ប្រទេសជប៉ុន ដណ្ដើមបានមេដាយច្រើនជាងគេ ក្នុងការប្រកួតកីឡាអត្តពលកម្មកម្រិតទ្វីបអាស៊ី 2023 Asian Athletics Championships ខណ: ប្រទេសចិនជាប់ចំណាត់ថ្នាក់លេខ២ និងឥណ្ឌា លេខ៣ ក្រោយបិទបញ្ចប់កាលពីថ្ងៃទី១៦ កក្កដា កន្លងទៅ។
ក្នុងនោះមានប្រទេសចំនួន ៤២ចូលរួមប្រកួតប្រជែង និងឆ្លងកាត់ការប្រកួតអស់រយ:ពេល ៥ថ្ងៃ នឹងបានដាក់វិញ្ញាសាចំនួន៤៣ ឲ្យប្រកួតប្រជែង ឃើញថា មានប្រទេសក្នុងតំបន់អាស៊ានចំនួន ៥ប្រទេសប៉ុណ្ណេះដែលដណ្ដើមបានមេដាយក្នុងព្រឹត្តិការណ៍នេះគឺ ហ្វីលីពីន, សិង្ហបុរី, ម្ចាស់ផ្ទះថៃ, វៀតណាម និងម៉ាឡេស៊ី។
ដោយឡែកសម្រាប់ប្រទេសកម្ពុជា បានបញ្ជូនអត្តពលិកចំនួន ៣រូបទៅប្រកួតប្រជែង ដោយក្នុងនោះមាន៖ កីឡាករ ឈុន ប៊ុនថន ប្រកួតវិញ្ញាសា ៨០០ម៉ែត្របុរស, ១៥០០ម៉ែត្របុរស, កីឡាករ ណឹប ចាន់យូរ៉ុង ប្រកួតវិញ្ញាសា ១០០ម៉ែត្របុរស, ២០០ម៉ែត្របុរស និងកីឡាការិនី ពក ពិសី ប្រកួតវិញ្ញាសាលោតចម្ងាយនារី ប៉ុន្តែមិនទទួលបានមេដាយឡើយ។
ខាងក្រោមនេះគឺជាតារាងមេដាយប្រទេសដណ្ដើមបានក្នុងការប្រកួតកីឡាអត្តពលកម្មកម្រិតទ្វីបអាស៊ី 2023 Asian Athletics Championships ក្រោយបិទបញ្ចប់កាលពីថ្ងៃទី១៦ កក្កដា កន្លងទៅ៖
លេខរៀង | ក្រុម | មេដាយមាស | មេដាយប្រាក់ | មេដាយសំរឺទ្ធ | មេដាយសរុប |
១ | ជប៉ុន | ១៦ | ១១ | ១០ | ៣៧ |
២ | ចិន | ៨ | ៨ | ៦ | ២២ |
៣ | ឥណ្ឌា | ៦ | ១២ | ៩ | ២៧ |
៤ | ស្រីលង្កា | ៣ | ២ | ៣ | ៨ |
៥ | កាតា | ២ | ១ | ១ | ៤ |
៦ | ហ្វីលីពីន | ២ | ០ | ០ | ២ |
៧ | សិង្ហបុរី | ២ | ០ | ០ | ២ |
៨ | កាហ្សាក់ស្ថាន | ១ | ២ | ១ | ៤ |
៩ | អ៊ូសបេគីស្ថាន | ១ | ២ | ១ | ៤ |
១០ | *ថៃ | ១ | ១ | ៤ | ៦ |
១១ | ចិនតៃបុិ | ១ | ១ | ០ | ២ |
១២ | កូរ៉េខាងត្បូង | ១ | ០ | ២ | ៣ |
១៣ | វៀតណាម | ១ | ០ | ១ | ២ |
១៤ | អុីរ៉ង់ | ០ | ២ | ១ | ៣ |
១៥ | អារ៉ាប៊ីសាអូឌីត | ០ | ២ | ១ | ៣ |
១៦ | គុយវ៉ែត | ០ | ១ | ២ | ៣ |
១៧ | ម៉ាឡេស៊ី | ០ | ០ | ១ | ១ |
១៨ | ម៉ុងហ្កោលី | ០ | ០ | ១ | ១ |
១៩ | ប៉ាគីស្ថាន | ០ | ០ | ១ | ១ |
៤៥ | ៤៥ | ៤៥ | ១៣៥ |
រំលឹកថា កន្លងសម្រាប់កម្ពុជា ធ្លាប់ឈ្នះមេដាយសំរឹទ្ធិចំនួន២គ្រឿង ក្នុងការប្រកួតលើកទី១ កាលពីឆ្នាំ១៩៧៣ នៅទីក្រុង Rizal ប្រទេសហ្វីលីពីន (1973 Asian Athletics Championships) កាលនោះប្រើឈ្មោះជាសាធារណរដ្ឋខ្មែរ ហើយកីឡាករ Oumvan Narith ឈ្នះមេដាយសំរឹទ្ធិវិញ្ញាសាចោលដុំដែក ហើយកីឡាករការិនី Proch Thin ឈ្នះមេដាយសំរឹទ្ធិវិញ្ញាសាចោលស្ន (Javelin Throw)។
គួរបញ្ជាក់ថា ការប្រកួត 2023 Asian Athletics Championships លើកទី២៥ ធ្វើឡើងពីថ្ងៃទី១២ ដល់១៦ ខែកក្កដា ឆ្នាំ២០២៣ នៅពហុកីឡដ្ឋាន Supachalasai National Stadium រាជធានីបាងកក ប្រទេសថៃ ខណៈការប្រកួតលើកទី២៤ កន្លងទៅនៅ Hangzhou ប្រទេសចិន ប៉ុន្តែ ត្រូវរំសាយវិញ ដោយសារការរាតត្បាតនៃជំងឺកូវីដ-១៩៕