១៧។ ភាពយន្តនេះបានលាតត្រដាងពីជីវិតក្មេងស្រីឈ្មោះ លួង បានរស់នៅក្នុងរបបវាលពិឃាតដ៏ឃោរឃៅ ប៉ុល ពត ហើយនាងខិតខំប្រឹងប្រែងរំដោះខ្លួនឱ្យរស់រានមានជីវិត រហូតបានធ្វើឱ្យអ្នកទស្សនាដែលធ្លាប់ឆ្លងកាត់របបនេះបានបង្ហូរទឹកនេត្រាគ្រប់គ្នា នៅពេលបានទស្សនាភាពយន្តនេះ។
6-តន្ត្រីជីវិត (In the life of music)
ខ្សែភាពយន្តនេះដឹកនាំដោយលោកស្រី ខេលី សូ និងលោក សុខ វិសាល គឺជារឿងជំនាន់ក្រោយដែលនិយាយពីស្នេហា សង្រ្គាម និងទំនាក់ទំនងស្នេហាអមជាមួយនឹងបទ«ចម្ប៉ាបាត់ដំបង»របស់អធិរាជសំឡេងមាស ស៊ីន ស៊ីសាមុត។ ក្នុងសាច់រឿង បានបង្ហាញពីសម័យកាល៣ផ្សេងគ្នា ដែលជីវិតមនុស្សក្នុង៣ជំនាន់នោះត្រូវបានផ្លាស់ប្តូរដោយសាររបបខ្មែរក្រហមបានចូលមកដល់។
7-ទ្វាររបង (The Gate )
ភាពយន្តនេះត្រូវបានដកស្រង់ឡើងពីសៀវភៅរបស់លោក ហ្វ្រង់ស្វ័រ ប៊ីហ្សូ ដែលបានចងក្រងពីប្រវត្តិសាស្ត្រកម្ពុជាក្នុងអំឡុងពេលមុនខ្មែរក្រហមគ្រប់គ្រងអំណាច។ ភាពយន្តនេះដែរ បាននផលិតឡើងរវាងផលិតករបារាំង និងកម្ពុជា បន្ទាប់ពីចុះហត្ថលេខាជាមួយគ្នាផលិតនៅឆ្នាំ ២០១៤។ ភាពយន្តនេះក៏មានតួប្រុស ផឿង កុម្ភៈ សម្ដែងជាតួ ឌុច អ្នកបានចូលទៅគ្រប់គ្រងមន្ទីរធ្វើទារុណ្ឌកម្ម និងប្រហារជីវិតនៅមន្ទីរ ស ២១ ហៅទួលស្លែង។
8-Funan
ភាពយន្តគំនូរជីវចល “Funan” គឺជាភាពយន្តនិយាយពីរបបខ្មែរក្រហមបានជាប់ពានរង្វាន់ធំបំផុតពីអន្តរជាតិ។ ភាពយន្តនេះរៀបរាប់ពីជីវិតរបស់ម្តាយ ផលិតករ និងសិល្បករគំនូរជីវចលខ្មែរ បារាំង Denis Do ផ្ទាល់ ក្នុងអំឡុងរបបខ្មែរក្រហមនៅប្រទេសកម្ពុជា ដែលជួបទុក្ខលំបាកជារៀងរាល់ថ្ងៃ និងត្រូវទ្រាំទ្រការគៀបសង្កត់ពោរពេញដោយអំពើហិង្សា។ ខ្សែភាពយន្តមួយនេះក៏បង្ហាញពីទឹកចិត្ត និងការខិតខំរបស់ម្តាយលោក Denis Do ដែលស្វែងរកកូនប្រុសរបស់គាត់បន្ទាប់ពីបានបែកបាក់គ្នាក្នុងអំឡុងពេលជម្លៀសប្រជាជនចេញពីទីក្រុងដោយប្រើកម្លាំងបាយ ព្រមទាំងអាវុធ របស់ទាហាន ប៉ុល ពត ទៅកាន់ជំរំពលកម្មនៅឯតាមជាយខេត្ត ដែលនេះជាហេតុការណ៍នាំដល់ការរលំនៃទីក្រុងភ្នំពេញ ដោយកងទ័ពកុម្មុយនិស្តខ្មែរក្រហមចូលកាន់អំណាចនៅថ្ងៃទី ១៧ មេសា ឆ្នាំ ១៩៧៥។
9-កុំស្មានបងភ្លេច ខ្មែរបាត់បង់តន្ត្រីរ៉ក់ (Don’t Think I’ve Forgotten: Cambodia’s Lost Rock & Roll )
«កុំស្មានបងភ្លេច ខ្មែរបាត់បង់តន្ត្រីរ៉ក់» ជាភាពយន្តជីកកកាយនូវលក្ខណៈធាតុផ្សំរបស់តន្ត្រីខ្មែរដែលបានប្រែក្លាយទៅជាតន្ត្រីរ៉ក់ អេន រ៉ូល ហើយបានរីកចម្រើនឆ្ពោះទៅមុខ ប៉ុន្តែស្ទើរតែត្រូវបានបំផ្លិចបំផ្លាញទាំងស្រុងក្នុងរបបប្រល័យពូជសាសន៍ខ្មែរក្រហម ។ ខ្សែភាពយន្តឯកសារនេះបានផ្តល់គំហើញថ្មីស្ដីពីប្រទេសមួយដែលយើងធ្លាប់តែឮពីសង្គ្រាម និងអំពើប្រល័យពូជសាសន៍ ។
10- កង្វះរូបភាព (The Missing Picture )
កង្វះរូបភាព ឬ The Missing Picture គឺជាភាពយន្តឯកសារមួយបង្ហាញពីបទពិសោធនិងការចងចាំមួយរបស់ផលិតករគឺលោក រិទ្ធី ប៉ាន់ នាអំឡុងសម័យខ្មែរក្រហមដ៏ខ្មៅងងឹត។ លោកបានធ្វើរូបភាពដីឥដ្ឋជាតំណាងនៃតួអង្គក្នុងរឿង។ វាក៏ជាភាពយន្តដែលទទួលបានរង្វាន់កំពូលពីកម្មវិធីមហោស្រពភាពយន្តធំៗទូទាំងពិភពលោក។