កូនកាត់ខ្មែរ-អាមេរិក Davy Armstrong គឺជាកីឡាករបាល់ទាត់ដំបូងគេដែលធ្លាប់លេងនៅលីគកំពូលរបស់សហរដ្ឋអាមេរិក Major League Soccer ឲ្យក្រុមបាល់ទាត់ Colorado Rapids ចន្លោះពីឆ្នាំ ២០១០ ដល់ឆ្នាំ ២០១៤។
Davy Armstrong បានកើតនៅរដ្ឋ Colorado សហរដ្ឋអាមេរិក បច្ចុប្បន្នមានវ័យ៣១ឆ្នាំ និងកម្ពស់១.៨០ម៉ែត្រ លេងតំណែងជាខ្សែបម្រើការពារ ដោយមានឪពុកជាជនជាតិខ្មែរ និងម្តាយជាជនជាតិអាមេរិក ហើយបានចាប់ផ្តើមចូលលេងបាល់ទាត់ដំបូងនៅថ្នាលយុវជនរបស់ក្លិប Colorado Rapids ចាប់ពីឆ្នាំ២០០៧-២០១០។
លុះដល់ឆ្នាំ ២០១០ Davy Armstrong បានក្លាយជាកីឡាករខ្មែរដំបូងគេដែលបានអភិវឌ្ឍខ្លួនចូលទៅលេងក្នុងឈុតធំ របស់ក្រុម Colorado Rapids នៃក្របខណ្ឌកំពូល Major League Soccer របស់អាមេរិក។ ព្រមទាំងជួយឲ្យក្រុមឈ្នះពានរង្វាន់ Eastern Conference Championship និង MLS Cup ជាដើម។
នៅដើមឆ្នាំ ២០១១ Davy Armstrong ក៏ធ្លាប់ត្រូវបានសហព័ន្ធកីឡាបាល់ទាត់កម្ពុជា កំណត់ថាជាកីឡាករខ្មែរកូនកាត់ ដែលអាចចូលរួមក្រុមជម្រើសជាតិកម្ពុជា ព្រោះគាត់មានលក្ខណៈសម្បត្តិគ្រប់គ្រាន់ ជាពិសេសមានឪពុកជាជនជាតិខ្មែរស្រាប់។
ប៉ុន្តែគ្រប់យ៉ាងត្រូវបានប្តូរផ្លាស់ដោយសារ Davy Armstrong រងរបួសដាច់សរសៃជង្គង់ ACL ធ្វើឲ្យអាជីពជាកីឡាករបាល់ទាត់របស់គេ ត្រូវជួបរឿងស្មុគស្មាញម្តងហើយម្តងទៀត រហូតសម្រេចចូលនិវត្តន៍ពីបាល់ទាត់ទាំងនៅក្មេងក្នុងឆ្នាំ ២០១៧ នៅវ័យ២៦ឆ្នាំប៉ុណ្ណោះ។
នៅឆ្នាំ ២០២០ Davy Armstrong បានចាប់ផ្តើមអាជីពជាអ្នកពន្លត់អគ្គីភ័យនៅរដ្ឋ Colorado សហរដ្ឋអាមេរិក និងបានរៀបការជាលោកស្រី Nikki Arm Strong កាលពីឆ្នាំ ២០២២ កន្លងទៅ៕