ក្លិបបាល់ទាត់ភ្នំពេញក្រោន ក្រោមការដឹកនាំរបស់លោក Oleg Starynskyi បានប្រកាសនាំចូលកីឡាករ Soe Moe Kyaw ជនជាតិមីយ៉ាន់ម៉ា សម្រាប់លីគកំពូលកម្ពុជា Cambodia Premier League រដូវកាល ២០២៣-២៤។
កីឡាករ Soe Moe Kyaw កើតនៅថ្ងៃទី២៣ ខែមីនា ឆ្នាំ១៩៩៩ បច្ចុប្បន្នមានអាយុ ២៤ឆ្នាំ កម្ពស់ ១.៨៦ម៉ែត្រ លេងតំណែងជាខ្សែការពារកណ្តាល ផ្លាស់ពី Kasetsart F.C លីគទី២ របស់ប្រទេសថៃ។
រូបគេជាកីឡាករជម្រើសជាតិមីយ៉ាន់ម៉ា ចាប់ពីឈុតយុវជន U-17, U20 , U23 និងឈុតធំ ចន្លោះពីឆ្នាំ ២០១៧ រហូតដល់បច្ចុប្បន្ននេះនៅឆ្នាំ ២០២៣។
ចំពោះកីឡាករ Soe Moe Kyaw គឺជាកីឡាករមីយ៉ាន់ម៉ាទី២ ផ្លាស់មកកាន់លីគកំពូលកម្ពុជា បន្ទាប់ពីកីឡាករ THIHA SAW របស់ព្រៃវែង។
ក្រុមបាល់ទាត់ភ្នំពេញក្រោន ដែលជាម្ចាស់ជើងឯកពានរង្វាន់លីគកំពូលកម្ពុជា Cambodian Premier League 2022 នឹងតំណាងឱ្យកម្ពុជា ចូលរួមប្រកួតពានរង្វាន់ជើងឯកកម្រិតទី២ប្រចាំទ្វីបអាស៊ី គឺ AFC Cup រដូវកាលឆ្នាំ២០២៣-២៤ ក្នុងកូតាវគ្គជម្រុះបឋម។
វគ្គជម្រុះបឋមប្រចាំតំបន់អាស៊ាន នេះហៅថា Preliminary ដែលមាន២គូ ត្រូវប្រកួតនៅថ្ងៃទី ១៦ ខែសីហា ឆ្នាំ២០២៣ ក្នុងនោះ៖
គូទី១៖ ភ្នំពេញក្រោន (កម្ពុជា) ប៉ះ Young Elephants (ឡាវ)
គូទី២៖ Yangon United (មីយ៉ាន់ម៉ា) ប៉ះ Kasuka (ប្រ៊ុយណេ)
វគ្គជម្រុះ Play Off Round នឹងធ្វើឡើងនៅថ្ងៃទី២៣ ខែសីហា ឆ្នាំ២០២៣ ដោយ៖
គូទី១៖ Tampines Rovers (សិង្ហបុរី) ប៉ះ អ្នកឈ្នះរវាង ភ្នំពេញក្រោន និងYoung Elephants
គូទី២៖ PSM Makassar (ឥណ្ឌូណេស៊ី) ប៉ះ អ្នកឈ្នះរវាង Yangon United និង Kasuka។
ភ្នំពេញក្រោន នឹងត្រូវជួប វិសាខា ដណ្តើមពានរង្វាន់ខេមបូឌានស៊ូបភើខាប់ ឆ្នាំ២០២៣ នៅអាទិត្យ ទី៣០ ខែកក្កដា ឆ្នាំ២០២៣ នាពហុកីឡដ្ឋានជាតិ (ស្តាតអូឡាំពិក) វេលាម៉ោង ៦:០០ ល្ងាច៕