សិល្បៈអន្តរជាតិ៖ យោងតាមសេចក្ដីរាយការណ៍ព័ត៌មាន Anupam Tripathy តារាសម្ដែងជនជាតិឥណ្ឌាដែលធ្លាប់សម្ដែងជាតួអង្គ Ali Abdul នៅក្នុងភាពយន្តភាគដ៏ល្បី Squid Game បានបង្ហាញវត្តមានសម្ដែងជាតារាកិត្តិយសនៅក្នុងរឿង «King The Land» ដោយដើរតួអង្គជាព្រះអង្គម្ចាស់ Samir ភ្ញៀវលំដាប់ (VIP Guest) របស់សណ្ឋាគារនៅក្នុងភាគទី៧ និងទី៨ នៃសាច់រឿង។
យ៉ាងណាមិញរឿងហេតុចម្រូងចម្រាសបានកើតឡើងដោយសារតែតួអង្គនេះត្រូវបានតួអង្គដែល Jun Ho សម្ដែងហៅថាជាព្រាននារី ហើយតួអង្គនេះបានចូលមកចែចង់តួអង្គ YoonA ផងដែរ ខណៈដែលគេបានមកស្នាក់នៅក្នុងសណ្ឋាគារនេះ។
ក្រោយសាច់រឿងទាំងពីរភាគខាងលើត្រូវបានចាក់បញ្ចាំង អ្នកទស្សនានៅបរទេសជាពិសេសអ្នកទស្សនាជនជាតិអារ៉ាប់ មិនពេញចិត្តជាខ្លាំង ចំពោះតួអង្គ Samir ដោយគេយល់ឃើញថាសាច់រឿងនេះធ្វើចេញមកដោយគ្មានការគោរពចំពោះវប្បធម៌អារ៉ាប់ ដោយមតិរិះគន់ខ្លះទៀតបានលើកឡើងថាអ្វីដែល Samir បានសម្ដែងនៅក្នុងរឿងនេះ ដូចជាការទៅដើរលេងនៅក្លឹបកម្សាន្តនាពេលយប់ គឺជាអ្វីដែលជនជាតិអារ៉ាប់មិនប្រព្រឹត្តិនោះឡើយ។
ក្រោយមានមតិរិះគន់យ៉ាងច្រើនដូច្នេះកាលពីថ្ងៃទី១០ ខែកក្កដា ឆ្នាំ២០២៣ កន្លងទៅស្ថានីយទូរទស្សន៍ JTBC បានចេញសេចក្ដីប្រកាសព័ត៌មានឆ្លើយតបនឹងករណីនេះយ៉ាងដូច្នេះថា៖ «តួអង្គនិងឈ្មោះទីកន្លែងទាំងអស់នៅក្នុងសាច់រឿងសុទ្ធតែជាឈ្មោះដែលអ្នកនិពន្ធបង្កើតឡើង ចំណែកតួអង្គ Samir ដែលសម្ដែងជាព្រះអង្គម្ចាស់នោះក៏មិនបានបញ្ជាក់ថាជាព្រះអង្គម្ចាស់ប្រទេសណានោះឡើយ»៕