សិល្បៈអន្តរជាតិ ៖ អ្នកគាំទ្រ និង មិត្តភក្តិ របស់តារាចម្រៀង-តារាសម្ដែង ចិន-អាមេរិក CoCo Lee មានការរន្ធត់និងក្ដុកក្ដួលចិត្តជាខ្លាំង ក្រោយទទួលបានដំណឹងមរណភាពកំពូលតារាចម្រៀងរូបនេះ។ តារាចម្រៀងវ័យ៤៨ឆ្នាំធ្លាប់ប្រឈមនឹងដំណឹងចចាមអារ៉ាមលែងលះស្វាមី និងឆ្លងកាត់ពេលវេលាដ៏លំបាកជាច្រើនខែដោយសារបញ្ហារបួសជើង។ ស្រាប់តែនៅថ្ងៃទី៥ ខែកក្កដា សមាជិកគ្រួសាររបស់លោកស្រីបានប្រកាសថា លោកស្រី កូកូលី បានទទួលអនិច្ចកម្មដោយអត្តឃាត។
នៅក្នុងដំណឹងមរណទុក្ខដែលផ្ដល់ឲ្យបណ្ដាញសារព័ត៌មាន ពីសមាជិកគ្រួសារសពលោកស្រី បានបង្ហាញអារម្មណ៍សោកសង្រេងជាពន់ពេក ព្រមទាំងទម្លាយឲ្យដឹងថា តាមពិត CoCo Lee បានតស៊ូជាមួយនឹងជំងឺបាក់ទឹកចិត្តជាច្រើនឆ្នាំ ហើយបើទោះជាព្យាយាមយកឈ្នះលើជំងឺផ្លូវចិត្តក្ដី តែស្ថានភាពរបស់លោកស្រីកាន់តែធ្ងន់ធ្ងរជាងមុន រហូតលោកស្រីគិតខ្លីបញ្ចប់ជីវិតខ្លួនឯងកាលពីថ្ងៃទី២ ខែកក្កដា កន្លងទៅ។
គ្រួសារបានបញ្ជូនលោកស្រីទៅសង្គ្រោះបន្ទាន់នៅមន្ទីរពេទ្យ តែអាការៈលោកស្រីស្ថិតក្នុងស្ថានភាពបាត់ស្មារតី (Coma) ហើយនៅពេលថ្មីៗនេះគ្រូពេទ្យអស់លទ្ធភាពអាចរក្សាជីវិតលោកស្រីបានតទៅទៀតហើយ។ CoCo Lee គឺជាតារាមួយដួងដែលទទួលបានការស្រលាញ់ចូលចិត្តនៅក្នុងឧស្សាហកម្មតន្ត្រី ដោយលោកស្រីបានបោះជំហានចូលសិល្បៈដំបូងកាលពីអាយុ២៩ឆ្នាំ ហើយដោយមានទេពកោសល្យពីធម្មជាតិ ព្រមទាំងការប្ដេជ្ញានិងលះបង់ខ្ពស់ក្នុងវិស័យមួយនេះ តារាចម្រៀងរូបនេះបានធ្វើឲ្យអ្នកគាំទ្ររីករាយជាមួយនឹងបទចម្រៀងរបស់ខ្លួន។ CoCo Lee បានព្យាយាមពេញទំហឹងមិនខ្លាចនឿយហត់ ដើម្បីធ្វើយ៉ាងណា ផ្សព្វផ្សាយវិស័យតន្ត្រីចិននៅលើឆាកអន្តរជាតិ។
លោកស្រីបានធ្វើឲ្យក្រុមគ្រួសារមានមោទកភាពចំពោះជោគជ័យរបស់លោកស្រី ហើយជោគជ័យអស់ទាំងនោះគឺបានមកពីការគាំទ្ររបស់ហ្វេនៗដែលនិយមចូលចិត្តចម្រៀងរបស់លោកស្រី។ នៅក្នុងលិខិតដែលប្រកាសដោយបណ្ដាញសារព័ត៌មានក្រុមគ្រួសារតារាស្រីរូបនេះបានឲ្យដឹងថាក្រុមគ្រួសារមានកិត្តិយសជាពន់ពេកដែលមានបងប្អូនស្រីដែលពូកែនិងមានការលះបង់ខ្ពស់ដូចជា Coco Lee។
ក្រុមគ្រួសារដួងវិញ្ញាណ Coco Lee ពេលនេះបានទៅកាន់សុគតិភពហើយ ពេលនេះគាត់លែងឈឺចាប់ដោយសារជំងឺបាក់ទឹកចិត្តទៀតហើយ។ ក្រុមគ្រួសារជឿថាពេលនេះលោកស្រីកំពុងនៅជាមួយទេវតា ហើយទេវតា ហើយបងស្រីទាំងពីរបានប្ដេជ្ញា មើលថែទាំម្ដាយចាស់ជរារបស់ពួកគេឲ្យបានល្អជំនួស CoCo Lee ផងដែរ។ គ្រួសាររបស់លោកស្រីសូមឲ្យអ្នកគាំទ្រចូលរួមលើកទឹកខ្លួនក្នុងដំណាក់កាលកាន់មរណទុក្ខលើកនេះផងដែរ។
