ក្រុមបាល់ទាត់វិសាខា បន្តពាក្យថា«ឈ្នះ»ជាប់ៗគ្នា ហើយក្រុមសូលទីឡូអង្គរ នៅតែចាញ់ជាប់ៗគ្នា ខណៈក្រុមបឹងកេត និងព្រះខ័នរាជស្វាយរៀង ក៏រកបាន៣ពិន្ទុដូចគ្នាដែរក្នុងប្រកួតសប្ដាហ៍ទី៩ នៃពានរង្វាន់លីគកំពូលកម្ពុជា Metfone Cambodian League 2021 នៅរសៀលថ្ងៃអាទិត្យ ទី១៨ ខែកក្កដា ឆ្នាំ២០២១ នេះ។
ចំពោះក្រុមវិសាខា បានយកឈ្នះសូលទីឡូអង្គរ ដោយលទ្ធផល ៥ទល់០ លើទីលានកីឡដ្ឋានព្រីនស៍ របស់ខ្លួន ហើយកីឡាករ Ajayi Opeyemi Korede រកបានគ្រាប់បាល់ម្នាក់ឯង៣គ្រាប់ និងប្រធានក្រុម កែវ សុខផេង រកបាន២គ្រាប់ម្នាក់ឯង។ គិតត្រឹម៨ប្រកួតមកនេះ វិសាខា ឈ្នះបាន៥លើក ស្មើ៣លើក មិនទាន់ចាញ់នៅឡើយ ហើយសូលទីឡូអង្គរ ប្រកួត៨លើកចាញ់ទាំង៨លើក នៅបាតតារាង។
ចំណែកក្រុមបឹងកេត វិញបានយកឈ្នះលើក្រុមមជ្ឍមណ្ឌលកងយោធពលខេមរភូមិន្ទ (ទ័ព) ដោយលទ្ធផល២ទល់០ លើទីលានកីឡដ្ឋានខេមបូឌាអ៊ែវេ។ គ្រាប់បាល់ជ័យជម្នះរបស់ក្រុមម្ចាស់ផ្ទះបឹងកេត រកបានដោយកីឡាករ ចាន់ វឌ្ឍនាកា ២គ្រាប់ម្នាក់ឯង។
ដោយឡែកប្រកួតអ្នកជាប់របងគ្នាឯភាគខាងកើតនៃប្រទេសកម្ពុជា គឺក្រុមម្ចាស់ផ្ទះខេត្តព្រៃវែង បានចាញ់ក្រុមព្រះខ័នរាជស្វាយរៀង ដោយលទ្ធផល ២ទល់១ លើទីលានកីឡដ្ឋានខេត្តព្រៃវែង។ កីឡាករជនជាតិកាម៉េរ៉ូន Privat និងកីឡាករ Robert Lopez Mendy រកគ្រាប់បាល់ឱ្យក្រុមភ្ញៀវស្វាយរៀង ម្នាក់១គ្រាប់ ខណៈកីឡាករ អះម៉ាត់ ស៊ូរីម ជាអ្នករកគ្រាប់បាល់ឱ្យក្រុមខេត្តព្រៃវែង។
សម្រាប់គូចុងក្រោយនៅថ្ងៃនេះ គឺក្រុមភ្នំពេញក្រោន បើកទ្វាកីឡដ្ឋានស្មាត អរ អេស អិន របស់ខ្លួនទទួលក្រុមអគ្គីសនីកម្ពុជា នៅវេលាម៉ោង៦ល្ងាចតទៅ ព្រមទាំងផ្សាយផ្ទាល់តាមប៉ុស្តិ៍ BTV News ផងដែរ៕
