បុរសវ័យ៣០ឆ្នាំជនជាតិអ៊ូបេគីស្ថាន ម្នាក់ ត្រូវបានឃាត់ខ្លួនភ្លាមៗ ក្រោយពីធ្វើសកម្មភាពរំលោភសេពសន្ថវៈទៅលើនារីម្នាក់ នៅក្នុងកីឡដ្ឋានជាតិ របស់ជប៉ុន ដែលជាទីកន្លែងត្រៀមរៀបចំព្រឹត្តិការណ៍កីឡាអូឡាំពិក Tokyo Olympic Games 2020 ប៉ុន្មានថ្ងៃខាងមុខ។
សារព័ត៌មានរដ្ឋជប៉ុន Kyodo រាយការណ៍ថាករណីរំលោភនេះត្រូវបានរកឃើញនៅល្ងាចថ្ងៃសុក្រ ទី១៦ ខែកក្កដា កាលពីពេលថ្មីៗ ក្នុងសកម្មភាពទស្សនាការហាត់សមនៃពិធីបើកព្រឹត្តិការណ៍អូឡាំពិកដែលគ្រោងធ្វើផ្លូវការនៅថ្ងៃទី២៣ខែកក្កដា ឆ្នាំ២០២១។ ដោយឡែកសារព័ត៌មាន NHK របស់ជប៉ុន មួយទៀតបានបញ្ជាក់ថាបុរស សង្ស័យរូបនោះ បានបដិសេធពីការចោទប្រកាន់ផងដែរ។
អត្ថបទពាក់ព័ន្ធ៖អត្តពលិកកម្ពុជា ចេញទៅប្រកួតអូឡាំពិកនៅប្រទេសជប៉ុន មុនពិធីបើក៣ថ្ងៃ
បើតាមការស្រង់សម្តីរបស់គណៈកម្មការរៀបចំការប្រកួតបានបញ្ជាក់ថាបុរសជាប់ចោទខាងលើមិនមានពាក់ព័ន្ធនឹងភាគីគណៈកម្មការ ឬ ក្រុមហ៊ុនដៃគូពាក់ព័ន្ធព្រឹត្តិការណ៍កីឡាអូឡាំពិកនោះទេ តែគេជាបុគ្គលិកធ្វើការ ម៉ៅការខាងសេវាកម្ម បម្រើការដល់ការរៀបចំការប្រកួតនាពេលខាងមុខ។ «ពិតជាសោកស្ដាយខ្លាំងណាស់ដែលកើតមានឧបទ្ទវហេតុបែបនេះឡើង ព្រោះធ្វើឱ្យមានការបាត់បង់ទំនុងចិត្តក្នុងព្រឹត្តិការណ៍អូឡាំពិកនេះទាំងមូល»។ តំណាងគណៈកម្មការប្រកួតលើកឡើង។
សូមបញ្ជាក់ថាព្រឹត្តិការណ៍កីឡាអូឡាំពិករដូវក្តៅ ដែលធ្វើនៅរាជធានីតូក្យូ នេះមានការចូលរួមពីកីឡាករកីឡាការិនី មកពីប្រទេស/តំបន់ចំនួន២០៦ផ្សេងគ្នា សរុបប្រមាណជាង១ម៉ឺននាក់ លើប្រភេទ៣៣កីឡានិង៣៣៩វិញ្ញាសា។ ការប្រកួតគ្រោងចាប់ធ្វើពីថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១។ តាមពិតការប្រកួតនេះបានលើកពេលពីឆ្នាំ២០២០ កន្លងមកដោយសារការឆ្លងនៃជំងឺកូវីដ-១៩ ជុំវិញពិភពលោក៕
អត្ថបទពាក់ព័ន្ធ៖ប្រធានសហព័ន្ធខ្មែរកីឡាហែលទឹកផ្តល់ថវិកានិងសម្ភារៈ ដល់អត្តពលិកត្រៀមទៅអូឡាំពិកនៅជប៉ុន