សូមជំរាបពីប្រវត្តិរបស់លោកស្រី Coco Lee ដោយសង្ខេបដូចតទៅ៖ CoCo Lee មានឈ្មោះដើមកំណើត Ferren Lee កើតនៅថ្ងៃទី17 ខែមករា ឆ្នាំ1975 នាទីក្រុងហុងកុងសាធារណរដ្ឋប្រជាមានិតចិន។ លោកស្រីគឺជាកូនស្រីពៅនៅក្នុងគ្រួសារដែលមានបងប្អូនស្រី៣នាក់។ ឪពុកលោកស្រីជាកូនកាត់ចិន-ឥណ្ឌូនេស៊ី ចំណែកឯម្ដាយជាជនជាតិចិនហុងកុង។ ជាអកុសលលោកស្រីមិនបានជួបមុខឪពុកឡើយ ដោយសារតែឪពុកបានស្លាប់ចោលតាំងពីលោកស្រីនៅក្នុងផ្ទៃម្ដាយ។
លោកស្រី និង បងស្រីទាំងពីរបានធំធាត់ក្រោមការចិញ្ចឹមបីបាច់ដោយម្ដាយមេម៉ាយ។ ឈានចូលអាយុបាន៩ឆ្នាំគ្រួសារលោកស្រីបានផ្លាស់លំនៅទៅរស់នៅសហរដ្ឋអាមេរិកក្នុងក្រុង សាន់ហ្វាន់ស៊ីស្កូ ហើយលោកស្រីបានចម្រើនលូតលាស់និងធំពេញវ័យនៅទីនោះ។ លោកស្រីបានចូលសិក្សានៅបឋមសិក្សា Presidio និងវិទ្យាល័យ Raoul Wallenberg។ ក្រោយបញ្ចប់ថ្នាក់វិទ្យាល័យលោកស្រីទទួលបានឱកាសកុងត្រាថតចម្រៀងនៅហុងកុង ដូច្នេះលោកស្រីបានសម្រេចចិត្ត ឈោងចាប់ក្ដីស្រមៃប្រឡូកក្នុងវិស័យតន្ត្រី។អាល់ប៊ុមចម្រៀងដំបូងជាភាសាអង់គ្លេសមានចំណងជើងថា «Just No Other Way» បានចេញលក់កាលពីឆ្នាំ១៩៩៩។
លោកស្រីក៏ទទួលបានការចាប់អារម្មណ៍ខ្លាំងផងដែរនៅពេលលោកស្រីឡើងច្រៀងនិងសម្ដែងបទ «A Love Before Time» បទចម្រៀងដកស្រង់ពីភាពយន្តខ្នាតធំ «Crouching Tiger, Hidden Dragon»ដោយបទចម្រៀងនេះមានឈ្មោះចូលរួមប្រជែងពានរង្វាន់ក្នុងផ្នែក «Best Original Song» នាឱកាសនោះ។ ក្រៅពីនេះផលិតកម្ម Walt Disney បានជួលឱ្យលោកស្រីច្រៀងនិងបញ្ចូលសំឡេងឱ្យតួឯកស្រីក្នុងភាពយន្ត Fa Mulan ជាភាសាចិនផងដែរ។ Coco Lee ថែមទាំងធ្លាប់បានច្រៀងនិងសម្ដែងក្នុងការប្រគំតន្ត្រីដើម្បីមនុស្សធម៌ «Michael Jackson and Friends»។
និយាយពីជីវិតអាពាហ៍ពិពាហ៍ លោកស្រីបានរៀបការជាមួយនឹងស្វាមីលោក Bruce Rockowitz ជាអ្នកជំនួញកូនកាត់កាណាដា-ជ្វីស្ត និងជាអតីត CEO ក្រុមហ៊ុន Li & Fung កាលពីឆ្នាំ២០១១។ ពិធីអាពាហ៍ពិពាហ៍ដ៏ឱឡារិកនិងអធិកអធមរបស់អ្នកទាំងពីរបានរៀបចំឡើងនៅក្នុងក្រុងហុងកុង ដោយក្នុងឱកាសនោះលោកស្រីបានបញ្ចេញបទចម្រៀងថ្មីរបស់ខ្លួនមានចំណងជើងថា «I Just Wanna Marry You» ឬ «ខ្ញុំចង់រៀបការតែជាមួយបង»ដើម្បីអបអរអាពាហ៍ពិពាហ៍របស់ខ្លួន។ នៅឆ្នាំ២០១៦ លោកស្រីបានទម្លាយថាលោកស្រីមានកូនស្រីចុង២នាក់ដែលជាកូនបន្សល់ពីស្វាមីនិងអតីតភរិយា។ ងាកមកទ្រព្យសម្បត្តិវិញលោកស្រី Coco Lee មានទ្រព្យសម្បត្តិសរុបប្រមាណ៥ម៉ឺនដុល្លារអាមេរិក៕
ប្រភព៖ dimsumdaily