សិល្បៈជាតិ៖ ចំណងមិត្តភាពស្អិតល្មួតរវាងលោក សេង មង្គល និងអ្នកជំនួញអនឡាញ និងម្ចាស់ហាងពេជ្រល្បីឈ្មោះ ទ្រី ដាណា បានចាប់ផ្ដើមឡើងក្រោយពេលដែលលោក សេង មង្គល ទទួលបានឱកាសធ្វើជា BA ឱ្យក្រុមហ៊ុន ដាណា ទ្រី កាលពីមួយឆ្នាំមុន។ ចំណែកឯទំនាក់ទំនងផ្អែមល្ហែមរវាងអ្នកទាំងពីរនេះ គេមើលឃើញថាកាន់តែមានភាពច្បាស់លាស់ឡើងពីមួយថ្ងៃទៅមួយថ្ងៃ។
គេនៅចាំបានថា កាលពីពាក់កណ្ដាលឆ្នាំ២០២២ ពោលគឺក្នុងអំឡុងខែកក្កដា លោក សេង មង្គល តារាសម្ដែងរូបសង្ហាមានសាច់ដុំ៦កង់ហាប់ណែន ក្ដាប់បានតំណែងជា BA ផលិតផលថ្មីមួយរបស់ក្រុមហ៊ុន ដាណា ទ្រី គឺវីតាមីនជំនួយស្បែកសរ Colla C Q10។ យីអ៊ុនលោក សេង មង្គលប្រហែលជាស៊ីគ្នានឹងខែកក្កដា ព្រោះឈានចូលដល់ថ្ងៃទី៩ ខែ កក្កដា ឆ្នាំ២០២៣ តារាសម្ដែងរូបសង្ហាក្ដាប់បានតំណែងជា BA ផលិតផលថ្មីសន្លាងមួយទៀតស្ថិតក្នុងក្រុមហ៊ុនរបស់ ជំទាវឧកញ៉ា ទ្រី ដាណា ដដែលនោះគឺឡេលាបស្បែកឱ្យសស្អាត JOJOBA Whitening។ តើមានចំណុចសំខាន់ត្រង់ណា ទើបធ្វើឱ្យបុរសសង្ហារូបនេះ អាចរក្សាកៅអី BA របស់ខ្លួននៅក្នុងក្រុមហ៊ុន ដាណា ទ្រី? តើការជ្រើសរើសនេះ កើតចេញពីទំនាក់ទំនងផ្ទាល់ខ្លួនឬមួយយ៉ាងណា? ខណៈដែលម្ចាស់ប្រេន បានរបូតមាត់ទម្លាយការពិតថា អ្នកទាំងពីរមានរឿងមិនយល់ចិត្តគ្នារហូតដល់ថ្នាក់លែងនិយាយគ្នាថែមទៀតផង។
ទោះជាបង្ហាញភាពស្និតស្នាលគ្នាកាន់តែខ្លាំងរហូត លោក សេង មង្គល បានបណ្ដើរគ្នាត្រសងជាមួយនឹង លោកជំទាវ ទ្រី ដាណា មកចូលរួមដើរលើកំរាលព្រំក្រហមក្នុងកម្មវិធី ព្រមទាំងថ្លែងសាសងគ្នាយ៉ាងស្និតស្នាលនៅលើឆាក ក្នុងបរិយាកាសពណ៌ស៊ីជម្ពូ ដោយក្នុងពេលនោះ សេង មង្គល ហ៊ានទាំងប្រឡេះឡេវអាវ និងចាប់ដៃខាងស្រីយកទៅលូកស្ទាបទ្រូងខាងឆ្វេងរបស់ខ្លួន ដើម្បីបញ្ជាក់ថាលោកពិតជាភ័យខ្លាំង ក្រោយប្រាប់ថាខ្លួនកំពុងតែភ័យ ដែលសកម្មភាពស្និតស្នាលប៉ះសាច់គ្នាបែបនេះ ពិបាកនឹងបានឃើញណាស់នាពេលកន្លងមក។ ចំណុចដែលធ្វើឱ្យភ្ញៀវកិត្តិយសចូលរួមក្នុងពិធីនោះស្រែកហោរកងរំពងគឺនៅពេលដែលសុខៗស្រាប់តែសំឡេងច្រៀងរបស់ លោក សេង មង្គល នៅក្នុងបទ «ឆ្កួតចិត្តព្រោះស្រលាញ់អូន» បានបន្លឺឡើងជាមួយនឹងបារ៉ូលចម្រៀងហាក់ប្រកាសពីឋានៈរបស់អ្នកទាំងពីរព្រោះមានអត្ថន័យថា៖ «នៅក្នុងពេលនេះខ្ញុំសូមប្រកាសនាងគឺជាសង្សារ ហើយក៏មិនឱ្យអ្នកណាប៉ះពាល់ជីវ៉ា ក្រៅពីខ្ញុំបានទេ រឿងនេះខ្ញុំមិនមែនលលេង ហើយក៏មិនមែនឈុតសម្ដែង គឺខ្ញុំហួងហែងខ្លាចគេប្រជែង អន្ទងលួងលោម ដណ្ដើមយកស្ងួនពីដៃ មិនអាចឱ្យថ្លៃឱ្យដៃទៅគេកាន់…»
ចំណែកជំទាវឧកញ៉ា ទ្រី ដាណា វិញបានលើកឡើងថា អ្នកនាង ពិតជាមិនធ្លាប់លេងចាប់ដៃ ឬប៉ះសាច់គ្នាស្និទ្ធបែបនេះទេ ពីមុនមកបើមានឈុតត្រូវថើបគ្នានៅក្នុងការថត ក៏អ្នកនាងឱ្យកាត់ចេញដែរ ហើយនេះគឺជាលើកទីមួយដែលអ្នកទាំងពីរស្និតស្នាលខ្លាំងបែបនេះ។ ក្រៅពីពាក្យពេចន៍និងសកម្មភាពស្និតស្នាលរវាងអ្នកទាំងពីរហើយនោះ អ្នកនាង បានធ្វើឲ្យភ្ញៀវកិត្តិយសស្ទើតែហើបគូទពីកៅអី នៅពេលអ្នកនាងថ្លែងថា៖ “សូមប្រកាសថា រវាងខ្ញុំ និងលោក សេង មង្គល ពីពេលនេះទៅ…”។
យ៉ាងណាមិញអ្វីដែលអ្នកនាងប្រកាសឱ្យតំណាងចែកចាយនិងភ្ញៀវកិត្តិយសរាប់រយនាក់បានដឹងឮនាឱកាសនោះគឺលោក សេង មង្គល ជាថ្មីម្ដងទៀតត្រូវបានជ្រើសរើសជា BA ផលិតផលថែរក្សាសម្រស់់ប្រភេទឡេលាបខ្លួនថ្មី គឺ JOJOBA Whitening។
រហូតមកដល់ពេលនេះទោះជាទំនាក់ទំនងរវាងអ្នកទាំងពីរត្រូវបានមហាជនមើលឃើញកាន់តែច្បាស់លាស់ ហើយពាក្យថាសមគ្នាណាស់ តែងតែឮចេញពីបបូរមាត់មនុស្សជុំវិញខ្លួន ប៉ុន្តែសាមីខ្លួនទាំងពីរនៅតែមាត់រឹង មិនមានអ្នកណាព្រមហាមាត់ទម្លាយពីទំនាក់ទំនងរបស់ខ្លួនថាឈានដល់ចំណុចណានោះឡើយ ដូច្នេះអ្នកតាមដានសាច់រឿងអ្នកទាំងពីរមានតែត្រូវតាមដានភាគបន្ត តើការពិតគឺបែបណា? តើរវាងអ្នកទាំងពីរគ្រាន់តែចូលតួសម្ដែងក្នុងសាច់រឿង ឬក៏ចូលតួទាំងក្នុងជីវិតពិតទៀត?