ខ្សែការពារ Michael Kempter វ័យ២៦ឆ្នាំ សមាជិកក្រុមជម្រើសជាតិហ្វីលីពីន បានចុះកុងត្រារយៈពេល២ឆ្នាំលេងនៅលីគកំពូលប្រទេសប្រទេសស្វីស (Swiss Super League) ជាមួយក្រុមFC St. Gallen ក្រោយផុតកិច្ចសន្យាជាមួយក្រុមNeuchâtel Xamax សមាជិកលីគទី២ របស់ស្វីស (Swiss Challenge League)។
កីឡាករកម្ពស់ ១.៨១ម៉ែត្ររូបនេះ មានឪពុកជាជនជាតិស្វីស ហើយមានម្តាយជាជនជាតិហ្វីលីពីន ដើមកំណើតក្នុងទីក្រុង Pasay។ រូបគេបានសម្រេចប្តូរសញ្ជាតិពីស្វីស ទៅហ្វីលីពីន នៅឆ្នាំ២០២១ ថ្មីៗនេះតែម្តង ខណៈខ្លួនធ្លាប់លេងឱ្យក្រុមជម្រើសជាតិស្វីសក្រោមអាយុ១៩ឆ្នាំនិងក្រោម២០ឆ្នាំ ចន្លោះឆ្នាំ២០១៤ ដល់២០១៦ ផងដែរ។
អត្ថបទពាក់ព័ន្ធ៖ប្រធានាធិបតី Duterte ស៊ីញេផ្ដល់សញ្ជាតិហ្វីលីពីន ដល់កីឡាករបាល់ទាត់អេស្ប៉ាញម្នាក់
កីឡាកររូបនេះធ្លាប់ប្រកបអាជីពនៅក្លិបខ្លាំង FC Zürich នៅលីគកំពូលស្វីស ពីឆ្នាំ២០១៦ ដល់២០២០ ខណៈឆ្នាំ២០២០ ដល់២០២១ ចូលរួមក្រុមNeuchâtel Xamax សមាជិកលីគទី២ របស់ស្វីស ហើយចុងក្រោយនេះរូបគេត្រឡប់ទៅលេងលីគកំពូលស្វីស វិញដោយចូលរួមក្នុងក្រុម FC St. Gallen។
ដោយឡែកក្រុម FC St. Gallen ធ្លាប់ឈ្នះជើងឯកពានរង្វាន់លីគកំពូលស្វីស ២លើកនៅឆ្នាំ១៩០៣-១៩០៤ និងឆ្នាំ១៩៩៩-២០០០ ហើយនៅឆ្នាំ២០១៩-២០២០ ថ្មីនេះបានត្រឹមជើងឯករង ព្រមទាំងឈ្នះពានរង្វាន់ក្នុងស្រុកជាច្រើនផងដែរ៕
