ក្លិបបាល់ទាត់ Young Elephant សមាជិកលីគកំពូលឡាវ បានប្រកាសចែកផ្លូវជាមួយខ្សែបម្រើ Bounphachan Bounkong ព្រមទាំងបានបញ្ជាក់ថារូបគេនឹងផ្លាស់មកកាន់លីគកំពូលកម្ពុជា Cambodian Premier League រដូវកាល ២០២៣-២៤។
សម្រាប់កីឡាករ Bounpthachan Bounkong បង្ហាញខ្លួនឲ្យក្រុមបានចំនួន ១៣លើក ក្នុងរដូវកាលឆ្នាំ២០២៣ ឲ្យក្លិបបាល់ទាត់ Young Elephant ក្នុងលីគកំពូលឡាវ ដោយជួយក្រុមឈ្នះបាន ១១លើក និងរកគ្រាប់បាល់បាន ១៦គ្រាប់។ កីឡាករវ័យ២២ឆ្នាំរូបនេះធ្លាប់បានកោះហៅចូលក្រុមជម្រើសជាតិឡាវ តាំងពីឆ្នាំ២០១៨ មកម្ល៉េះ ព្រមទាំងបានគ្រាប់បាល់៤គ្រាប់ផងដែរ។
បើតាមប្រភពមកពីមន្រ្តី១រូបរបស់សហព័ន្ធកីឡាបាល់ទាត់ឡាវ បានប្រាប់ក្រុមការងារសារព័ត៌មានត្រយង ថាកីឡាករជម្រើសជាតិឡាវ Bounpthachan Bounkong កំពុងតាមប្រមាញ់ពីក្លិបបាល់ទាត់ព្រះខ័នរាជស្វាយរៀង ដើម្បីបំពេញកីឡាករកូតាអាស៊ាន។
យោងតាមកំណែទម្រង់ថ្មីរបស់ ក្រុមហ៊ុន Cambodian Premier League ដើម្បីជំរុញការប្រកួតឲ្យកាន់តែទាក់ទាញ បានអនុញ្ញាតឲ្យក្លិបនីមួយៗ ប្រើប្រាស់កីឡាករបរទេសរហូតដល់ ៦នាក់ ដោយក្នុងចំណោម ៦នាក់ នោះដាច់ខាតត្រូវមាន១នាក់ជាកីឡាករក្នុងទ្វីបអាស៊ី និងម្នាក់ទៀតជាពលរដ្ឋក្នុងតំបន់អាស៊ាន៕
