ពានរង្វាន់ AFC Cup 2021 នៅតំបន់អាស៊ីខាងត្បូង នឹងរៀបចំប្រកួតនៅក្នុងប្រទេសម៉ាល់ឌីវ ខណៈតំបន់អាស៊ីខាងកើត អាស៊ីកណ្ដាល និងអាស៊ីខាងលិច សុទ្ធតែបានបញ្ចប់វគ្គជម្រុះតាមពូលរួចរាល់ហើយ។ ចំណែកតំបន់អាស៊ីអាគ្នេយ៍ ត្រូវបានសហព័ន្ធកីឡាបាល់ទាត់អាស៊ី សម្រេចលុបចោលដោយសារមិនអាចរកទីកន្លែងប្រកួតបានព្រោះមានការឆ្លងរីករាលដាលនៃជំងឺកូវីដ-១៩ខ្លាំង។
ចំពោះការប្រកួតនៅអាស៊ីខាងត្បូង នេះធ្វើឡើងនៅប្រទេសម៉ាល់ឌីវ ទាំងក្នុងវគ្គជម្រុះ និងវគ្គចែកពូល។ ចំពោះវគ្គជម្រុះរវាងក្រុម Bengaluru របស់ឥណ្ឌា និងក្រុម Eagles របស់ម៉ាល់ឌីវ នឹងធ្វើឡើងនៅថ្ងៃទី១៥ ខែសីហា ខាងមុខ។
ក្រុមឈ្នះនៅវគ្គជម្រុះមានកៅអីឡើងទៅលេងវគ្គចែកពូល D ជាមួយក្រុមATK Mohun Bagan របស់ឥណ្ឌា ក្រុម Bashundhara Kings របស់បង់ក្លាដេស និងក្រុម Maziya របស់ម៉ាល់ឌីវ ដែលកំពុងអង្គុយចាំ។ ប្រកួតវគ្គចែកពូលនេះធ្វើឡើងនៅថ្ងៃទី១៨ ,២១ និង២៤ ខែសីហា ឆ្នាំ២០២១។ ក្រុមលេខ១ក្នុងពូលមានឈ្មោះ តំណាងតំបន់ឡើងទៅប្រកួតជាមួយក្រុមខ្លាំងៗនៅ៣តំបន់ផ្សេងទៀតប្រចាំទ្វីប។
