គិតត្រឹមព្រឹកថ្ងៃចន្ទ ទី១៩ ខែកក្កដា ឆ្នាំ២០២១ នេះពានរង្វាន់ជើងឯកប្រចាំទ្វីបអាមេរិកខាងជើង 2021 CONCACAF Gold Cup បានរកឃើញក្រុមខ្លាំងឡើងទៅលេងវគ្គ៨ក្រុមចុងក្រោយមុនគេហើយ ដោយក្នុងនោះមានក្រុមជម្រើសជាតិ អែលសាល់វាឌ័រ អាមេរិក ម៉ិចស៊ីកូ កាណាដា។
ក្រុមខ្លាំងតាមពូលមាន៖
ពូល A៖ លេខ១ ម៉ិចស៊ីកូ លេខ២ អែលសាល់វាឌ័រ
ពូល B៖ លេខ១ អាមេរិក លេខ២ កាណាដា
ដោយឡែកគូប្រកួតបិទពូល C និង D នៅព្រឹកថ្ងៃពុធ សប្ដាហ៍នេះមាន៖
-Suriname ប៉ះ Guadeloupe ម៉ោង ៦ព្រឹក នៅកីឡដ្ឋាន BBVA Stadium, Houston
-កូស្តារីកា ប៉ះ ចាម៉ៃកា ម៉ោង៦ព្រឹក នៅកីឡដ្ឋានExploria Stadium, Orlando
-ប៉ាណាម៉ា ប៉ះ ហ្រ្គីណាដា ម៉ោង៨ព្រឹកនៅកីឡដ្ឋាន Exploria Stadium, Orlando
-ហុងឌុយរ៉ាស់ ប៉ះ កាតារ ម៉ោង៨ព្រឹកនៅកីឡដ្ឋានBBVA Stadium, Houston
ពានរង្វាន់ 2021 CONCACAF Gold Cup រៀបចំឡើងពីថ្ងៃទី១០ ខែកក្កដា ដល់ថ្ងៃទី១ ខែសីហា ឆ្នាំ២០២១ នៅ១០កីឡដ្ឋាន ក្នុងចំណោម៩ទីក្រុងរបស់សហរដ្ឋអាមេរិក ដោយមានក្រុមចំនួន១៦ចូលរួម បែងចែកជា៤ពូល។ ក្រុមចំណាត់ថ្នាក់លេខ១និងលេខ២ក្នុងពូលមានឈ្មោះឡើងទៅប្រកួតវគ្គ៨ក្រុមចុងក្រោយ និងបន្តជម្រុះរហូតដល់វគ្គផ្ដាច់ព្រ័ត្រ។
ពានរង្វាន់ CONCACAF Gold Cup ជាការប្រកួតជើងឯកដែលមានក្រុមជម្រើសជាតិនៅទ្វីបអាមេរិកខាងជើង (បន្ថែមតំបន់អាមេរិកកណ្ដាល និងតំបន់ការ៉ាប៊ីន) ហើយរៀបចំនៅរាល់២ឆ្នាំម្តង ខណៈក្រុមជម្រើសជាតិម៉ិចស៊ីកូ ជាអ្នកឈ្នះជើងឯកបានច្រើនជាងគេគឺរហូតដល់១១លើកឯណោះ៕
